ഇന്ത്യയോട് പൊരുതി തോറ്റ് അയര്‍ലന്‍ഡ്.... അവസാന ഓവര്‍ വരെ ആവേശം അലതല്ലിയ മത്സരത്തില്‍ 4 റണ്‍സിന് ജയം കരസ്ഥമാക്കി ഇന്ത്യ... 

ട്വന്റി 20യുടെ എല്ലാ ആവേശവും നിറഞ്ഞു നിന്ന തകര്‍പ്പന്‍ മത്സരത്തില്‍ ഇന്ത്യയോട് പൊരുതി തോറ്റ് അയര്‍ലന്‍ഡ്.



ടോസ് നേടി ബാറ്റിംഗ് തിരഞ്ഞെടുത്ത ഇന്ത്യ 20 ഓവറില്‍ 7 വിക്കറ്റ് നഷ്ടത്തില്‍ 225 റണ്‍സ് നേടി. സെഞ്ച്വറി നേടിയ ദീപക് ഹൂഡയുടെയും അര്‍ദ്ധ സെഞ്ച്വറി നേടിയ മലയാളി താരം സഞ്ജു സാംസണിന്റെയും ബാറ്റിംഗ് മികവാണ് ഇന്ത്യക്ക് മികച്ച സ്‌കോര്‍ സമ്മാനിച്ചത്.ദീപക് ഹൂഡ 57 പന്തില്‍ 104 റണ്‍സ് നേടി. സഞ്ജു 42 പന്തില്‍ 77 റണ്‍സ് നേടി. ഇഷാന്‍ കിഷനൊപ്പം സഞ്ജുവാണ് ഇന്ത്യയുടെ ഇന്നിംഗ്‌സ് ഓപ്പണ്‍ ചെയ്തത്.

അയര്‍ലന്‍ഡിന് വേണ്ടി മാര്‍ക്ക് അഡെയ്ര്‍ 3 വിക്കറ്റ് വീഴ്ത്തി. ജോഷ്വ ലിറ്റില്‍, ക്രെയ്ഗ് യംഗ് എന്നിവര്‍ 2 വിക്കറ്റ് വീതം വീഴ്ത്തി. ഇന്ത്യക്ക് അതേ നാണയത്തില്‍ തിരിച്ചടി നല്‍കിയ അയര്‍ലന്‍ഡ് നിശ്ചിത ഓവറുകള്‍ പൂര്‍ത്തിയാകുമ്പോള്‍ 5 വിക്കറ്റ് നഷ്ടത്തില്‍ 221 റണ്‍സ് നേടി. അയര്‍ലന്‍ഡിനായി പരിചയ സമ്പന്നരായ ബാല്‍ബിര്‍ണിയും സ്റ്റിര്‍ലിംഗും ഗംഭീര പ്രകടനം കാഴ്ച വെയ്ക്കുകയും ചെയ്തു.

ടെക്ടറും ഡോക്രലും അഡെയറും ഉറച്ച പിന്തുണ നല്‍കിയപ്പോള്‍ ഒരു ഘട്ടത്തില്‍ അവര്‍ അട്ടിമറി വിജയം നേടും എന്ന് തോന്നിച്ചു. എന്നാല്‍ പരിച സമ്പത്ത് ഇന്ത്യക്ക് തുണയായതോടെ, ക്യാപ്ടന്‍ എന്ന നിലയില്‍ അന്താരാഷ്ട്ര ക്രിക്കറ്റിലേക്കുള്ള അരങ്ങേറ്റം ഹര്‍ദ്ദിക് പാണ്ഡ്യ അപരാജിതമാക്കി.

ഇന്നിംഗ്‌സിന്റെ തുടക്കം മുതല്‍ ആക്രമിച്ചു കളിച്ച സ്റ്റിര്‍ലിംഗും ബാല്‍ബിര്‍ണിയും ചേര്‍ന്ന് 5.4 ഓവറില്‍ 72 റണ്‍സിന്റെ കൂട്ടുകെട്ട് പടുത്തുയര്‍ത്തി. 18 പന്തില്‍ 40 റണ്‍സ് നേടിയ സ്റ്റിര്‍ലിംഗിനെ രവി ബിഷ്‌ണോയ് പുറത്താക്കി. ആന്‍ഡ്രൂ ബാല്‍ബിര്‍ണി 37 പന്തില്‍ 60 റണ്‍സ് നേടി. 7 സിക്‌സറുകള്‍ അടങ്ങുന്നതായിരുന്നു ബാല്‍ബിര്‍ണിയുടെ ഇന്നിംഗ്‌സ്. ഹാരി ഹെക്ടര്‍ 28 പന്തില്‍ 39 റണ്‍സ് നേടി. ജോര്‍ജ്ജ് ഡോക്രല്‍ 16 പന്തില്‍ 34 റണ്‍സും മാര്‍ക് അഡെയ്ര്‍ 12 പന്തില്‍ 23 റണ്‍സും നേടി. ഇന്ത്യക്ക് വേണ്ടി ഭുവനേശ്വര്‍ കുമാര്‍, ഹര്‍ഷല്‍ പട്ടേല്‍, രവി ബിഷ്‌ണോയ്, ഉമ്രാന്‍ മാലിക് എന്നിവര്‍ ഓരോ വിക്കറ്റ് വീതം നേടുകയും ചെയ്തു.