വെസ്റ്റ് ഇന്‍ഡീസിനെതിരായ നാലാം ട്വന്റി മത്സരത്തില്‍ 59 റണ്‍സിന്റെ വിജയവുമായി പരമ്പര സ്വന്തമാക്കി ഇന്ത്യ. ടോസ് നഷ്ടമായി ബാറ്റിംഗിനിറങ്ങിയ ഇന്ത്യ 20 ഓവറില്‍ 5 വിക്കറ്റ് നഷ്ടത്തില്‍ 191 റണ്‍സെടുത്തു. മറുപടി ബാറ്റിംഗില്‍ അവസാന ഓവറിലെ ആദ്യ പന്തില്‍ വെസ്റ്റ് ഇന്‍ഡീസ് 132 റണ്‍സിന് പുറത്താകുകയും ചെയ്തു.

ഇന്ത്യക്ക് വേണ്ടി മുന്‍ നിര ബാറ്റ്‌സ്മാന്മാര്‍ മികച്ച പ്രകടനം കാഴ്ചവെച്ചു. 31 പന്തില്‍ 44 റണ്‍സെടുത്ത ഋഷഭ് പന്താണ് ഇന്ത്യയുടെ ടോപ് സ്‌കോററായി. 16 പന്തില്‍ 33 റണ്‍സെടുത്ത ക്യാപ്ടന്‍ രോഹിത് ശര്‍മ്മയും 23 പന്തില്‍ 30 റണ്‍സുമായി പുറത്താകാതെ നിന്ന മലയാളി താരം സഞ്ജു സാംസണും നന്നായി കളിച്ചു.


സൂര്യകുമാര്‍ യാദവ് 24 റണ്‍സും ദീപക് ഹൂഡ 21 റണ്‍സും നേടിയപ്പോള്‍ അക്‌സര്‍ പട്ടേല്‍ 20 റണ്‍സുമായി പുറത്താകാതെ നിന്നു. വെസ്റ്റ് ഇന്‍ഡീസിന് വേണ്ടി അല്‍സാരി ജോസഫ്, മക്കോയ് എന്നിവര്‍ 2 വിക്കറ്റ് വീതം വീഴ്ത്തി. നന്നായി തല്ല് വാങ്ങിയ മക്കോയ് 4 ഓവറില്‍ 66 റണ്‍സ് വഴങ്ങി. 24 റണ്‍സ് വീതമെടുത്ത ക്യാപ്ടന്‍ നിക്കോളാസ് പുരാനും റോവ്മാന്‍ പവലും മാത്രമാണ് കരീബിയന്‍ നിരയില്‍ പിടിച്ചു നില്‍ക്കാന്‍ കഴിഞ്ഞത്്. 8 പന്തില്‍ 24 റണ്‍സ് നേടിയ ക്യാപ്ടന്‍ നിക്കോളാസ് പുരാന്‍ ദൗര്‍ഭാഗ്യകരമായ റണ്ണൗട്ടിലൂടെ പുറത്തായത് അവര്‍ക്ക് തിരിച്ചടിയായി.

ഇന്ത്യന്‍ ബൗളര്‍മാര്‍ മികച്ച രീതിയില്‍ പന്തെറിഞ്ഞു. അര്‍ഷ്ദീപ് സിംഗ് 3 വിക്കറ്റ് വീഴ്ത്തിയപ്പോള്‍ ആവേശ് ഖാന്‍, അക്‌സര്‍ പട്ടേല്‍, രവി ബിഷ്‌ണോയ് എന്നിവര്‍ രണ്ട് വിക്കറ്റ് വീതം വീഴ്ത്തി.
ഈ വിജയത്തോടെ ഏകദിന പരമ്പരയ്ക്ക് പിന്നാലെ ട്വന്റി പരമ്പരയും ഇന്ത്യ സ്വന്തമാക്കി. 5 മത്സരങ്ങളുടെ പരമ്പര 3-1നാണ് ഇന്ത്യ സ്വന്തമാക്കിയത്.