'എല്ലാവരും ഐപിഎല്ലിനെക്കുറിച്ചു പറയുന്നു, സഞ്ജു സാംസണ് രഞ്ജി ട്രോഫി കളിക്കട്ടെ'
മലയാളി ക്രിക്കറ്റ് താരം സഞ്ജു സാംസണ് രഞ്ജി ട്രോഫി പോലുള്ള ആഭ്യന്തര ലീഗുകളില് കളിച്ച് തിരിച്ചുവരണമെന്ന് മുന് ഇന്ത്യന് താരം എസ്. ശ്രീശാന്ത്. ''സഞ്ജു സ്ഥിരത പുലര്ത്തണം. എല്ലാവരും ഐപിഎല്ലിനെക്കുറിച്ചാണു സംസാരിക്കുന്നത്. ഞാന് എപ്പോഴും സഞ്ജുവിനെ പിന്തുണച്ചിട്ടേയുള്ളൂ. അണ്ടര് 14 ടീമില് കളിക്കുമ്പോള് മുതല് സഞ്ജുവിനെ ഞാന് കാണുന്നുണ്ട്. രഞ്ജി ട്രോഫിയിലെ ആദ്യ മത്സരത്തില് സഞ്ജുവിന് ടീം ക്യാപ് നല്കിയതു ഞാനാണ്''– ശ്രീശാന്ത് ഡല്ഹിയില് പറഞ്ഞു.
''സഞ്ജു ഫസ്റ്റ് ക്ലാസ് മത്സരങ്ങളില് മികച്ച പ്രകടനങ്ങള് നടത്തണം. ഒരു സെഞ്ചറിയല്ല. ഇരട്ട സെഞ്ചറി നേടണം. കേരള ടീമിനു വേണ്ടി രഞ്ജി ട്രോഫി കിരീടം നേടുകയാണു സഞ്ജു ചെയ്യേണ്ടത്''– ശ്രീശാന്ത് വ്യക്തമാക്കി. ലെജന്ഡ് ക്രിക്കറ്റ് ലീഗില് പങ്കെടുക്കാന് ഡല്ഹിയിലെത്തിയപ്പോഴാണു ശ്രീശാന്ത് സഞ്ജുവിന്റെ പ്രകടനത്തേക്കുറിച്ചു സംസാരിച്ചതെന്നും ദേശീയ മാധ്യമങ്ങള് റിപ്പോര്ട്ട് ചെയ്തു.
ദക്ഷിണാഫ്രിക്കയ്ക്കെതിരായ ഏകദിന പരമ്പരയില് സഞ്ജു സാംസണ് ഇന്ത്യയുടെ വൈസ് ക്യാപ്റ്റനായി കളിച്ചേക്കുമെന്ന് അഭ്യൂഹങ്ങളുണ്ട്. സഞ്ജു ഏകദിന ടീമിലുണ്ടാകുമെന്നു കേരളത്തിലെത്തിയ ബിസിസിഐ അധ്യക്ഷന് സൗരവ് ഗാംഗുലിയും വ്യക്തമാക്കി. അതേസമയം ടീം പ്രഖ്യാപനം വരുന്നതുവരെ കാത്തിരിക്കണമെന്നാണു സഞ്ജു ഇതിനോടു പ്രതികരിച്ചത്.
https://www.facebook.com/Malayalivartha
