കാലം സാക്ഷി, മെല്‍ബണ്‍ ക്രിക്കറ്റ് ഗ്രൗണ്ടില്‍ തിങ്ങിനിറഞ്ഞ 90,293 കാണികള്‍ സാക്ഷി, ലോകത്തിന്റെ ഓരോ കോണിലുമിരുന്ന് ഇന്ത്യ–പാക്ക് മത്സരം കണ്ട കോടാനുകോടി ക്രിക്കറ്റ് ആരാധകര്‍ സാക്ഷി; ക്യാപ്റ്റന്‍സിയുടെ കിരീടവും സെ!ഞ്ചറികളുടെ ചെങ്കോലും അടിയറവു വച്ച് പടിയിറങ്ങിയ ക്രിക്കറ്റിന്റെ രാജകുമാരന്‍ രാജകീയമായിത്തന്നെ തിരിച്ചുവന്നിരിക്കുന്നു. വിരാട് കോലി, നിങ്ങള്‍ക്കു സ്തുതി എന്ന് ക്രിക്കറ്റ് ലോകം പുകഴ്ത്തുമ്പോള്‍... നിര്‍ണായക നിമിഷത്തില്‍ ഒട്ടും സമ്മര്‍ദ്ധമില്ലാതെ വിജയ റണ്‍സ് നേടിയ അശ്വിനെ പുകഴ്തിയാണ് കൊഹ്ലി രംഗത്തെത്തുന്നത്.

20–ാം ഓവറിലെ അവസാന പന്തില്‍ സിംഗിളെടുത്തു ടീമിനെ വിജയത്തിലെത്തിച്ചത് ആര്‍. അശ്വിനായിരുന്നു. ഗ്രൗണ്ടില്‍ രണ്ടു മിനിറ്റു മാത്രം നിന്ന അശ്വിന്‍ ഒരു പന്തില്‍ ഒരു റണ്ണാണ് ആകെ നേടിയത്. പക്ഷേ ഗ്രൗണ്ടിലെ ആ നിമിഷങ്ങള്‍ക്കു പൊന്നും വിലയുണ്ടെന്ന് മത്സരം കണ്ട ആര്‍ക്കും മനസ്സിലാകും.

ജയിക്കാന്‍ ഒരു പന്തില്‍ രണ്ട് റണ്‍സ് വേണമെന്നിരിക്കെ പാക്ക് സ്പിന്നര്‍ മുഹമ്മദ് നവാസിന്റെ പന്തില്‍ വൈഡ് വഴങ്ങാനായി മാറിയത് അശ്വിന്റെ അനുഭവ സമ്പത്തുകൊണ്ടു മാത്രമാണെന്നാണ് ആരാധകരുടെ വാദം. നവാസിന്റെ ലെഗ് സ്റ്റംപ് ലൈനിനു പുറത്തു വന്ന പന്ത് അശ്വിന്‍ ഒന്നും ചെയ്യാതെ വൈഡ് ആകാന്‍ അനുവദിക്കുകയായിരുന്നു. അങ്ങനെ കിട്ടി ഒരു റണ്‍. ഇതോടെ ഇന്ത്യന്‍ സ്‌കോര്‍ പാക്കിസ്ഥാനൊപ്പമെത്തി (159). തൊട്ടടുത്ത പന്തില്‍ മിഡ് ഓഫിലേക്ക് സിംഗിളെടുത്ത് സമ്മര്‍ദങ്ങളില്ലാതെ അശ്വിന്‍ ടീം ഇന്ത്യയെ വിജയത്തിലെത്തിക്കുകയും ചെയ്തു.

അശ്വിനെ പുകഴ്ത്തി വിരാട് കോലി തന്നെ മത്സരശേഷം രംഗത്തെത്തി. ''ഞാന്‍ അശ്വിനോട് പന്തു നേരിടാനായിരുന്നു പറഞ്ഞത്. എന്നാല്‍ അദ്ദേഹം വൈഡ് പോകാന്‍ അനുവദിച്ചു. അതുകൊണ്ട് അവസാന പന്തില്‍ അശ്വിന് വിജയമുറപ്പിക്കാന്‍ ഒരു ഇടം കണ്ടെത്തി അടിച്ചാല്‍ മാത്രം മതിയായിരുന്നു''– മത്സരശേഷം കോലി ഒരു സ്‌പോര്‍ട്‌സ് മാധ്യമത്തോടു പറഞ്ഞു. പന്ത് സൂക്ഷ്മമായി നിരീക്ഷിച്ച് ഉടനടി തീരുമാനം ൈകകൊണ്ട അശ്വിനെ പുകഴ്ത്തി നിരവധി പേരാണു സമൂഹമാധ്യമങ്ങളില്‍ പ്രതികരിക്കുന്നത്.

8 പന്തില്‍ 28 റണ്‍സ് എന്ന ഏറെക്കുറെ അസംഭവ്യമായ ലക്ഷ്യം കണ്ട് നിറഞ്ഞൊഴുകിയ ഇന്ത്യന്‍ ആരാധകരുടെ കണ്ണുകളില്‍ പ്രതീക്ഷയുടെ പുഞ്ചിരി വിരിയിക്കാന്‍ കോലിക്കു വേണ്ടിവന്നത് രണ്ടേ രണ്ടു പന്തുകള്‍ മാത്രം. പാക്ക് താരം ഹാരിസ് റൗഫ് എറിഞ്ഞ 19–ാം ഓവറിലെ അഞ്ചാം പന്ത് ലോങ് ഓണിനു മുകളിലൂടെയും അവസാന പന്ത് ഫൈന്‍ ലെഗിനു മുകളിലൂടെയും കോലി സിക്‌സര്‍ പറത്തിയപ്പോള്‍ ട്വന്റി20 ക്രിക്കറ്റിലെ ചരിത്ര നിമിഷങ്ങളില്‍ ഒന്നിനാണ് തങ്ങള്‍ സാക്ഷ്യം വഹിക്കാന്‍ പോകുന്നതെന്ന് ഇന്ത്യന്‍ ക്രിക്കറ്റ് ആരാധകര്‍ തിരിച്ചറിഞ്ഞിരിക്കണം.

ഇന്ത്യന്‍ സ്‌കോര്‍ 4 വിക്കറ്റ് നഷ്ടത്തില്‍ 35 റണ്‍സില്‍ നില്‍ക്കുമ്പോള്‍ വിന്‍ പ്രഡിക്റ്ററില്‍ (റണ്‍ റേറ്റും വിക്കറ്റ് വീഴ്ചയും ഉപയോഗിച്ച് വിജയശതമാനം കണക്കാക്കുന്ന രീതി) 15 ശതമാനമായിരുന്നു ഇന്ത്യയുടെ വിജയ സാധ്യത. കോലിയുടെ സ്‌കോര്‍ ആകട്ടെ 20 പന്തില്‍ 11 റണ്‍സും. ഒന്നു പൊരുതിനോക്കാന്‍ പോലും കെല്‍പില്ലാതെ ടീം ഇന്ത്യ പരാജയത്തിന്റെ പടുകുഴിയിലേക്ക് വീഴുമോ എന്നു ഭയന്ന ഇന്ത്യന്‍ ആരാധകരുടെ ഹൃദയത്തിലേക്കാണ് ഹാര്‍ദിക് പാണ്ഡ്യയെ കൂട്ടുപിടിച്ച് കോലി നടന്നു കയറിയത്. ആദ്യ 20 പന്തില്‍ 11 റണ്‍സാണ് നേടിയതെങ്കില്‍ അടുത്ത 33 പന്തുകളില്‍ കോലിയുടെ ബാറ്റില്‍ നിന്നു പിറന്നത് 71 റണ്‍സ്! ആദ്യ ഓവറുകളില്‍ 120 ആയിരുന്നു കോലിയുടെ സ്‌ട്രൈക്ക് റേറ്റ് എങ്കില്‍ അവസാന ഓവറുകളില്‍ അത് 190ലേക്ക് കുതിച്ചുയര്‍ന്ന കാഴ്ച. പ്രതാപ കാലത്തെ കിങ് കോലിയെ ഓര്‍മിപ്പിക്കുന്ന ഇന്നിങ്‌സ്.