ട്വന്റി 20 ക്രിക്കറ്റ് ലോകകപ്പില്‍ ഇന്ന് ഇന്ത്യയും ദക്ഷിണാഫ്രിക്കയും നേര്‍ക്കുനേര്‍.... ആദ്യമത്സരങ്ങളില്‍ പാകിസ്താനെയും ഹോളണ്ടിനെയും തോല്‍പ്പിച്ച ഇന്ത്യ ഉജ്ജ്വലഫോമിലാണ്. കഴിഞ്ഞമത്സരത്തില്‍ ബംഗ്ലാദേശിനെ 104 റണ്‍സിന് തകര്‍ത്ത ദക്ഷിണാഫ്രിക്കയും അപകടസൂചനകള്‍ നല്‍കിക്കഴിഞ്ഞു.

സിംബാബ്വേക്കെതിരേ ഉറപ്പായും ജയിക്കുമായിരുന്ന മത്സരം മഴയെടുത്തില്ലായിരുന്നെങ്കില്‍ ദക്ഷിണാഫ്രിക്കയ്ക്കും ഇന്ത്യക്കൊപ്പം തുല്യ പോയന്റാകുമായിരുന്നു.

പെര്‍ത്തിലെ വാക്ക ഗ്രൗണ്ടിലാണ് പരമ്പരാഗതമായി അന്താരാഷ്ട്ര മത്സരങ്ങള്‍ നടന്നിരുന്നത്. പെര്‍ത്തില്‍ പുതിയതായി നിര്‍മിച്ച ഓപ്ടസ് സ്റ്റേഡിയത്തിലാണ് ഇപ്പോള്‍ മത്സരങ്ങള്‍. വാക്കയിലേതുപോലെത്തന്നെ പേസര്‍മാരെ തുണയ്ക്കുന്ന പിച്ചാണ് ഓപ്ടസിലേത്.

കാഗിസോ റബാഡയും ആന്റിച്ച് നോര്‍ക്യയും അടങ്ങുന്ന ദക്ഷിണാഫ്രിക്കന്‍ ഫാസ്റ്റ് ബൗളിങ് നിര ഇന്ത്യയുടെ മുന്‍നിര ബാറ്റര്‍മാര്‍ക്ക് വെല്ലുവിളിയാകും. രോഹിത് ശര്‍മ, കെ.എല്‍. രാഹുല്‍, വിരാട് കോലി, സൂര്യകുമാര്‍ യാദവ് എന്നിവരെല്ലാം സൂക്ഷിച്ച് കളിക്കേണ്ടിവരും. 

ഓസ്‌ട്രേലിയയില്‍ ഇപ്പോള്‍ മഴ കുറവുള്ള സ്ഥലങ്ങളിലൊന്ന് പെര്‍ത്താണ്. ഞായറാഴ്ച മഴപെയ്യാനുള്ള സാധ്യത 14 ശതമാനത്തില്‍ താഴെമാത്രമാണ്. കളിതുടങ്ങുന്ന സമയത്ത് സാധ്യത വെറും നാല് ശതമാനവും.

കഴിഞ്ഞ രണ്ട് മത്സരങ്ങളിലും ഇന്ത്യ ഒരേ ഇലവനെയാണ് കളിപ്പിച്ചത്. അതില്‍ മാറ്റംവരുത്താന്‍ കോച്ച് രാഹുല്‍ ദ്രാവിഡോ ക്യാപ്റ്റന്‍ രോഹിത് ശര്‍മയോ തയ്യാറാവാന്‍ സാധ്യതയില്ല. തുടക്കത്തില്‍ പിടിച്ചുനിന്ന് പിന്നീട് തകര്‍ത്തടിക്കുന്ന കോലിയുടെ ശൈലിയാകും പെര്‍ത്തില്‍ ഫലപ്രദം.