ഇംഗ്ലണ്ടിനെതിരായ ടെസ്റ്റ് പരമ്പരയിലെ മൂന്നാമത്തെ മത്സരത്തില് ഇന്ത്യയ്ക്ക് ബാറ്റിങ് തകര്ച്ച... 15 ഓവറില് മൂന്ന് വിക്കറ്റ് നഷ്ടം
ഇംഗ്ലണ്ടിനെതിരായ ടെസ്റ്റ് പരമ്പരയിലെ മൂന്നാമത്തെ മത്സരത്തില് ഇന്ത്യക്ക് ബാറ്റിങ് തകര്ച്ച. 15 ഓവറില് മൂന്ന് വിക്കറ്റ് നഷ്ടത്തില് 56 റണ്സ് എന്ന നിലയിലാണ് ഇന്ത്യ.
29 റണ്സുമായി ക്യാപ്റ്റന് രോഹിത് ശര്മയും 10 റണ്സുമായി രവീന്ദ്ര ജദേജയുമാണ് ക്രീസില്.മാര്ക്ക് വുഡ് രണ്ടും ടോം ഹാര്ട്ട്ലി ഒരു വിക്കറ്റും വീഴ്ത്തി. ടോസ് നേടി ആദ്യ ഇന്നിങ്സ് ബാറ്റിങ്ങിനിറങ്ങിയ ഇന്ത്യക്ക് 10 റണ്സെടുത്ത ഓപണര് യശസ്വി ജയ്സ്വാളിന്റെ വിക്കറ്റാണ് ആദ്യം നഷ്ടമായത്. മാര്ക്ക് വുഡിന്റെ പന്തില് ജോ റൂട്ട് പിടിച്ചാണ് പുറത്താക്കിയത്. മൂന്നാമനായി ഇറങ്ങിയ ശുഭ്മാന് ഗില് ഒമ്പത് പന്തില് റണ്സൊന്നും എടുക്കാതെ മാര്ക്ക് വുഡിന്റെ പന്തില് കീപ്പര് ബെന് ഫോക്സിന് ക്യാച്ച് നല്കി മടങ്ങി.
തുടര്ന്നെത്തിയ രജിത് പട്ടിദാറിനെ (5) നിലയുറപ്പിക്കും മുന്പെ ടോം ഹാര്ട്ലി പുറത്താക്കി. അരങ്ങേറ്റ മത്സരത്തിനൊരുങ്ങിയ സര്ഫറാസ് ഖാനെയും ദ്രുവ് ജുറേലും മറികടന്നാണ് ഓള്റൗണ്ടര് രവീന്ദ്ര ജദേജ രോഹിതിന് കൂട്ടായി ക്രീസിലെത്തിയത്. അഞ്ചു മത്സരങ്ങളടങ്ങിയ പരമ്പരയില് ഓരോ മത്സരങ്ങള് ജയിച്ച് 1-1 നിലയിലാണ് ഇരുടീമും.
സീനിയര് ബാറ്റര്മാരായ വിരാട് കോഹ്ലി, കെ.എല് രാഹുല്, ശ്രേയസ് അയ്യര് എന്നിവരുടെ അഭാവത്തില് പുതുമുഖങ്ങളെ അണിനിരത്തിയാണ് ടീം ഇന്ത്യ ഇറങ്ങിയത്. പേസര് മുഹമ്മദ് സിറാജും ഓള്റൗണ്ടര് രവീന്ദ്രജദേജയും ടീമില് തിരിച്ചെത്തിയപ്പോള് അക്സര് പട്ടേലും മുകേഷ് കുമാറും പുറത്തായി. അന്തിമ ഇലവനില് ഇടം പിടിച്ച സര്ഫറാസ് ഖാനും ധ്രുവ് ജുറെലിനും ഇന്ന് അരങ്ങേറ്റ മത്സരമാണ്.
https://www.facebook.com/Malayalivartha