ഇംഗ്ലണ്ടിനെതിരായ നാലാം ടെസ്റ്റില്‍ ഇംഗ്ലണ്ടിനെ ഞെട്ടിച്ച് അരങ്ങേറ്റക്കാരന്‍ ആകാശ്ദീപ് സിംഗ്. ഓപ്പണര്‍മാരായ സാക്ക് ക്രോളിയെയും ബെന്‍ ഡക്കറ്റിനെയും ഒലി പോപ്പിനെയും തുടക്കത്തില്‍ തന്നെ പുറത്താക്കി യുവതാരം ഇന്ത്യയ്ക്ക് സ്വപ്നതുല്യമായ തുടക്കമാണ് നല്കിയത്.

ആറോവറില്‍ 20 റണ്‍സ് മാത്രം വഴങ്ങിയാണ് മൂന്നുവിക്കറ്റ് വീഴ്ത്തിയത്. ടോസ് നേടി ബാറ്റിംഗിനിറങ്ങിയ ഇംഗ്ലണ്ടിന് ഓപ്പണര്‍മാര്‍ മികച്ച തുടക്കമാണ് നല്കിയത്. എന്നാല്‍ മികച്ച രീതിയില്‍ പന്തെറിഞ്ഞ ആകാശ്ദീപിന് തുടക്കം നിരാശാജനകമായിരുന്നു.

തന്റെ രണ്ടാം ഓവറിലെ അഞ്ചാം പന്തില്‍ തന്നെ സാക് ക്രോളിയെ ബൗള്‍ഡാക്കിയെങ്കിലും നോബോളായി.ആദ്യ വിക്കറ്റ് വീഴ്ത്തിയ സന്തോഷത്തില്‍ ആകാശ് ദീപും ഇന്ത്യന്‍ താരങ്ങളും ആഘോഷം ആരംഭിക്കവേയാണ് നോബോള്‍ സിഗ്‌നല്‍ എത്തിയത്. ജീവന്‍ കിട്ടിയ സാക് ക്രോളി ബാസ്‌ബോള്‍ ശൈലിയിലാണ് പിന്നെ ബാറ്റ് വീശിയത്.

മുഹമ്മദ് സിറാജിന്റെ ഓവറില്‍ തുടര്‍ച്ചയായി മൂന്ന് ബൗണ്ടറികളും സിക്‌സും പറത്തിയ ക്രോളി 19 റണ്‍സ് അടിച്ചുകൂട്ടി. എന്നാല്‍, സ്‌കോര്‍ 47 റണ്‍സില്‍ നില്‌ക്കെ ബെന്‍ ഡക്കറ്റിനെ തന്റെ ആദ്യ ഇരയാക്കി ആകാശ്ദീപ് അരങ്ങേറ്റം ഗംഭീരമാക്കി. വിക്കറ്റിനു പിന്നില്‍ ധ്രുവ് ജുറെലിനു പിടികൊടുത്തു മടങ്ങുമ്പോള്‍ 11 റണ്‍സായിരുന്നു ഡക്കറ്റിന്റെ സമ്പാദ്യം.

പിന്നാലെ നാലാം പന്തില്‍ ഒലി പോപ്പിനെ (പൂജ്യം) വിക്കറ്റിനു മുന്നില്‍ കുടുക്കി ആകാശ്ദീപ് സന്ദര്‍ശകരെ വീണ്ടും ഞെട്ടിച്ചു. തന്റെ തൊട്ടടുത്ത ഓവറില്‍ തകര്‍ത്തടിച്ചുകൊണ്ടിരുന്ന സാക്ക് ക്രോളിയെ വീണ്ടും പുറത്താക്കി ആകാശ്ദീപ് തന്റെ അരങ്ങേറ്റം ഗംഭീരമാക്കി. 42 പന്തില്‍ ആറു ബൗണ്ടറിയുടെയും ഒരു സിക്‌സറിന്റെയും അകമ്പടിയോടെ 42 റണ്‍സെടുത്ത ക്രോളിയാണ് നിലവിലെ ടോപ് സ്‌കോറര്‍.

ഒടുവില്‍ വിവരം ലഭിക്കുമ്പോള്‍ 12 ഓവറില്‍ മൂന്ന് വിക്കറ്റ് നഷ്ടത്തില്‍ 57 റണ്‍സെന്ന നിലയിലാണ് ഇംഗ്ലണ്ട്.