വിക്കറ്റ് കീപ്പര്‍ ബാറ്റര്‍ ഇഷാന്‍ കിഷന്‍ ഇടവേളക്കുശേഷം മത്സര ക്രിക്കറ്റിലേക്ക് മടങ്ങിയെത്തി. ഡി.വൈ പാട്ടില്‍ ട്വന്റി20 കപ്പിലാണ് താരം കളിക്കാനിറങ്ങിയത്.

ഇന്ത്യയുടെ ദക്ഷിണാഫ്രിക്കന്‍ പരമ്പരക്കിടെയാണ് മാനസിക സമ്മര്‍ദം ചൂണ്ടിക്കാട്ടി താരം ക്രിക്കറ്റില്‍ നിന്ന് അവധിയെടുക്കുന്നത്. അഫ്ഗാനിസ്ഥാനെതിരായ ട്വന്റി20 പരമ്പരയില്‍ നിന്ന് വിട്ടുനിന്ന ഇഷാന്‍ ഇംഗ്ലണ്ടിനെതിരായ ടെസ്റ്റ് പരമ്പരയിലും കളിക്കുന്നില്ല.

ദേശീയ ടീമില്‍ മടങ്ങിയെത്താനായി രഞ്ജി ട്രോഫി കളിക്കണമെന്ന് താരത്തിന് ബി.സി.സി.ഐയും പരിശീലകന്‍ രാഹുല്‍ ദ്രാവിഡും നിര്‍ദേശം നല്‍കിയിട്ടുണ്ടായിരുന്നു. എന്നാല്‍, മുന്നറിയിപ്പ് അവഗണിച്ച താരം ഹാര്‍ദിക് പാണ്ഡ്യക്കൊപ്പം ഐ.പി.എല്ലിനായി പരിശീലനം നടത്തുന്നത് വലിയ വിമര്‍ശനത്തിനിടയാക്കി. ഹാര്‍ദിക്കിനൊപ്പം ജിമ്മില്‍ നില്‍ക്കുന്ന ചിത്രവും താരം സമൂഹമാധ്യമങ്ങളില്‍ പങ്കുവെച്ചു.

വിവാദങ്ങള്‍ക്കിടെയാണ് ഒടുവില്‍ ക്രിക്കറ്റിലേക്ക് താരം മടങ്ങിയെത്തിയത്. എന്നാല്‍, ആദ്യ മത്സരത്തില്‍ താരം ആരാധകരെ നിരാശപ്പെടുത്തി. റിസര്‍വ് ബാങ്ക് ഓഫ് ഇന്ത്യക്കു വേണ്ടി ബാറ്റിങ്ങിനിറങ്ങിയ കിഷന്‍ 12 പന്തില്‍ രണ്ട് ഫോറും ഒരു സിക്‌സുമടക്കം 19 റണ്‍സെടുത്ത് പുറത്തായി. നവി മുംബൈയില്‍ റൂട്ട് മൊബൈല്‍ ലിമിറ്റഡിനെതിരെ നടന്ന മത്സരത്തില്‍ 89 റണ്‍സിന് കിഷന്റെ ടീം പരാജയപ്പെട്ടു.

മാക്‌സ് വെല്‍ സ്വാമിനാഥന്റെ പന്തില്‍ വമ്പനടിക്കു ശ്രമിച്ച താരം മിഡ്-ഓഫില്‍ ക്യാച്ച് നല്‍കിയാണ് പുറത്തായത്. ആദ്യം ബാറ്റ് ചെയ്ത റൂട്ട് മൊബൈല്‍ 20 ഓവറില്‍ എട്ടു വിക്കറ്റിന് 192 റണ്‍സെടുത്തു. മറുപടി ബാറ്റിങ്ങില്‍ റിസര്‍വ് ബാങ്ക് ടീം 16.3 ഓവറില്‍ 103 റണ്‍സിന് പുറത്തായി. ബദ്രെ അലമിന്റെ അഞ്ചു വിക്കറ്റ് പ്രകടനമാണ് ഇഷാന്റെ ടീമിനെ തകര്‍ത്തത്.ഇന്ത്യന്‍ പ്രീമിയര്‍ ലീഗില്‍ മുംബൈ ഇന്ത്യന്‍സ് താരമാണ് കിഷന്‍. മാര്‍ച്ച് 24ന് ഗുജറാത്ത് ടൈറ്റന്‍സിനെതിരെയാണ് മുംബൈയുടെ ആദ്യ മത്സരം.