രാജസ്ഥാന്‍ 'റോയല്‍' ജയം. പഞ്ചാബ് കിങ്‌സിനെതിരെ മൂന്നു വിക്കറ്റിനാണ് വിന്റെയും സംഘത്തിന്റെയും ജയം. പഞ്ചാബ് ഉയര്‍ത്തിയ 148 റണ്‍സ് വിജയലക്ഷ്യം 19.5 ഓവറില്‍ ഏഴു വിക്കറ്റ് നഷ്ടത്തില്‍ രാജസ്ഥാന്‍ മറികടക്കുകയും ചെയ്തു.


സീസണിലെ അഞ്ചാം ജയത്തോടെ രാജസ്ഥാന് പത്തു പോയിന്റായി. യശ്വസി ജയ്സ്വാള്‍ (28 പന്തില്‍ 39), അവസാന ഓവറുകളില്‍ രക്ഷകരായ ഷിമ്രോണ്‍ ഹെറ്റ്മയര്‍ (10 പന്തില്‍ 27*), റോവ്മന്‍ പവല്‍ (5 പന്തില്‍ 11) എന്നിവരാണ് രാജസ്ഥാന്റെ വിജയശില്‍പികള്‍.


അര്‍ഷ്ദീപ് സിങ് എറിഞ്ഞ അവസാന ഓവറില്‍ പത്തു റണ്‍സാണ് രാജസ്ഥാന് ജയിക്കാന്‍ വേണ്ടിയിരുന്നത്. ആദ്യ രണ്ടു പന്തും ഡോട്ട് ബോള്‍ ആയതോടെ രാജസ്ഥാന് സമ്മര്‍ദ്ദമേറി. എന്നാല്‍ മൂന്നാം പന്ത് സിക്‌സര്‍ പറത്തി ഹെറ്റ്മയര്‍ ജയപ്രതീക്ഷ നല്‍കി. തൊട്ടടുത്ത പന്തില്‍ ഡബിളും അതിനടുത്ത പന്തില്‍ സിക്‌സും നേടി ഹെറ്റ്മയര്‍ അതിവേഗം രാജസ്ഥാനെ വിജയത്തിലെത്തിക്കുകയായിരുന്നു.

മറുപടി ബാറ്റിങ്ങില്‍, മികച്ച തുടക്കമാണ് ഓപ്പണര്‍മാരായ യശ്വസി ജയ്സ്വാളും (28 പന്തില്‍ 39), തനുഷ് കോട്ടിയാന്‍ (31 പന്തില്‍ 24) എന്നിവര്‍ ചേര്‍ന്നു നല്‍കിയത്. ബാറ്റിങ് ദുഷ്‌കരമായ പിച്ചില്‍ താളം കണ്ടെത്താന്‍ വിഷമിച്ചെങ്കിലും ഇരുവരും സ്‌കോര്‍ബോര്‍ഡ് ചലിപ്പിച്ചു. ഒന്നാം വിക്കറ്റില്‍ ഇരുവരും ചേര്‍ന്ന് 56 റണ്‍സ് കൂട്ടിച്ചേര്‍ത്തു.

അരങ്ങേറ്റ മത്സരം കളിച്ച തനുഷ് കോട്ടിയാനെ ഒന്‍പതാം ഓവറില്‍ പുറത്താക്കി ലിയാം ലിവിങ്സ്റ്റനാണ് പഞ്ചാബിന് ആദ്യ വിക്കറ്റ് സമ്മാനിച്ചത്. പിന്നീടെത്തിയ ക്യാപ്റ്റന്‍ സഞ്ജു സാംസണ്‍ (14 പന്തില്‍ 18) പതിവു ശൈലിയില്‍ അടിച്ചുകളിക്കാന്‍ ശ്രമിച്ചെങ്കിലും അധികനേരം പിടിച്ചുനില്‍ക്കാനായില്ല. ഇതിനിടെ സീസണിലെ തന്റെ ഉയര്‍ന്ന സ്‌കോര്‍ കണ്ടെത്തിയ ജയ്‌സ്വാളും പുറത്തായി. ഇന്‍ഫോം താരം റയാന്‍ പരാഗ് (18 പന്തില്‍ 23), ധ്രുവ് ജുറെല്‍ (11 പന്തില്‍ 6) എന്നിവരും പെട്ടെന്ന് പുറത്തായതോടെ രാജസ്ഥാന്‍ തോല്‍വി മണത്തു.

എന്നാല്‍ ആറാം വിക്കറ്റില്‍ ഒന്നിച്ച് ഹെറ്റ്മയറും, പവലും നേടിയ ബൗണ്ടറികള്‍ രാജസ്ഥാന് വിജയപ്രതീക്ഷ നല്‍കി. പവലിനു പുറത്തായതിനു പിന്നാലെ എത്തിയ കേശവ് മഹാരാജ് (2 പന്തില്‍ 1) പെട്ടെന്ന് പുറത്തായെങ്കിലും ട്രെന്റ് ബോള്‍ട്ടിനെ (0*) കൂട്ടുപിടിച്ച് ഹെറ്റ്മയര്‍ രാജസ്ഥാനെ വിജയത്തിലെത്തിക്കുകയായിരുന്നു. പഞ്ചാബിനായി കഗീസോ റബാദ, സാം കറന്‍ എന്നിവര്‍ രണ്ടു വിക്കറ്റ് വീതവും അര്‍ഷ്ദീപ് സീങ്, ലിയാം ലിവിങ്സ്റ്റന്‍, ഹര്‍ഷല്‍ പട്ടേല്‍ എന്നിവര്‍ ഓരോ വിക്കറ്റ് വീതവും വീഴ്ത്തി.

ടോസ് നഷ്ടപ്പെട്ട് ബാറ്റിങ്ങിനിറങ്ങിയ പഞ്ചാബിന് നിശ്ചിത 20 ഓവറില്‍ എട്ടു വിക്കറ്റ് നഷ്ടത്തില്‍ 147 റണ്‍സെടുക്കാനെ സാധിച്ചിള്ളൂ. ക്യാപ്റ്റന്‍ ശിഖര്‍ ധവാന്റെ അസാന്നിധ്യത്തില്‍ സാം കറന്റെ നേതൃത്വത്തിലാണ് പഞ്ചാബ് ഇറങ്ങിയത്.