മങ്കിഗേറ്റ് വിവാദം; പോണ്ടിംഗിനെതിരെ കുംബ്ലെ
മങ്കിഗേറ്റ് വിവാദത്തില് സച്ചിന് കള്ളം പറഞ്ഞു എന്നാരോപിച്ച് രംഗത്തെത്തിയ റിക്കി പോണ്ടിങ്ങിനെതിരെ അനില് കുംബ്ലെയുടെ രൂക്ഷ വിമര്ശനം. "അഞ്ച് വര്ഷങ്ങള്ക്ക് മുമ്പ് എന്താണ് സംഭവിച്ചതെന്ന് എന്നെക്കൊണ്ട് പറയിപ്പിക്കരുത്. വിവാദത്തെ പറ്റി ഒരു പുസ്തകം എഴുതാനുള്ള കാര്യങ്ങള് തനിക്കറിയാം. അതുവായിക്കാന് കാത്തിരിക്കുക" കുംബ്ലെ പറഞ്ഞു. കര്ണാടക ക്രിക്കറ്റ് അസോസിയേഷന്റെ ഒരു പുസ്തക പ്രകാശന ചടങ്ങിലാണ് കുംബ്ലെ പൊട്ടിത്തെറിച്ചത്. ജവഗല് ശ്രീനാഥും രാഹുല് ദ്രാവിഡും ചടങ്ങില് പങ്കെടുത്തിരുന്നു.
2008ല് സിഡ്നിയില് നടന്ന ഇന്ത്യ-ഓസ്ട്രേലിയ മത്സരത്തിലാണ് മങ്കി ഗേറ്റ് വിവാദം ഉണ്ടായത്. മത്സരത്തിനിടെ ഓസ്ട്രേലിയന് താരം ആന്ഡ്രൂ സൈമണ്ടിനെ ഹര്ഭജന് സിംഗ് കുരങ്ങന് എന്നുവിളിച്ചതാണ് വിവാദത്തിന് കാരണം. സംഭവത്തില് ഹര്ഭജനെ രക്ഷിക്കാന് സച്ചിന് ടെണ്ടുല്ക്കര് നുണ പറഞ്ഞു എന്നാണ് പോണ്ടിംഗ് പറഞ്ഞത്. തന്റെ ജീവചരിത്രമായ ദി ക്ലോസ് ഓഫ് പ്ലേ എന്ന പുസ്തകത്തിലാണ് പോണ്ടിംഗ് സച്ചിനെ വിമര്ശിച്ചുകൊണ്ട് രംഗത്തെത്തിയത്.
വിവാദമത്സരത്തില് ഹര്ഭജന് സിംഗിന് മാച്ച് റഫറി മെക്ക് പ്രോക്ടര് മൂന്നുകളികളില് വിലക്കേര്പ്പെടുത്തിയിരുന്നു. എന്നാല് അപ്പോഴൊന്നും പ്രതികരിക്കാതിരുന്ന സച്ചിന് വിലക്കിനെതിരെ ടീം അപ്പില് നല്കിയപ്പോള് ജസ്റ്റിസ് ജോണ് ഹാന്സണ് മുമ്പാകെ ഹര്ഭജന് അനുകൂലമായി കള്ളം പറഞ്ഞു. സച്ചിന്റെ മൊഴിയുടെ ബലത്തില് ഹര്ഭജന് കുറ്റവിമുക്തനായി. ഇത് സച്ചിനെ ജീവിതകാലം മുഴുവന് പിന്തുടരുമെന്നും റിക്കി പുസ്തകത്തില് പറയുന്നു.
https://www.facebook.com/Malayalivartha