ആനന്ദലഹരിയില് ബ്ലാസ്റ്റേഴ്സ് ആരാധകര്.... വാസ്കോയിലെ തിലക് മൈതാനത്ത് ഒഡീഷ എഫ്സിയെ എതിരില്ലാത്ത രണ്ട് ഗോളുകള്ക്ക് പരാജയപ്പെടുത്തി ബ്ലാസ്റ്റേഴ്സ് പോയിന്റ് പട്ടികയിലെ ഒന്നാം സ്ഥാനത്ത്...
ആനന്ദലഹരിയില് ബ്ലാസ്റ്റേഴ്സ് ആരാധകര്.... തോല്വിയറിയാതെ തുടര്ച്ചയായ 10 ാം മത്സരം പൂര്ത്തിയാക്കി. വാസ്കോയിലെ തിലക് മൈതാനത്ത് ഒഡീഷ എഫ്സിയെ എതിരില്ലാത്ത രണ്ട് ഗോളുകള്ക്ക് പരാജയപ്പെടുത്തി ബ്ലാസ്റ്റേഴ്സ് പോയിന്റ് പട്ടികയിലെ ഒന്നാം സ്ഥാനം തിരിച്ചുപിടിച്ചു.
ആദ്യപകുതിയില് നേടിയ ഗോളുകള്ക്കായിരുന്നു ബ്ലാസ്റ്റേഴ്സിന്റെ വിജയം. രണ്ട് ഗോളുകളും കേരള കൊമ്പന്മാരുടെ കോട്ട കാക്കുന്നവരില് നിന്നായിരുന്നു എന്നുള്ളതാണ് മറ്റൊരു പ്രത്യേകത.
ആദ്യ ഗോള് പ്രതിരോധത്തിലെ കുറിയ മനുഷ്യന്റെ കാലില്നിന്നായിരുന്നു, നിഷുകുമാര്. കളി അപ്പോള് 28 ാം മിനിറ്റില് ബോക്സിന്റെ ഇടത് മൂലയ്ക്കു നിഷുവിന് പന്ത് ലഭിച്ചപ്പോള് ഒഡീഷ പ്രതിരോധം കാര്യമായെടുത്തില്ല.
ഒഡീഷ ഗോള് കീപ്പര് പൊസിഷന് തെറ്റിനില്ക്കുന്നത് നിഷുവിനു നൊടിയിടകൊണ്ട് കത്തി. വലംകാലില് പന്തിനെ ഒന്ന് തൊട്ട് ലക്ഷ്യം പിടിച്ച് നിഷു തൊടുത്തു കിടുക്കാച്ചി ഷോട്ട്. പന്ത് വലത് പോസ്റ്റിലേക്ക് വളഞ്ഞുകയറി.
ജയാരവം നിലയ്ക്കും മുന്പ് അടുത്ത ഗോളും പിറന്നു. ഇത്തവണ ഹര്മന് ജ്യോത് ഖബ്രയുടെ തലയില്നിന്ന്. 40 ാം മിനിറ്റില് ബ്ലാസ്റ്റേഴ്സിന് അനുകൂലമായി ലഭിച്ച കോര്ണറില്നിന്നായിരുന്നു ഗോള്. ലൂണയുടെ കോര്ണര് ഒന്നാം പോസ്റ്റിലേക്ക് ഓടിയെത്തിയ ഖബ്ര തലകൊണ്ട് ചെത്തി മറിച്ചു. സ്ഥാനം തെറ്റിനിന്ന ഒഡീഷ കീപ്പറുടെ കൈയില് തട്ടി ഗോളിലേക്ക്.
കളിയില് ഉടനീളം ബ്ലാസ്റ്റേഴ്സ് ആധിപത്യം സ്ഥാപിച്ചെങ്കിലും രണ്ടാം പകുതിയില് രണ്ട് ഗോള് ലീഡിന്റെ ആലസ്യത്തില് ഒഴുക്ക് കൈവിട്ടു. ആദ്യ പകുതിയിലാവട്ടെ ഒന്നാന്തരമായി കളിച്ചിട്ടും മുന്നേറ്റ നിരയ്ക്കു ലക്ഷ്യം കാണാനിയില്ല. സഹല് തളകയിലെന്നവണ്ണം ലഭിച്ച മൂന്നിലേറെ അവസരങ്ങളാണ് പാഴാക്കിയത്. മറുവശത്ത് ഒഡീഷ പോസ്റ്റിലേക്ക് ഉന്നംവച്ചതുപോലും വല്ലപ്പോഴുമായിരുന്നു ആദ്യപാദ മത്സരത്തില് ബ്ലാസ്റ്റേഴ്സ് ഒന്നിനെതിരേ രണ്ടുഗോളുകള്ക്ക് ഒഡീഷയെ തകര്ത്തിരുന്നു.
"
https://www.facebook.com/Malayalivartha
