ലോക ബാഡ്മിന്റന്‍ ചാംപ്യന്‍ഷിപ്പില്‍ സായ്പ്രണീതിന് വെങ്കലം, സിന്ധു മൂന്നാം തവണയും ഫൈനലില്‍
സ്വിറ്റ്‌സര്‍ലന്‍ഡിലെ ബാസലില്‍ നടക്കുന്ന ലോക ബാഡ്മിന്റന്‍ ചാംപ്യന്‍ഷിപ്പില്‍ ചരിത്രം കുറിച്ച് വനിതാ വിഭാഗത്തില്‍ ഇന്ത്യന്‍ താരം പി.വി. സിന്ധുവിന് തുടര്‍ച്ചയായ മൂന്നാം ഫൈനല്‍. ഇന്നു നടന്ന സെമി പോരാട്ടത്തില്‍ ചൈനീസ് താരം ചെന്‍ യു ഫെയിയെ നേരിട്ടുള്ള ഗെയിമുകളില്‍ തകര്‍ത്താണ് സിന്ധുവിന്റെ ഫൈനല്‍ പ്രവേശം. സ്‌കോര്‍: 21-7, 21-14. സ്‌കോര്‍ നില സൂചിപ്പിക്കും പോലെ തീര്‍ത്തും ഏകപക്ഷീയമായി മാറിയ സെമി പോരാട്ടം 40 മിനിറ്റു മാത്രമാണ് നീണ്ടത്. ലോക റാങ്കിങ്ങില്‍ അഞ്ചാമതുള്ള സിന്ധു പരാജയപ്പെടുത്തിയ ചെന്‍ യു ഫെയ് റാങ്കിംഗില്‍ മൂന്നാം സ്ഥാനത്തുള്ളയാളാണ്.
ലോക ചാംപ്യന്‍ഷിപ്പില്‍ തുടര്‍ച്ചയായി മൂന്നു തവണ ഫൈനലില്‍ കടക്കുന്ന മൂന്നാമത്തെ മാത്രം വനിതാ താരമാണ് സിന്ധു. കഴിഞ്ഞ രണ്ടു വര്‍ഷവും സിന്ധു ലോക ചാംപ്യന്‍ഷിപ്പ് ഫൈനലില്‍ കടന്നെങ്കിലും കലാപ്പോരില്‍ തോറ്റ് വെള്ളിയില്‍ ഒതുങ്ങുകയായിരുന്നു. ഇതിനു പുറമെ ലോക ചാംപ്യന്‍ഷിപ്പില്‍ രണ്ടു വെങ്കല മെഡലുകളും സിന്ധുവിന്റെ പേരിലുണ്ട്. നേരത്തെ, ചൈനീസ് തായ്‌പേയിയുടെ തായ് യസു യിങ്ങിനെ ഒന്നിനെതിരെ രണ്ടു ഗെയിമുകള്‍ക്കു മറികടന്നാണ് സിന്ധു സെമിയിലെത്തിയത്. 12-21, 23-21, 21-19 എന്ന സ്‌കോറിലായിരുന്നു ക്വാര്‍ട്ടറിലെ ജയം.
അതേസമയം, 36 വര്‍ഷത്തെ ഇടവേളയ്ക്കു ശേഷം ലോക ചാംപ്യന്‍ഷിപ്പ് സെമിയില്‍ കടക്കുന്ന ആദ്യ ഇന്ത്യന്‍ താരമെന്ന നേട്ടം സ്വന്തമാക്കിയ ബി.സായ്പ്രണീതിന്റെ സ്വപ്നക്കുതിപ്പിന് സെമിയില്‍ വിരാമമായി.
ലോക ഒന്നാം നമ്പര്‍ താരം ജപ്പാന്റെ കെന്റോ മൊമോറ്റയാണ് നേരിട്ടുള്ള ഗെയിമുകള്‍ക്ക് സായ്പ്രണീതിനെ തോല്‍പ്പിച്ചു. സ്‌കോര്‍: 13-21, 8-21. ഇതോടെ സായ്പ്രണീതിന് വെങ്കലം ലഭിച്ചു. 1983-ല്‍ പ്രകാശ് പദുക്കോണിനുശേഷം ലോക ചാംപ്യന്‍ഷിപ്പ് പുരുഷവിഭാഗത്തില്‍ മെഡല്‍ നേടുന്ന ആദ്യ ഇന്ത്യക്കാരനാണ് സായ്പ്രണീത്.
https://www.facebook.com/Malayalivartha
