ടെന്നീസ് താരം ജോക്കോവിച്ചിനും ഭാര്യയ്ക്കും കോവിഡ്
താനും ഭാര്യയും രോഗബാധിതരായെന്ന് ലോക ഒന്നാം നമ്പര് ടെന്നീസ് താരം സെര്ബിയയുടെ നൊവാക് ജോകോവിച്ച് വാര്ത്താക്കുറിപ്പിലൂടെ അറിയിച്ചു. മക്കളുടെ ഫലം നെഗറ്റീവാണെന്നും മുപ്പത്തിമൂന്നുകാരനായ താരം അറിയിച്ചു.
ജ്യോക്കോവിച്ച് മുന്കൈയെടുത്തു ബാള്ക്കന് മേഖലയില് സംഘടിപ്പിച്ച അഡ്രിയ ടൂര് പ്രദര്ശന ടൂര്ണമെന്റില് പങ്കെടുത്ത ടെന്നീസ് താരങ്ങളില് ചിലര് കോവിഡ് പോസിറ്റീവായതിന്റെ പേരില് പഴികേട്ടതിനു പിന്നാലെയാണു സെര്ബിയന് താരവും വൈറസ് ബാധിതനായത്.
സാമൂഹിക അകലം അടക്കം കോവിഡ് ചട്ടങ്ങളൊന്നും പാലിക്കാതെ ടൂര്ണമെന്റ് സംഘടിപ്പിച്ചതില് വിവിധ കോണുകളില്നിന്നും ടെന്നീസ് താരങ്ങളില്നിന്നുംതന്നെ വിമര്ശനം ഉയര്ന്നിരുന്നു. ക്രൊയേഷ്യയുടെ ബോര്ണ കോറിക്, ബള്ഗേറിയയുടെ ഗ്രിഗര് ദിമിത്രോവ്, വിക്ടര് ട്രോയ്ക്കി എന്നിവര്ക്കുപിന്നാലെ രോഗബാധിതനായ നാലാമത്തെ പ്രമുഖ ടെന്നീസ് താരമാണു ജോക്കോവിച്ച്. ഇതില് കോറിക്, ദിമിത്രോവ് എന്നിവര് അഡ്രിയ ടൂറില് പങ്കെടുത്തിരുന്നു.
പ്രദര്ശന ടൂര്ണമെന്റിനു ശേഷം ബല്ഗ്രേഡില് മടങ്ങിയെത്തിയതിനുപിന്നാലെ നടത്തിയ കോവിഡ് പരിശോധനയുടെ ഫലം ലഭിച്ചപ്പോഴാണ് ജോക്കോവിച്ചും ഭാര്യയും പോസിറ്റീവാണെന്നു വ്യക്തമായത്. ഇരുവര്ക്കും പ്രത്യേകിച്ചു ലക്ഷണങ്ങളൊന്നും ഉണ്ടായിരുന്നില്ല. ടൂര്ണമെന്റില് പങ്കെടുത്തവര്ക്കു കോവിഡ് സ്ഥിരീകരിച്ചതില് ഖേദം പ്രകടിപ്പിച്ച താരം ആരുടെയും ആരോഗ്യനില വഷളാകാതിരിക്കട്ടെയെന്ന് ആശംസിക്കാനും മറന്നില്ല.
ബല്ഗ്രേഡില് നടന്ന പ്രാഥമിക ഘട്ടത്തില് കളിക്കാര് അടുത്തിടപഴകുന്നതിന്റെ ദൃശ്യങ്ങള് പുറത്തുവന്നിരുന്നു. ഒരുമിച്ചു ബാസ്കറ്റ്ബോള് കളിക്കുകയും പത്രസമ്മേളനത്തില് പങ്കെടുക്കുകയും ചിത്രങ്ങള്ക്കു പോസ് ചെയ്യുന്നതും പതിവായിരുന്നു.
കോവിഡില് കുടുങ്ങി കായികമത്സരങ്ങളും ടൂര്ണമെന്റുകളും നിര്ത്തിവച്ചതോടെ സാമ്പത്തിക ബുദ്ധിമുട്ടിലായ താരങ്ങളെ സഹായിക്കാനാണു ജോക്കോവിച്ചിന്റെ നേതൃത്വത്തില് പ്രദര്ശന ടൂര്ണമെന്റ് സംഘടിപ്പിച്ചത്. ജോക്കോവിച്ചിന്റെ സഹോദരനായിരുന്നു പരിപാടിയുടെ ഡയറക്ടര്മാരില് ഒരാള്.
പരിപാടിയില് പങ്കെടുത്ത ജോക്കോവിച്ച് മറ്റു താരങ്ങള്ക്കൊപ്പം നൃത്തം ചെയ്യുന്നതിന്റെയടക്കമുള്ള ദൃശ്യങ്ങള് സാമൂഹിക മാധ്യമങ്ങളില് വൈറലായിരുന്നു. സംഭവം വിവാദമായതോടെ അഡ്രിയ ടൂറിന്റെ തുടര്പരിപാടികള് റദ്ദാക്കിയതായി ഭാരവാഹികള് അറിയിച്ചു. ബോസ്നിയയിലെ ബന്ജാ ലൂക്കയില് ജൂലൈ മൂന്ന്, നാല് തീയതികളിലെ പരിപാടികളും അഞ്ചിന് സാരയേവോയില് നിശ്ചയിച്ചിരുന്ന പ്രദര്ശന മത്സരവുമാണ് ഉപേക്ഷിച്ചത്.
https://www.facebook.com/Malayalivartha
