പ്രേക്ഷകര്‍ക്ക് പ്രിയപ്പെട്ടവരായി മാറിയാല്‍ തമിഴ് താരങ്ങളെ മുതിര്‍ന്ന താരങ്ങളുടെ പേര് ചേര്‍ത്ത് വിളിക്കുന്നത് സാധാരണമാണ്. വിജയ്യെ ഇളയദളപതി എന്ന് വിളിച്ചതും ഇത്തരത്തില്‍ തന്നെ. എന്നാല്‍ ഹന്‍സികയെ ചിന്ന ഖുശ്ബു എന്ന് വിളിക്കുന്നതിനെ എതിര്‍ത്ത് രംഗത്ത് വന്നിരിക്കുകയാണ് സാക്ഷാല്‍ ഖുശ്ബു.

ചിന്ന ഖുശ്ബു എന്ന പേരിലാണ് ഹന്‍സിക തമിഴകത്ത് അറിയപ്പെടുന്നത്. ഖുശ്ബുവുമായുള്ള രൂപ സാദൃശ്യമാണ് ഇങ്ങനെ വിളിക്കാന്‍ കാരണം. എന്നാല്‍ ഇനി അങ്ങനെ വിളിക്കരുതെന്നാണ് ഖുശ്ബുവിന്റെ ആവശ്യം. തമിഴ് ഓണ്‍ലൈന്‍ മാധ്യമത്തിന് നല്‍കിയ അഭിമുഖത്തിലാണ് താരം ഇക്കാര്യം വ്യക്തമാക്കിയത്.

ഹന്‍സികയ്ക്ക് അവരുടെ അമ്മ നല്ലൊരു പേരിട്ടിട്ടുണ്ട്. സുന്ദരിയായ പെണ്‍കുട്ടിയാണ്. അവളെ ഹന്‍സിക എന്ന് വിളിക്കു. അവള്‍ക്കൊരു ഐഡന്റിറ്റിയുണ്ട്. ഖുശ്ബുവിേേനേപ്പാലെ ആകണമെന്ന് കരുതിയല്ലല്ലോ സിനിമയില്‍ വന്നത്. പിന്നെ എന്തിനാണ് അവളെ ഖുശ്ബു എന്ന് വിളിക്കുന്നതെന്നും താരം ചോദിക്കുന്നു.

ചിന്ന ഖുശ്ബുവെന്ന് വിളിക്കുന്നത് തെറ്റാണ്. താന്‍ സാവിത്രിയേപ്പോലെ ഇരിക്കുന്നു എന്നതുകൊണ്ട് ചിന്ന സാവിത്രി, ചിന്ന പത്മിനി എന്നൊക്കെ വിളിച്ചാല്‍ തനിക്ക് ദേഷ്യം വരും. തനിക്കൊരു ഐഡന്റിറ്റിയുണ്ട് അത് നിലനിര്‍ത്താനാണ് താന്‍ കഷ്ടപ്പെടുന്നതെന്നും ഖുശ്ബു പറയുന്നു.

സാവിത്രി, പത്മിനി തുടങ്ങിയവരൊക്കെ വലിയ നടികളാണ്. പക്ഷെ എപ്പോഴും തന്നെ അവരുമായി താരതമ്യം ചെയ്താല്‍ തനിക്ക് ദേഷ്യം വരും. അതുപോലെ ഒന്നോ രണ്ടോ തവണയോ ഹന്‍സികയെ ചിന്ന ഖുശ്ബു എന്ന് വിളിച്ചാല്‍ കുഴപ്പിമില്ലെന്നും താരം പറഞ്ഞു.