ആത്മമിത്രത്തിന്റെ മകൻ താരരാജാവിനൊപ്പം; മോഹൻലാലിനൊപ്പം മണിയൻ പിള്ളയുടെ മകൻ പ്രധാന വേഷത്തിൽ
നടൻ മണിയൻ പിള്ള രാജുവിന്റെ മകൻ നിരഞ്ജൻ മോഹൻലാലിനൊപ്പം രഞ്ജിത്ത് സംവിധാനം ചെയ്യുന്ന ബിലാത്തിക്കഥയിൽ പ്രധാന കഥാപാത്രത്തെ അവതരിപ്പിക്കുന്നു. മോഹൻലാലിന്റെ ആത്മമിത്രമാണ് രാജു. ഇരുവരും പഴയ തിരുവനന്തപുരം കമ്പനിയാണ്. രാജുവും ലാലും നിരവധി ചിത്രങ്ങളിൽ ഒരുമിച്ച് അഭിനയിച്ചിട്ടുണ്ട്. രാജുവിന്റെ മകൻ ലാലിനൊപ്പം അഭിനയിക്കുമ്പോൾ അടുത്ത തലമുറക്കൊപ്പമാണ് ലാൽ കൈ കോർക്കുന്നതെന്ന പ്രത്യേക്തയുണ്ട്. യു.കെയിൽ നിയമവിരുദ്ധമായി താമസിക്കുന്ന ഒരാളായിട്ടാണ് നിരഞ്ജൻ ചിത്രത്തിൽ അഭിനയിക്കുന്നത്.
മേയ് 7ന് നടക്കുന്ന അമ്മയുടെ സ്റ്റേജ് ഷോയിൽ പങ്കെടുത്ത ശേഷമാണ് ലാൽ ലണ്ടനിലേക്ക് പറക്കുന്നത്. ബിലാത്തി കഥയുടെ ഭൂരിഭാഗം രംഗങ്ങളും ചിത്രീകരിക്കുന്നത് ലണ്ടനിലാണ്. ലോഹം എന്ന ചിത്രത്തിലാണ് ഇതിനു മുമ്പ് രഞ്ജിത്തും ലാലും ഒരുമിച്ചത്. സംവിധായകരായ ജോണി ആന്റണിയും ശ്യാമപ്രസാദും ബിലാത്തി കഥയിൽ അഭിനയിക്കുന്നു എന്ന പ്രത്യേക്തയും ഉണ്ട്.
45 ദിവസത്തെ ഡേറ്റാണ് ബിലാത്തിക്കഥക്ക് മോഹൻലാൽ നൽകിയിരിക്കുന്നത്. ഒടിയന്റെ ചിത്രീകരണം പൂർത്തിയായതോടെ അമ്മയുടെ സ്റ്റേജ് ഷോയിൽ ലാൽ പങ്കെടുക്കും. ബിലാത്തികഥയുടെ ചിത്രീകരണത്തിനിടയിൽ ഓസ്ട്രേലിയയിൽ നടക്കുന്ന സ്റ്റേജ് ഷോയിലും ലാൽ പങ്കെടുക്കും.
നീരാളിയാണ് അടുത്തതായി റിലീസ് ചെയ്യാൻ പോകുന്ന മോഹൻലാൽ ചിത്രം. ജൂലൈയിൽ ചിത്രം റിലീസാകും. ഒടിയൻ ഓണത്തിനും. രണ്ട് ചിത്രങ്ങളും വൻ സംഭവങ്ങളായി മാറാൻ തന്നെയാണ് സാധ്യത.
മോഹൻലാലും രഞ്ജിത്തും തമ്മിലുള്ള ബന്ധത്തിന് വർഷങ്ങളുടെ പഴക്കമുണ്ട്. രാവണ പ്രഭു, ആറാം തമ്പുരാൻ, ദേവാസുരം, സ്പിരിറ്റ് തുടങ്ങിയ രഞ്ജിത്ത് - മോഹൻലാൽ ചിത്രങ്ങൾ ചരിത്രത്തിന്റെ ഏടുകളിലുണ്ട്. സാമൂഹ്യ പ്രതിബദ്ധതയുള്ള ചിത്രങ്ങളുടെ സംവിധായകനാണ് രഞ്ജിത്ത്. ഒടുവിൽ ഇറങ്ങിയ പുത്തൻ പണം സാമൂഹ്യ പ്രതിബദ്ധതയുള്ള ചിത്രമായിരുന്നു. രഞ്ജിത്തിന്റെ സിനിമയിൽ ലാൽ അഭിനയിക്കുന്നത് പ്രേക്ഷകർ കാത്തിരിക്കാറുണ്ട്. രഞ്ജിത്ത് ചിത്രങ്ങളുടെ പ്രതിബദ്ധത തന്നെയാണ് കാരണം. അദ്ദേഹത്തിന്റെ ചിത്രങ്ങൾ കണ്ടിറങ്ങുമ്പോൾ ഒരു സന്ദേശം ലഭിക്കും എന്നതാണ് കാരണം.
https://www.facebook.com/Malayalivartha