ബ്രിട്ടിഷ് പാര്ലമെന്റിനു നേരെ ഭീകരാക്രമണം; ഒരു സ്ത്രീയുള്പ്പെടെ 5 പേര് കൊല്ലപ്പെട്ടു; നാല്പത്തോളം പേര്ക്ക് പരുക്ക്, അക്രമിയെ വെടിവച്ചുകൊന്നു
ബ്രിട്ടനെ നടുക്കി പാര്ലമെന്റിനു നേരെയുണ്ടായ ഭീകരാക്രമണത്തില് അക്രമിയുള്പ്പെടെ അഞ്ചു പേര് കൊല്ലപ്പെട്ടു. നാല്പ്പതോളം പേര്ക്ക് പരുക്കേറ്റു. ഇന്നലെ വൈകുന്നേരം വെസ്റ്റ്മിനിസ്റ്ററിലെ പാര്ലമെന്റ് മന്ദിരത്തിനു നേരെയാണ് ആക്രമണം ഉണ്ടായത്. സുരക്ഷാ ഡ്യൂട്ടിയിലുണ്ടായിരുന്ന പൊലീസ് ഉദ്യോഗസ്ഥനും അക്രമിയെത്തിയതെന്നു കരുതുന്ന കാര് ഇടിച്ചു പരിക്കേറ്റ മൂന്നു വഴിയാത്രികരുമാണ് കൊല്ലപ്പെട്ടത്. ഇതില് ഒരാള് സ്ത്രീയാണ്. പൊലീസ് വെടിവച്ചുവീഴ്ത്തിയ അക്രമി കസ്റ്റഡിയിലിരിക്കെ ആശുപത്രിയിലാണ് മരിച്ചത്.
ഇന്നലെ വൈകിട്ട് 2.40നായിരുന്നു അക്രമങ്ങളുടെ തുടക്കം. അമിതവേഗതയില് ഓടിച്ചുവന്ന ഒരു കാര് പാര്ലമെന്റ് മന്ദിരത്തിനു തൊട്ടടുത്തുള്ള വെസ്റ്റ്മിനിസ്റ്റര് ബ്രിഡ്ജിലെ ഫുട്പാത്തിലൂടെ നടക്കുകയായിരുന്ന നിരവധിപേരെ ഇടിച്ചിട്ടശേഷം പാര്ലമെന്റ് മന്ദിരത്തിന്റെ കമ്പിവേലിയിലേക്ക് ഇടിച്ചുകയറ്റി. പിന്നീട് കാറില്നിന്നിറങ്ങി മന്ദിരത്തിലേക്ക് ഓടിക്കയറാന് ശ്രമിച്ച അക്രമിയെ തടഞ്ഞ പൊലീസുകാരനെ ഇയാള് കഠാരകൊണ്ട് കുത്തിവീഴ്ത്തുകയായിരുന്നു. മറ്റൊരു പൊലീസുകാരനുനേരെ പാഞ്ഞടുത്ത അക്രമിയെ അദ്ദേഹം വെടിവച്ചുവീഴ്ത്തി. നാലു വെടിയൊച്ചകള് കേട്ടതായി സ്ഥലത്തുണ്ടായിരുന്നവര് പറയുന്നു.
സംഭവത്തെ തുടര്ന്നുണ്ടായ തിക്കലും തിരക്കിലുംപെട്ടും ഏതാനുംപേര്ക്ക് പരുക്കുണ്ട്. പാര്ലമെന്റിന്റെ ഇരുസഭകളും സമ്മേളിക്കുന്നതിനിടെയായിരുന്നു ആക്രമണം. പ്രധാനമന്ത്രി തെരേസ മേയും മന്ത്രിമാരും ഉള്പ്പെടെ ഭൂരിഭാഗം എംപിമാരും പാര്ലമെന്റിനുള്ളില് ഉണ്ടായിരുന്നു. ഓഫിസിലുണ്ടായിരുന്ന പ്രധാനമന്ത്രി തെരേസ മേയെ ഉടന് സുരക്ഷിതമായി ഔദ്യോഗിക വസതിയിലേക്ക് മാറ്റി. മറ്റുള്ളവരെ ഏറെനേരം അവിടെത്തന്നെ സുരക്ഷിതമായി സംരക്ഷിച്ചശേഷം നാലുമണിയോടെ കനത്ത സുരക്ഷാവലയത്തില് പുറത്തിറക്കി.
എംപിമാര്ക്കുപുറമേ ഉദ്യോഗസ്ഥരും ജീവനക്കാരുമായി ഇരുന്നൂറോളം പേരും ഈ സമയം പാര്ലമെന്റ് മന്ദിരത്തില് ഉണ്ടായിരുന്നു. പാര്ലമെന്റും പരിസരപ്രദേശങ്ങളുമെല്ലാം ഇപ്പോഴും സായുധ പൊലീസിന്റെ നിയന്ത്രണത്തിലാണ്. ലണ്ടന് നഗരത്തിലെങ്ങും കനത്ത സുരക്ഷാക്രമീകരണങ്ങള് ഒരുക്കിയിട്ടുണ്ട്. അക്രമിയോടൊപ്പം കൂടുതല് പേരുണ്ടോ എന്നറിയാനും ഇയാളുടെ വിശദാംശങ്ങള് കണ്ടെത്താനുമുള്ള അന്വേഷണങ്ങള് തുടരുകയാണ്. സംഭവം നടന്നയുടന്, സമ്മേളനത്തിലായിരുന്ന ഹൗസ് ഓഫ് കോമണ്സിന്റെ നടപടികള് നിര്ത്തിവച്ച ഡെപ്യൂട്ടി സ്പീക്കര് അംഗങ്ങളോട് അവിടെത്തന്നെ തുടരാന് നിര്ദേശിച്ചു.
പാര്ലമെന്റിനു മുന്നിലൂടെയുള്ള റോഡുകളിലെ ഗതാഗതവും നിരോധിച്ചു. എംപിമാരും മന്ത്രിമാരും പാര്ലമെന്റിനുള്ളിലേക്ക് കടക്കുന്ന പ്രവേശന കവാടത്തിനു കാവല്നിന്ന പൊലീസുകാരനെയാണ് അക്രമി കുത്തിയത്. ഉള്ളിലേക്ക് പാഞ്ഞുകയറാനുള്ള ശ്രമം തടഞ്ഞപ്പോഴായിരുന്നു ഇത്. പൊലീസുകാരനെ കുത്തിയ ഉടനെ അടുത്തുണ്ടായിരുന്ന മറ്റ് സുരക്ഷാ ഉദ്യോഗസ്ഥര് അക്രമിക്കു നേരേ നിറയൊഴിക്കുകയായിരുന്നു.
അപ്രതീക്ഷിതമായ ആക്രമണത്തെത്തുടര്ന്ന് സെന്ട്രല് ലണ്ടന് അക്ഷരാര്ഥത്തില് നിശ്ചലമായി. ലണ്ടന് ഐ ഉള്പ്പെടെ പാര്ലമെന്റിനു സമീപമുള്ള വിനോദോപാധികളെല്ലാം നിര്ത്തിവച്ചു. തെയിംസിലൂടെയുള്ള ബോട്ട് ഗതാഗതം പൊലീസ് തടഞ്ഞു. കാറിടിച്ചു തെറിപ്പിച്ച സ്ത്രീകളിലൊരാള് തെയിംസ് നദിയിലേക്ക് തെറിച്ചുവീണെങ്കിലും ഇവരെ പരിക്കുകളോടെ രക്ഷപ്പെടുത്തി. ഓരോ നിമിഷവും നൂറുകണക്കിനാളുകള് കടന്നുപോകുന്ന വെസ്റ്റ്മിനിസ്റ്ററില് പൊടുന്നനെയുണ്ടായ ആക്രമണത്തില് രാജ്യം അക്ഷരാര്ഥത്തില് ഞെട്ടിത്തരിച്ചു. എന്നാല് പാര്ലമെന്റിനുള്ളില് കടക്കാന് അനുവദിക്കാതെ അക്രമിയെ വെടിവച്ചുവീഴ്ത്തിയ പൊലീസിന്റെ നടപടി ഏറെ പ്രശംസനീയവുമായി.
https://www.facebook.com/Malayalivartha