സ്വന്തം ആണവപരീക്ഷണശാല തകര്‍ത്ത് ഉത്തരകൊറിയ ; മാധ്യമപ്രവര്‍ത്തകരെ സാക്ഷി നിര്‍ത്തിയുള്ള നടപടി അമേരിക്കന്‍ പ്രസിഡന്റ് ഡോണള്‍ഡ് ട്രംപുമായുള്ള കൂടികാഴ്ച്ചയ്ക്ക് മുന്നോടിയായി
സ്വന്തം ആണവപരീക്ഷണശാല തകര്‍ത്ത് ഉത്തരകൊറിയ. അമേരിക്കന്‍ പ്രസിഡന്റ് ഡോണള്‍ഡ് ട്രംപുമായി ഉത്തരകൊറിയന്‍ ഏകാധിപതി കിം ജോങ് ഉന്‍ കൂടികാഴ്ച നടത്തുന്നതിന് മുന്നോടിയായാണ് കൊറിയയുടെ നടപടി. ക്ഷണിക്കപ്പെട്ട മാധ്യമപ്രവര്‍ത്തകരെ സാക്ഷി നിര്‍ത്തിയാണ് ഉത്തരകൊറിയ ആണവപരീക്ഷണശാല തകര്‍ത്തത്.
12 മണിക്കൂര്‍ യാത്രക്ക് ശേഷം തങ്ങളെ പഗ്ഗി റേയിലെത്തിച്ച ശേഷം ആണവപരീക്ഷണശാല ഉത്തരകൊറിയ തകര്‍ക്കുകയായിരുന്നുവെന്ന് സംഭവത്തിന് ദൃസാക്ഷികളായ മാധ്യമ പ്രവര്‍ത്തകര്‍ അറിയിച്ചു. വലിയ ഒരു ശബ്ദം തങ്ങള്‍ക്ക് അവിടെ കേള്‍ക്കാന്‍ കഴിഞ്ഞുവെന്ന് അവര്‍ പ്രതികരിച്ചു. പ്രദേശത്ത് ഉത്തരകൊറിയ ആണവ പരീക്ഷണം നടത്തിയിരുന്ന ടണലില്‍ നിന്ന് 500 മീറ്റര്‍ അകലെയാണ് തങ്ങള്‍ നിന്നിരുന്നതെന്നും മാധ്യമ പ്രവര്‍ത്തകര്‍ പറഞ്ഞു.
അമേരിക്കന്‍ വൈസ് പ്രസിഡന്റ് മൈക്ക് പെന്‍സിനെ വിമര്‍ശിച്ച്‌ ഉത്തരകൊറിയ രംഗത്തെത്തിയതിന് പിന്നാലെയാണ് ആണവപരീക്ഷണശാല തകര്‍ത്തുവെന്ന വാര്‍ത്തകളും പുറത്ത് വരുന്നത്. അമേരിക്കയെ അനുസരിച്ചില്ലെങ്കില്‍ ഉത്തരകൊറിയക്ക് ലിബിയയുടെ ഗതി വരുമെന്ന പെന്‍സിെന്‍റ പ്രസ്താവനയാണ് കൊറിയയെ പ്രകോപിച്ചത്.
https://www.facebook.com/Malayalivartha
