കാമുകന്റെ വ്യത്യസ്ത പണി കൊടുക്കൽ ബോംബായി പൊട്ടി.വിവാഹാഭ്യർത്ഥന നിരസിച്ചതിന്റെ പേരിലായിരുന്നു കാമുകിക്കെതിരെ യുവാവിന്റെ പ്രതികാര നടപടി. പ്രതികാരം മൂത്ത് യുവതി ബോംബുമായി വിമാനത്താവളത്തിൽ എത്തിയിട്ടുണ്ടെന്ന് പൊലീസിനെ വിവരമറിയിച്ചു. തുടർന്ന് നടത്തിയ അന്വേഷണത്തിൽ വിവരം വ്യാജമാണെന്ന് തെളിഞ്ഞതോടെ കാമുകൻ അറസ്റ്റിലുമായി.

മുബൈ സ്വദേശിയായ കുത്തബ്ദീന്‍ ഹത്തിംബായി ഷായിവാല എന്ന 28കാരനാണ് അറസ്റ്റിലായത്. സംഭത്തെക്കുറിച്ച് പൊലീസ് പറുന്നതിങ്ങനെ- യെമനി സ്വദേശിനിയുമായി കുറച്ചു നാളായി അടുപ്പത്തിലായിരുന്നു ഷായിവാല. താൻ വളരെ ധനികനാണെന്ന വ്യാജേനയാണ് ഇയാൾ യുവതിയോട് അടുത്തത്. പിന്നീട് യുവാവ് പറഞ്ഞത് കള്ളമാണെന്നും, ഒരു കടയിലെ ജീവനക്കാരനാണ് ഷായിവാലയെന്നും മനസിലാക്കിയ യുവതി ബന്ധത്തിൽ നിന്നും പിന്മാറുകയായിരുന്നു. ഇതാണ് യുവാവിനെ ചൊടിപ്പിച്ചത്.

തന്നെ വിവാഹം കഴിച്ചില്ലെങ്കിൽ പതലതരം ബുദ്ധിമുട്ടുകൾ നേരിടേണ്ടിവരുമെന്ന് ഇയാൾ പെൺകുട്ടിയെ ഭീഷണിപ്പെടുത്തി. ഇതിന് വഴങ്ങാതെ യെമനിലേക്ക് തിരിച്ച് പോകാൻ ഒരുങ്ങവെയാണ് കാമുകിക്കെതിരെ ഷായിവാല അതിബുദ്ധി പ്രയോഗിച്ചത്. മുംബയ് ഛത്രപതി അന്താരാഷ്ട്ര വിമാനത്താവളത്തിൽ വിളിച്ച് ബോംബുമായി യെമൻ സ്വദേശിയായ യുവതി വരുമെന്ന് അറിയിച്ചു. തുടർന്ന് അധികൃതർ നടത്തിയ തിരച്ചിലിൽ സന്ദേശം വ്യാജമാണെന്ന് തെളിയുകയും ഷായിവാലയെ പിടികൂടുകയുമായിരുന്നു.