സുപ്രീംകോടതിയിലെ പ്രശ്നങ്ങള് പരിഹരിക്കാന് തുടര്ചര്ച്ച ഇന്ന്
സുപ്രീംകോടതിയിലെ പ്രശ്നങ്ങള് പരിഹരിക്കാന് ചീഫ് ജസ്റ്റിസും പ്രതിഷേധിച്ച നാല് ജഡ്ജിമാരുമായുള്ള തുടര് ചര്ച്ചകള് ഇന്നലെ നടന്നില്ല. ജസ്റ്റിസ് ജെ. ചെലമേശ്വര് അവധിയിലായിരുന്നതിനാലാണ് ചര്ച്ച മുടങ്ങിയത്. ഇന്ന് ചര്ച്ച നടക്കുമെന്നാണ് അറിയുന്നത്. ഒരു ചര്ച്ച കൊണ്ട് അവസാനിക്കുന്ന പ്രശ്നങ്ങള് അല്ല ഉന്നയിച്ചിട്ടുള്ളതെന്നും തുടര് ചര്ച്ചകള് വേണ്ടിവരുമെന്നും പ്രതിഷേധിച്ച ജഡ്ജിമാരോട് അടുപ്പമുള്ള വൃത്തങ്ങള് പറഞ്ഞു. ബുധനാഴ്ചകളില് പതിവുള്ള ജഡ്ജിമാരുടെ ഉച്ച ഊണ് സല്ക്കാരത്തിലും ജസ്റ്റിസ് ചെലമേശ്വര് പങ്കെടുത്തില്ല.
അതേസമയം, വൈകിട്ട് ജസ്റ്റിസ് രഞ്ജന് ഗോഗോയി ജസ്റ്റിസ് ചെലമേശ്വറിന്റെ വസതിയിലെത്തി ചര്ച്ച നടത്തി.കഴിഞ്ഞ വെള്ളിയാഴ്ചയാണ് പൊട്ടിത്തെറി സൃഷ്ടിച്ച് ജഡ്ജിമാര് വാര്ത്താസമ്മേളനം നടത്തിയത്. തുടര്ന്ന് പ്രശ്ന പരിഹാരത്തിന് കഴിഞ്ഞദിവസം ചീഫ് ജസ്റ്റിസും ജഡ്ജിമാരുമായി പ്രാരംഭ ചര്ച്ച നടത്തിയിരുന്നു. ചര്ച്ച ഇന്നലെ തുടരാനായിരുന്നു തീരുമാനം. എന്നാല്, പനി മൂലം ജസ്റ്റിസ് ചെലമേശ്വര് ഇന്നലെ അവധിയെടുക്കുകയായിരുന്നു. ജസ്റ്റിസുമാരായ എസ്.എ.ബോബ്ഡെ, എല്.നാഗേശ്വര റാവു, എ.കെ.ഗോയല്, യു.യു.ലളിത് എന്നിവരുടെ കോടതികളും ഇന്നലെ പ്രവര്ത്തിച്ചില്ല.
പ്രതിഷേധിച്ച മറ്റ് ജഡ്ജിമാരായ രഞ്ജന് ഗോഗോയി, മദന് ബി.ലോക്കൂര്, കര്യന്ജോസഫ് എന്നിവരുമായി ഇന്നലെ ഉച്ച സല്ക്കാരത്തില് ചീഫ് ജസ്റ്റിസ് അനൗപചാരികമായി സംസാരിച്ചതായി അറിയുന്നു. ഇത് വിശദീകരിക്കാനാണ് ജസ്റ്റിസ് ഗോയോയി ചെലമേശ്വറിന്റെ വസതിയിലെത്തിയത്. 25 മിനിട്ട് നീണ്ട കൂടിക്കാഴ്ചയില് പ്രശ്ന പരിഹാര നിര്ദ്ദേശങ്ങളും ചര്ച്ചയായി.
അതേസമയം, സി.ബി.ഐ ജഡ്ജി ലോയയുടെ ദുരൂഹ മരണത്തില് അന്വേഷണം ആവശ്യപ്പെട്ടുള്ള ഹര്ജി പരിഗണിക്കുന്നതില് നിന്ന് ജസ്റ്റിസ് അരുണ് മിശ്ര കഴിഞ്ഞദിവസം പിന്മാറിയിരുന്നു. അതുകൊണ്ട് മാത്രം പ്രശ്നങ്ങള് തീരില്ലെന്ന നിലപാടിലാണ് പ്രതിഷേധിച്ച ജഡ്ജിമാര്.
https://www.facebook.com/Malayalivartha