ചൈന പുറത്തുവിട്ട ജി ഡി പി നിരക്കുകള് ഊതിവീര്പ്പിച്ചത്; യഥാര്ത്ഥ വളര്ച്ചാ നിരക്കിനേക്കാള് 1.7 ശതമാനം കൂടുതല്
യഥാര്ത്ഥ വളര്ച്ചാ നിരക്കിനേക്കാളും ശരാശരി 1.7 ശതമാനം പോയിന്റ് അധികമായിരുന്നു ചൈന ഔദ്യോഗികമായി പുറത്തുവിട്ട ജി ഡി പി നിരക്കുകളെന്ന് പഠനം. 2008 മുതല് 2016 വരെയുള്ള കാലയളവില് പുറത്തുവിട്ട ജി ഡി പി നിരക്കുകളിലാണ് ഈ പൊരുത്തക്കേടുകള് ഉള്ളത്. ഇക്കാര്യം ശ്രദ്ധയില്പ്പെട്ട ചൈനീസ് ഗവണ്മെന്റ് ഈയിടെ നേരിട്ട് കണക്കുകള് ശേഖരിക്കാന് ആരംഭിച്ചു. 2019 മുതല് കൂടുതല് കൃത്യതയോടെയായിരിക്കും ജി ഡി പി കണക്കുകള് പ്രസിദ്ധീകരിക്കുക.
ചൈനയില് ഓരോ പ്രാദേശിക സര്ക്കാരുകള്ക്കും വളര്ച്ചാ, നിക്ഷേപ ടാര്ജറ്റുകള് ഉണ്ട്. ഈ ടാര്ജറ്റുകള് നേടിയാല് അവിടത്തെ ഉദ്യോഗസ്ഥര്ക്ക് പാരിതോഷികവും പ്രമോഷനും ലഭിക്കും. ടാര്ജറ്റ് നേടി എന്ന് തെളിയിക്കാന് അവര് ഓരോ വര്ഷവും കണക്കുകള് പെരുപ്പിച്ചു കാണിക്കാറുണ്ട്. ഇത് ചിലപ്പോള് ദേശീയ ശരാശരിയേക്കാള് 10 ശതമാനം വരെ കൂടുതലായിരിക്കും. ഇതേക്കുറിച്ച് നന്നായി അറിയാവുന്ന ചൈനയുടെ നാഷണല് ബ്യുറോ ഓഫ് സ്റ്റാറ്റിസ്റ്റിക്സ് ഈ പ്രാദേശിക കണക്കുകള് അതിനനുസരിച്ച് ക്രമീകരിക്കാറുണ്ട്. എന്നാല് 2008 മുതല് കണക്കുകള് നേരെയാക്കുന്ന പരിപാടി എന്തുകൊണ്ടോ നിര്ത്തിവെച്ചു.
ഇതോടെ ഔദ്യോഗിക റിപ്പോര്ട്ടുകളില് ശരിയായ വളര്ച്ചാ നിരക്കിനേക്കാള് ഉയര്ന്ന ജി ഡി പി നിരക്ക് ചൈന രേഖപ്പെടുത്താന് തുടങ്ങി. അതുകൊണ്ടുതന്നെയാണ് പുതുക്കിയ ജി ഡി പി നിരക്കനുസരിച്ച് ചൈനയുടെ ഇക്കണോമിക് സ്ലോ ഡൗണ് വിചാരിച്ചതിനേക്കാള് കൂടുതലാണെന്ന് കണ്ടെത്തിയതും.
https://www.facebook.com/Malayalivartha