വേനല്‍ കനത്തതോടെ സംസ്ഥാനത്ത് വൈദ്യുതി ഉപയോഗം സര്‍വ്വകാല റെക്കോര്‍ഡില്‍. റെക്കോര്‍ഡ് ഉപയോഗത്തോടൊപ്പം ഡാമുകളിലെ ജലനിരപ്പ് താഴുന്നതും ആശങ്കയുണ്ടാക്കുന്നുണ്ട്. പൊള്ളുന്ന ചൂടാണ് വൈദ്യുതി ഉപയോഗം കൂടാനുള്ള പ്രധാനകാരണം. പൊതുവേ വേനല്‍കാലത്ത് കേരളത്തില്‍ വൈദ്യുതി ഉപയോഗം കൂടുതലാണ്. ഈ വര്‍ഷം കൊടും ചൂട് അനുഭവപ്പെട്ടതോടെ വൈദ്യുതി ഉപയോഗവും ആ രീതിയില്‍ വര്‍ദ്ധിച്ചു. കെ എസ് ഇ ബിയുടെ കണക്ക് പ്രകാരം ഇന്നലെ രാവിലെ അവസാനിച്ച 24 മണിക്കൂറില്‍ വൈദ്യുതി ഉപയോഗം റെക്കോര്‍ഡ് ഭേദിച്ചു. 85.8957 ദശലക്ഷം യൂണിറ്റായിരുന്നു ഉപയോഗം. ചൊവ്വാഴ്ച ഇത് 84.2151 ദശലക്ഷം യൂണിറ്റായിരുന്നു.

സംസ്ഥാനത്ത് 26.885 ദശലക്ഷം വൈദ്യുതി ഉല്‍പാദിപ്പിച്ചപ്പോള്‍. പുറത്ത് നിന്ന് കേരളത്തിന് 59.01 ദശലക്ഷം യൂണിറ്റ് വൈദ്യുതി വാങ്ങേണ്ടി വന്നു. ഇതിലും റെക്കോര്‍ഡ് വര്‍ദ്ധനയാണുണ്ടായത്. സംസ്ഥാനത്തെ അണക്കെട്ടുകളില്‍ 1819.841 ദശലക്ഷം യൂണിറ്റ് വൈദ്യുതി ഉല്‍പാദിപ്പിക്കാനുളള ജലമാണ് അവശേഷിക്കുന്നത്.

മൂലമറ്റം പവര്‍ഹൗസില്‍ വൈദ്യുതി ഉത്പാദനം ഇന്നലെ പരമാവധിയില്‍ എത്തിയതോടെ മലങ്കര ഡാമിലേക്ക് ഒഴുകിയെത്തിയ വെള്ളത്തിന്റെ അളവ് കൂടിയിട്ടുണ്ട്. ജലനിരപ്പ് 41.98 മീറ്ററായി ഉയര്‍ന്നതോടെ വൈകുന്നേരം അഞ്ചോടെ ഡാമിന്റെ നാലാം നമ്പര്‍ ഷട്ടര്‍ 30 സെന്റിമീറ്റര്‍ ഉയര്‍ത്തി വെള്ളം തൊടുപുഴയാറിലേക്ക് ഒഴുക്കിവിട്ടു. ഡാമിന്റെ പരമാവധി സംഭരണ ശേഷി 42 മീറ്ററാണ്. ഇതേത്തുടര്‍ന്ന് തൊടുപുഴയാറില്‍ നേരിയ തോതില്‍ ജലനിരപ്പ് വര്‍ദ്ധിച്ചു. 

സംസ്ഥാനത്തുചൂട് കൂടുമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പു നല്‍കിയിരിക്കുന്ന സാഹചര്യത്തില്‍ വൈദ്യുതി ഉപയോഗവും റെക്കോര്‍ഡില്‍ത്തന്നെ തുടരാനാണ് സാധ്യത. വൈദ്യുതി ഉപയോഗം കൂടുന്നത് ഡാമുകളില്‍ ജലനിരപ്പ് വളരെ വേഗം കുറയാന്‍ കാരണമാകും. ഇടുക്കി ഡാമില്‍ സംഭരണ ശേഷിയുടെ 48ശതമാനം വെള്ളമാണ് നിലവിലുള്ളത്. മഴക്കാലം ആരംഭിക്കാന്‍ ഇനിയും രണ്ടുമാസം അവശേഷിക്കെ വൈദ്യുതി ഉത്പാദനം പ്രതിസന്ധിയിലാകുമോയെന്ന ആശങ്കയും ഉയരുന്നുണ്ട്.