ഒരു ലിറ്റര്‍ വെള്ളത്തിന് 12 രൂപയാക്കി കുറയ്ക്കാന്‍ കുപ്പിവെള്ള നിര്‍മ്മാണക്കമ്പനികളുടെ സംഘടനയായ കേരള ബോട്ടില്‍ഡ് വാട്ടര്‍ മാനുഫാക്ചറേഴ്‌സ് അസോസിയേഷന്‍ ഒരുവര്‍ഷംമുമ്പ്്് തീരുമാനിച്ചിരുന്നു. ജനങ്ങളോട് നീതിപുലര്‍ത്തണമെന്ന ആഗ്രഹത്താലായിരുന്നു കുപ്പിവെള്ളത്തിന്റെ വിലകുറയ്ക്കാന്‍ അസോസിയേഷന്‍ തീരുമാനിച്ചത്. എട്ടുരൂപ നിര്‍മാണച്ചെലവ് വരുന്ന കുപ്പിവെള്ളത്തിന് 12 രൂപയേക്കാള്‍ അധികം വില ഈടാക്കുന്നത് ന്യായീകരിക്കാനാകില്ലെന്നായിരുന്നു അസോസിയേഷന്റെ നിലപാട്. ഇക്കാര്യത്തില്‍ സര്‍ക്കാരിനെ സമീപിച്ചപ്പോള്‍ കുപ്പിവെള്ളത്തെ അവശ്യസാധനപട്ടികയില്‍ ഉള്‍പ്പെടുത്തി ലിറ്ററിന് 13 രൂപയാക്കി നിശ്ചയിച്ച് ഓര്‍ഡിനന്‍സ് ഇറക്കാമെന്ന് സര്‍ക്കാരും പറഞ്ഞിരിന്നു. 

എന്നാല്‍ വിലകുറക്കാമെന്ന്് അസോസിയേഷന്റെയും സര്‍ക്കാരിന്റെയും തീരുമാനം കടലാസില്‍ ഒതുങ്ങുമ്പോഴും ഈ കൊടും ചൂടിലും കുപ്പി വെള്ളത്തിന് 20 രൂപയാണ് ഈടാക്കുന്നത്. പിന്നീട് പലവട്ടം ഇക്കാര്യത്തിനായി സര്‍ക്കാരിനെ സമീപിച്ചെങ്കിലും തുടര്‍നടപടിയുണ്ടായിട്ടില്ലെന്നാണ് അസോസിയേഷന്‍ പറയുന്നത്. വന്‍കിട കമ്പനികളുടെ താല്പര്യ പ്രകാരം തീരുമാനം അട്ടിമറിക്കപ്പെട്ടു എന്നാണ് അസോസിയേഷന്‍ ആരോപിക്കുന്നത്.