ഇന്ത്യന്‍ സര്‍വ്വകലാശാലകളിലും കോളേജുകളിലും അസിസ്റ്റന്റ് പ്രൊഫസര്‍ കൂടാതെ/അല്ലെങ്കില്‍ ജൂനിയര്‍ റിസര്‍ച്ച് ഫെലോഷിപ്പ് (ജെആര്‍എഫ്) തസ്തികയിലേക്ക് ഇന്നലെ നടന്ന യുജിസി- നെറ്റ് പരീക്ഷ റദ്ദാക്കി കേന്ദ്ര വിദ്യാഭ്യാസ മന്ത്രാലയം. 'പരീക്ഷയുടെ സമഗ്രതയില്‍ വിട്ടുവീഴ്ച ചെയ്തിരിക്കാം' എന്ന് പറഞ്ഞാണ് പരീക്ഷ നടത്തി ഒരു ദിവസത്തിന് ശേഷം നാഷണല്‍ ടെസ്റ്റിംഗ് ഏജന്‍സി (എന്‍ടിഎ) ബുധനാഴ്ച റദ്ദാക്കാന്‍ തീരുമാനിച്ചത്.

'പരീക്ഷാ പ്രക്രിയയുടെ ഏറ്റവും ഉയര്‍ന്ന തലത്തിലുള്ള സുതാര്യതയും പവിത്രതയും ഉറപ്പാക്കുന്നതിന്, UGC-NET ജൂണ്‍ 2024 പരീക്ഷ റദ്ദാക്കാന്‍ ഇന്ത്യാ ഗവണ്‍മെന്റ് വിദ്യാഭ്യാസ മന്ത്രാലയം തീരുമാനിച്ചു. ഒരു പുതിയ പരീക്ഷ നടത്തും. അതിനായി വിവരങ്ങള്‍ പ്രത്യേകം പങ്കിടും. അതേ സമയം, വിഷയത്തില്‍ സമഗ്രമായ അന്വേഷണത്തിനായി വിഷയം സെന്‍ട്രല്‍ ബ്യൂറോ ഓഫ് ഇന്‍വെസ്റ്റിഗേഷന് (സി.ബി.ഐ.) കൈമാറുന്നു.' വിദ്യാഭ്യാസ മന്ത്രാലയം വാര്‍ത്താകുറിപ്പില്‍ പറഞ്ഞു.

'NEET (UG) പരീക്ഷ-2024 മായി ബന്ധപ്പെട്ട വിഷയത്തില്‍, ഗ്രേസ് മാര്‍ക്കുമായി ബന്ധപ്പെട്ട പ്രശ്‌നം ഇതിനകം പൂര്‍ണ്ണമായി അഭിസംബോധന ചെയ്തിട്ടുണ്ട്. പട്നയിലെ പരീക്ഷാ നടത്തിപ്പില്‍ ചില ക്രമക്കേടുകള്‍ ഉണ്ടെന്ന് ആരോപിച്ച്, ബിഹാര്‍ പോലീസിലെ സാമ്പത്തിക കുറ്റകൃത്യ വിഭാഗത്തില്‍ നിന്ന് വിശദമായ റിപ്പോര്‍ട്ട് ആവശ്യപ്പെട്ടിട്ടുണ്ട്. ഈ റിപ്പോര്‍ട്ട് ലഭിച്ചാലുടന്‍ സര്‍ക്കാര്‍ തുടര്‍നടപടി സ്വീകരിക്കും.' മന്ത്രാലയം കൂട്ടിച്ചേര്‍ത്തു.

പരീക്ഷകളുടെ പവിത്രത ഉറപ്പാക്കാനും വിദ്യാര്‍ത്ഥികളുടെ താല്‍പര്യം സംരക്ഷിക്കാനും സര്‍ക്കാര്‍ പ്രതിജ്ഞാബദ്ധമാണ്. ഈ വിഷയത്തില്‍ ഉള്‍പ്പെട്ടിരിക്കുന്ന ഏതൊരു വ്യക്തിയും/സംഘടനയും കര്‍ശനമായ നടപടി നേരിടേണ്ടിവരുമെന്ന് വിദ്യാഭ്യാസ മന്ത്രാലയം ആവര്‍ത്തിക്കുന്നു. യൂണിവേഴ്‌സിറ്റി ഗ്രാന്റ്‌സ് കമ്മീഷന് (യുജിസി) ചില നിര്‍ദേശങ്ങള്‍ ലഭിച്ചതായി എന്‍ടിഎ പറഞ്ഞു, ഇത് പരീക്ഷയുടെ സമഗ്രതയില്‍ വിട്ടുവീഴ്ച ചെയ്തിരിക്കാമെന്ന് സൂചിപ്പിക്കുന്നു. ആഭ്യന്തര മന്ത്രാലയത്തിന് കീഴിലുള്ള ഇന്ത്യന്‍ സൈബര്‍ ക്രൈം കോര്‍ഡിനേഷന്‍ സെന്ററിന്റെ (I4C) നാഷണല്‍ സൈബര്‍ ക്രൈം ത്രെറ്റ് അനലിറ്റിക്സ് യൂണിറ്റില്‍ നിന്നാണ് ഈ നിര്‍ദേശങ്ങള്‍ ലഭിച്ചിട്ടുള്ളത്. യുജിസി നെറ്റ് രാജ്യത്തെ 317 നഗരങ്ങളിലെ 1205 പരീക്ഷാ കേന്ദ്രങ്ങളിലായി 11,21,225 ഉദ്യോഗാര്‍ത്ഥികള്‍ക്കായാണ് പരീക്ഷ നടത്തിയത്.