കാര്യവട്ടത്ത് ഹോട്ടല്‍ ഉടമയുടെ വീട്ടില്‍ നിന്ന് രണ്ടുലക്ഷത്തിന്റെ ഡയമണ്ട് നെക്‌ലസും സ്വര്‍ണവും പണവും കവര്‍ന്നു. കാര്യവട്ടം അയ്യപ്പക്ഷേത്രത്തിന് സമീപം എത്‌നിക് ഫുഡ് കോര്‍ട്ട് നടത്തുന്ന കീരിക്കുഴി പാറയില്‍വീട്ടില്‍ സിറിള്‍ തോമസിന്റെ വീട്ടിലാണ് മോഷണം നടന്നത്. ഇന്ന് പുലര്‍ച്ചെയായിരുന്നു സംഭവം. രാവിലെ 6 മണിക്ക് സിറിള്‍ തോമസ് ഉറക്കമുണര്‍ന്നപ്പോള്‍ വീടിന്റെ അടുക്കള വാതില്‍ തുറന്ന് കിടക്കുന്നത് കണ്ട് സംശയം തോന്നി പരിശോധിച്ചപ്പോഴാണ് മോഷണം നടന്നതായി വ്യക്തമായത്. കിടപ്പുമുറിയിലെ അലമാരയ്ക്കുള്ളില്‍ ജ്യുവല്‍ ബോക്‌സില്‍ സൂക്ഷിച്ചിരുന്ന നാലുമാലകളും ഒരു കമ്മല്‍ സെറ്റും രണ്ടു ലക്ഷം രൂപ വിലവരുന്ന ഡയമണ്ട് നെക് ലസും 15000 രൂപയുമാണ് മോഷ്ടാക്കള്‍ അപഹരിച്ചത്.

പുലര്‍ച്ചെ നാലിനും ആറിനുമിടയ്ക്കാണ് സംഭവമെന്ന് കരുതുന്നതായി വീട്ടുകാര്‍ പൊലീസിനോട് പറഞ്ഞു. കഴക്കൂട്ടം എസ്.ഐ ശ്രീജിത്തിന്റെ നേതൃത്വത്തില്‍ പൊലീസ് സ്ഥലത്തെത്തി അന്വേഷണം ആരംഭിച്ചു. ഡോഗ് സ്‌ക്വാഡ്, ഫിംഗര്‍ പ്രിന്റ് വിദഗ്ധര്‍ എന്നിവരും സ്ഥലത്തെത്തി കൂടുതല്‍ തെളിവുകള്‍ ശേഖരിക്കും. തൊട്ടടുത്ത മൂന്നു വീടുകളില്‍ മോഷണ ശ്രമം ഉണ്ടായി. അയല്‍വാസികളായ ഫ്‌ളെഡറിക്, സെല്‍വരാജ് എന്നിവരുടെ വീടുകളിലെ കതകുകള്‍ പാര ഉപയോഗിച്ച് പൊളിച്ച നിലയിലാണ്. എന്നാല്‍ വീട്ടുകാര്‍ ഉണര്‍ന്നതിനാല്‍ മോഷ്ടാക്കള്‍ കടന്നു. മറ്റൊരു അയല്‍വാസിയായ റോക്ഷിന്റെ വീട്ടില്‍ കടക്കാനും ശ്രമിച്ചു. അവിടെയും വീട്ടുകാര്‍ ഉണര്‍ന്നതിനാല്‍ മോഷ്ടാക്കള്‍ സ്ഥലം വിടുകയായിരുന്നു. നാലു മണിയോടെയാണ് കവര്‍ച്ചാ ശ്രമം നടന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha