ബാങ്ക് ഓഫ് ബറോഡ ചീഫ് മാനേജർ, സീനിയർ മാനേജർ, മാനേജർ തസ്തികകൾ തുടങ്ങി ഒന്നിലധികം തസ്തികകളിലേക്ക് അപേക്ഷ ക്ഷണിച്ചു. ആകെ 58 ഒഴിവുകൾ ആണ് റിപ്പോർട്ട് ചെയ്തിരിക്കുന്നത്. ഇതിൽ ചീഫ് മാനേജർ തസ്തികയിൽ രണ്ട് ഒഴിവുകളാണ് ഉള്ളത്. മാനേജർ - ട്രേഡ് ഫിനാൻസ് ഓപ്പറേഷൻസിൽ 14 ഒഴിവുകളും ഉണ്ട്. മാനേജർ - ഫോറെക്‌സ് അക്വിസിഷൻ ആൻഡ് റിലേഷൻഷിപ്പിൽ 37 ഒഴിവുകളാണ് ഉള്ളത്.

സീനിയർ മാനേജർ - ഫോറെക്‌സ് അക്വിസിഷൻ ആൻഡ് റിലേഷൻഷിപ്പിൽ 5 തസ്തികകളും ഒഴിഞ്ഞ് കിടക്കുന്നു. ഒക്ടോബർ 9 വരെ അപേക്ഷിക്കാവുന്നതാണ്. bankofbaroda.bank.in എന്ന ഔദ്യോഗിക വെബ്സൈറ്റ് സന്ദർശിച്ച് ഉദ്യോഗാർത്ഥികൾക്ക് ഓൺലൈനായി അപേക്ഷിക്കാവുന്നതാണ്. വിവിധ തസ്തികകളിലേക്ക് വേണ്ട യോഗ്യതയും ശമ്പളവും അടക്കമുള്ള വിവരങ്ങൾ ഇങ്ങനെയാണ്


ചീഫ് മാനേജർ

അപേക്ഷകരുടെ പ്രായപരിധി 30 വയസിനും 40 വയസിനും ഇടയിൽ ആയിരിക്കണം. സാമ്പത്തിക ശാസ്ത്രം/കൊമേഴ്സ് എന്നിവയിൽ ബിരുദം ഉള്ളവരായിരിക്കണം അപേക്ഷകർ. CA/MBA/IIM സർട്ടിഫിക്കറ്റുകൾ അഭികാമ്യം. ബാങ്കിംഗ്/ബ്രോക്കറേജിൽ 8 വർഷത്തെ പ്രൃത്തി പരിചയവും നിക്ഷേപക ബന്ധങ്ങൾ/കോർപ്പറേറ്റ് ആശയവിനിമയം/ഗവേഷണം എന്നിവയിൽ 2 വർഷത്തെ പ്രവൃത്തി പരിചയവും വേണം. തിരഞ്ഞെടുക്കപ്പെടുന്നവർക്ക് 1,02,300-1,20,940 രൂപ വരെ പ്രതിമാസ ശമ്പളം ലഭിക്കും.

മാനേജർ - ട്രേഡ് ഫിനാൻസ് ഓപ്പറേഷൻസ്

അപേക്ഷകരുടെ പ്രായപരിധി 24 വയസിനും 34 വയസിനും ഇടയിലായിരിക്കണം. ഏതെങ്കിലും വിഷയത്തിൽ ബിരുദം ഉണ്ടായിരിക്കണം. IIBF ഫോറെക്‌സ്, CDCS, അല്ലെങ്കിൽ CITF സർട്ടിഫിക്കേഷനുകൾക്ക് മുൻഗണന ലഭിക്കും. ബാങ്കുകളിലെ ട്രേഡ് ഫിനാൻസ് പ്രവർത്തനങ്ങളിൽ 2 വർഷത്തെ പരിചയമുള്ളവരായിരിക്കണം അപേക്ഷകർ. തിരഞ്ഞെടുക്കപ്പെടുന്നവർക്ക് 64,820-93,960 രൂപ വരെ ശമ്പളം ലഭിക്കും.


മാനേജർ - ഫോറെക്‌സ് അക്വിസിഷൻ ആൻഡ് റിലേഷൻഷിപ്പ്

അപേക്ഷകരുടെ പ്രായപരിധി 26 വയസിനും 36 വയസിനും ഇടയിലായിരിക്കണം. ഏതെങ്കിലും വിഷയത്തിൽ ബിരുദം ഉണ്ടായിരിക്കണം. MBA/PGDM സർട്ടിഫിക്കേഷൻ ഉള്ളത് അഭികാമ്യം ബാങ്കുകളിൽ 2 വർഷം, ട്രേഡ് ഫിനാൻസിൽ 1 വർഷം എന്നിങ്ങനെയായി പ്രവൃത്തി പരിചയം ഉണ്ടായിരിക്കണം. ഫോറെക്‌സ് വിൽപ്പന പരിചയം അഭികാമ്യം. തിരഞ്ഞെടുക്കപ്പെടുന്നവർക്ക് 64,820-93,960 രൂപ വരെ ശമ്പളം ലഭിക്കും.


സീനിയർ മാനേജർ - ഫോറെക്‌സ് അക്വിസിഷൻ ആൻഡ് റിലേഷൻഷിപ്പ്

അപേക്ഷകരുടെ പ്രായപരിധി 29 വയസിനും 39 വയസിനും ഇടയിലായിരിക്കണം. സെയിൽസ്/മാർക്കറ്റിംഗ്/ഫിനാൻസ്/ട്രേഡ് ഫിനാൻസിൽ ബിരുദം എന്നിവയും മുഴുവൻ സമയ എംബിഎ/പിജിഡിഎം ഉള്ളവർക്കും അപേക്ഷിക്കാം. ബാങ്കിംഗിൽ 5 വർഷത്തെയും ട്രേഡ് ഫിനാൻസിൽ 3 വർഷത്തെയും പരിചയം ഉള്ളവരായിരിക്കണം. തിരഞ്ഞെടുക്കപ്പെടുന്നവർക്ക് 85,920-1,05,280 രൂപ വരെ ശമ്പളം ലഭിക്കും.

എങ്ങനെ അപേക്ഷിക്കാം?

ഔദ്യോഗിക വെബ്‌സൈറ്റ് ആയ bankofbarod-a.in സന്ദർശിക്കുക. കരിയറുകളിലേക്ക് പോയി നിലവിലെ അവസരങ്ങളിൽ ക്ലിക്കുചെയ്യുക. ആവശ്യമുള്ള പോസ്റ്റ് തിരഞ്ഞെടുത്ത് ഓൺലൈനായി അപേക്ഷിക്കുക എന്നതിൽ ക്ലിക്കുചെയ്യുക. സാധുവായ ഒരു ഇമെയിൽ ഐഡിയും മൊബൈൽ നമ്പറും ഉപയോഗിച്ച് രജിസ്റ്റർ ചെയ്യുക. വിശദാംശങ്ങൾ പൂരിപ്പിക്കുക, രേഖകൾ അപ്ലോഡ് ചെയ്ത് ഫീസ് ഓൺലൈനായി അടയ്ക്കുക