ഹയര്‍ സെക്കന്‍ഡറി പരീക്ഷയില്‍ 80.94 ശതമാനം വിജയം. പരീക്ഷയെഴുതിയ 3,61,683 വിദ്യാര്‍ഥികളില്‍ 2,92,753 പേര്‍ ഉപരിപഠനത്തിന് യോഗ്യത നേടി. 84.86 ശതമാനം പേര്‍ വിജയിച്ച കണ്ണൂരാണ് വിജയ ശതമാനത്തില്‍ ഏറ്റവും മുന്നില്‍. 72.4 ശതമാനവുമായി പത്തനംതിട്ടയാണ് ഏറ്റവും പിന്നില്‍. 125 വിദ്യാര്‍ഥികള്‍ 1200-ല്‍ 1200 മാര്‍ക്കും സ്വന്തമാക്കി. നൂറു ശതമാനം വിജയം സ്വന്തമാക്കിയത് സംസ്ഥാനത്തെ 72 വിദ്യാലയങ്ങളാണ്. 

9,870 വിദ്യാര്‍ഥികള്‍ക്ക് എല്ലാ വിഷയങ്ങള്‍ക്കും എ പ്ലസ് ലഭിച്ചു. ഇതില്‍ 6,905 പെണ്‍കുട്ടികള്‍ ഉള്ളപ്പോള്‍ ആണ്‍കുട്ടികള്‍ 2,965 മാത്രം. സയന്‍സില്‍ 8,120 പേരും ഹ്യൂമാനിറ്റീസില്‍ 364 പേരും കൊമേഴ്‌സില്‍ 1386 വിദ്യാര്‍ഥികളും എല്ലാ വിഷയത്തിനും എ പ്ലസ് ഗ്രേഡ് നേടി. 27,382 പേര്‍ എല്ലാ വിഷയങ്ങള്‍ക്കും എ ഗ്രേഡും 40,571 പേര്‍ ബി പ്ലസ് ഗ്രേഡും നേടി. 58,750 വിദ്യാര്‍ഥികള്‍ ബി ഗ്രേഡ് നേട്ടത്തിന് അര്‍ഹരായി. 
ഏറ്റവും കൂടുതല്‍ വിദ്യാര്‍ഥികളെ പരീക്ഷയ്ക്കിരുത്തി ഉന്നതവിജയത്തിന് തിരുവനന്തപുരം പട്ടം സെന്റ് മേരീസ് ഹയര്‍ സെക്കന്‍ഡറി സ്‌കൂള്‍ അര്‍ഹമായി. 826 വിദ്യാര്‍ഥികള്‍ പരീക്ഷയ്ക്കിരുന്ന പട്ടം സെന്റ് മേരീസില്‍ 93.22 ശതമാനം വിദ്യാര്‍ഥികള്‍ ഉപരിപഠനത്തിനു യോഗ്യത നേടി. 
പരീക്ഷയെഴുതിയ 1,90,536 പെണ്‍കുട്ടികളില്‍ 1,67,167 പേര്‍ ഉപരിപഠനത്തിനു യോഗ്യത നേടിയപ്പോള്‍ പരീക്ഷയ്ക്കിരുന്ന 1,71,146 ആണ്‍കുട്ടികളില്‍ 1,25,586 വിദ്യാര്‍ഥികളാണ് ഉപരിപഠന യോഗ്യത നേടിയത്. എസ്‌സി വിഭാഗത്തില്‍ 61.07 ശതമാനം പേര്‍ വിജയിച്ചപ്പോള്‍ എസ്ടി വിഭാഗത്തില്‍ 61.42 ശതമാനമാണു വിജയം. ഒഇസി വിഭാഗത്തില്‍ പരീക്ഷയ്ക്കിരുന്നതില്‍ 7.23 ശതമാനം ഉപരിപഠനത്തിനു യോഗ്യരായി.
സര്‍ക്കാര്‍ സ്‌കൂളുകളില്‍ പരീക്ഷയ്ക്കിരുന്ന 1,52,698 വിദ്യാര്‍ഥികളില്‍ 1,21,635 പേരും (79.66 %) എയ്ഡഡ് സ്‌കൂളുകളില്‍ പരീക്ഷയെഴുതിയ 1,75,572 വിദ്യാര്‍ഥികളില്‍ 1,46,094 പേരും (83.21 %) ഉപരിപഠനാര്‍ഹരായി. പഴയ സിലബസില്‍ പരീക്ഷ എഴുതിയ 22,893 വിദ്യാര്‍ഥികളില്‍ 8,339 പേര്‍ ഉപരിപഠനത്തിനു യോഗ്യത നേടി. ചീഫ് സെക്രട്ടറി എസ്.എം. വിജയാനന്ദാണ് ഫലപ്രഖ്യാപനം നടത്തിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha