ഗള്ഫ് പ്രതിസന്ധി : കേരളത്തിന് തിരിച്ചടി
സ്വദേശിവത്കരണം, സാമ്പത്തികമാന്ദ്യം എന്നിവയെ തുടര്ന്ന് ഗള്ഫ് രാഷ്ട്രങ്ങളില് ജോലി നഷ്ടപ്പെടുന്നവരുടെ എണ്ണം കൂടുന്നു. ഇത് ഏറ്റവും കൂടുതല് ബാധിക്കുന്നതു കേരളത്തിനെ ആണ്.കേരളത്തില് തന്നെ ഭൂരിപക്ഷവും മലപ്പുറം ജില്ലക്കാരാണ്.
26 ലക്ഷത്തോളം മലയാളികളാണ് ഗള്ഫ് മേഖലയില് ജോലി ചെയ്യുന്നത്. ഇതില് 10 ലക്ഷത്തോളം പേര് സൗദിയിലാണ്. സൗദിക്ക് പിറകെ ഒമാനും കുവൈത്തും സ്വദേശിവത്കരണത്തിന്റെ നടപടികള് ആരംഭിച്ചുകഴിഞ്ഞു. അഞ്ചു തൊഴിലാളികളെങ്കിലും ഉള്ള സ്ഥാപനങ്ങളില് സ്വദേശികളെ നിയമിക്കണമെന്നാണ് പുതിയ നിയമം. നിലവില് ഒന്പതു തൊഴിലാളികളെങ്കിലും ഉള്ള സ്ഥാപനങ്ങളില് മാത്രമായിരുന്നു സ്വദേശിവല്ക്കരണം ഉണ്ടായിരുന്നത്.
നിര്മാണ, ചെറുകിട വ്യാപാര മേഖലകളിലെ കൂട്ട പിരിച്ചിവിടല് ഗൗരവമായാണ് സാമ്പത്തിക ശാസ്ത്രജ്ഞര് വിലയിരുത്തുന്നത്.പൊതുമേഖലാ ബാങ്കുകളിലെ പ്രവാസി നിക്ഷേപത്തിന്റെ 25 ശതമാനവും സൗദിയില് നിന്നാണ് എത്തുന്നത്. പ്രവാസിക വരുമാനം കുറഞ്ഞാല് വ്യവസായ ,സേവന മേഖലകള്ക്കൊപ്പം റിയല്എസ്റ്റേറ്റ്,കെട്ടിടനിര്മാണ മേഖലകളും സ്തംഭിക്കും. ഇതെല്ലം കേരളത്തിന്റെ സാമ്പത്തികരംഗത്തെ ബാധിക്കും.
സൗദിയില് അടച്ചുപൂട്ടുന്ന മിക്ക കമ്പനികളിലുമുള്ള മലയാളികളുടെ എണ്ണം വളരെ കൂടുതലാണ്. സൗദിയില് പ്രതിസന്ധിയിലായ സൗദി ഓജറിന്റെ ലേബര് ക്യാമ്പില് 300ഓളം മലയാളികളുണ്ടെന്നാണ് വിവരം.
തൊഴില് നഷ്ടപ്പെട്ട് സൗദി അറേബ്യയില് ദുരിതത്തിലായ പ്രവാസി ഇന്ത്യക്കാരുടെ പ്രശ്നപരിഹാരത്തിനായി വിദേശകാര്യ സഹമന്ത്രി വി.കെ സിങ് സൗദിയിലെത്തിയിട്ടുണ്ട് . ജിദ്ദ വിമാനത്താവളത്തില് എത്തിയ മന്ത്രി സൗദി തൊഴില് മന്ത്രാലയം ഉള്പ്പെടെ വിവിധ വകുപ്പുകളിലെ ഉദ്യോഗസ്ഥരുമായി കൂടിക്കാഴ്ച നടത്തും. ലേബര് ക്യാമ്പുകളിലെത്തി തൊഴിലാളികളെയും അദ്ദേഹം കാണുന്നുണ്ട്.സൗദി അധികാരികളുമായി ചര്ച്ച നടത്തി ഇന്ത്യന് തൊഴിലാളികളുടെ തിരിച്ചുവരവിനും ശമ്പളകുടിശ്ശിക ലഭിക്കാനുമുള്ള ശ്രമങ്ങള്ക്ക് മന്ത്രി വി.കെ സിങ് നേതൃത്വം നല്കും.ശമ്പളകുടിശ്ശികയും മറ്റ് ആനുകൂല്യങ്ങളുമടക്കം ലക്ഷങ്ങള് പല തൊഴിലാളികള്ക്കും ലഭിക്കാനുണ്ട്.
സൗദിയില് മിക്ക കമ്പനികളും പൂട്ടി ഉടമകള് മുങ്ങിയിരിക്കുകയാണ്. കമ്പനിക്ക് സൗദി സര്ക്കാര് നല്കേണ്ട തുകയില് നിന്ന് തുക പിടിച്ചെടുത്ത് തൊഴിലാളികളുടെ കുടിശ്ശിക തീര്ക്കണമെന്ന് സൗദി തൊഴില് മന്ത്രാലയത്തോട് വിദേശകാര്യ മന്ത്രാലയം ആവശ്യപ്പെട്ടിട്ടുണ്ട്.
https://www.facebook.com/Malayalivartha
