പി.എസ്.സി അപേക്ഷ അയക്കുന്ന ഉദ്യോഗാര്ത്ഥികള് പരീക്ഷയെഴുതുന്നുണ്ടെന്ന് ഉറപ്പാക്കാന് പരീക്ഷാചട്ടത്തില് ഭേദഗതി വരുത്തും
പി.എസ്.സി അപേക്ഷ അയക്കുന്ന ഉദ്യോഗാര്ത്ഥികള് പരീക്ഷയെഴുതുന്നുണ്ടെന്ന് ഉറപ്പാക്കാന് പരീക്ഷാചട്ടത്തില് ഭേദഗതി വരുത്തുമെന്ന് പി.എസ്.സി ചെയര്മാന് എം.കെ.സക്കീര്. പി.എസ്.സി പരീക്ഷയില് ഉദ്യോഗാര്ഥികളുടെ എണ്ണം കുറക്കാന് കണ്ഫര്മേഷന് ലെറ്റര് സമ്പ്രദായം നടപ്പാക്കുമെന്ന് ചെയര്മാന് പറഞ്ഞു. പരീക്ഷ തീയതിക്ക് 40 ദിവസം മുമ്പ് പ്രൊഫൈലില് ഇതിനുള്ള മൊഡ്യൂള് വരും. പരീക്ഷ സംബന്ധിച്ച വിവരം അറിയിക്കാനും കൂടിയാണിത്. കണ്ഫേം ചെയ്യുന്നവര്ക്ക് മാത്രമാവും പരീക്ഷാ ഹാള് ഒരുക്കുക. അപേക്ഷിക്കുന്നവര്ക്കൊക്കെ പരീക്ഷാഹാള് ഒരുക്കുന്നരീതി അവസാനിപ്പിക്കാന് ഈ സംവിധാനം സഹായകമാവും. വര്ധിച്ച പരീക്ഷാചെലവ് കണക്കിലെടുത്താണ് ഇതെന്നും അടുത്ത യോഗത്തില് തീരുമാനമുണ്ടാകുമെന്നും അദ്ദേഹം പറഞ്ഞു.
കാലാവധി അവസാനിക്കുന്ന എല്.ഡി ക്ലര്ക്ക് റാങ്ക്പട്ടികയില് നിന്ന് മാര്ച്ച് 31 വരെ റിപ്പോര്ട്ട് ചെയ്യുന്ന ഒഴിവുകളിലേക്ക് അതില് നിന്ന് നിയമനശിപാര്ശ നല്കുമെന്നും ചെയര്മാന് അറിയിച്ചു. പുതിയ റാങ്ക്പട്ടിക ഏപ്രില് രണ്ടിന് പ്രസിദ്ധീകരിക്കും. നിലവിലെ റാങ്ക് പട്ടിക മാര്ച്ച് 30ന് മൂന്നു വര്ഷം തികയ്ക്കുമെങ്കിലും അന്ന് അവധിയായതിനാല് മാര്ച്ച് 31ന് അര്ദ്ധരാത്രി വരെ സമയം ലഭിക്കും. അതുവരെ റിപ്പോര്ട്ട് ചെയ്യുന്ന ഒഴിവുകളിലേക്ക് അതില് നിന്ന് നിയമനശിപാര്ശ നല്കും.
വനിതകള് ഉള്പ്പെടെ ഗോത്രവര്ഗക്കാരായ 100 പേര്ക്ക് പോലീസിലും എക്സൈസിലും പി.എസ്.സി വഴി സ്ഥിരം നിയമനം നല്കും. മലപ്പുറം, പാലക്കാട്, വയനാട് ജില്ലകളിലെ പ്രാക്തന ഗോത്രക്കാരായ പണിയര്, അടിയാന്, കാട്ടുനായ്ക്കന് എന്നീ വിഭാഗക്കാര്ക്കാണ് പ്രത്യേക റിക്രൂട്ട്മെന്റിലൂടെ സിവില് ഓഫീസര്മാരായി നിയമനം നല്കുന്നത്. ഗോത്രവര്ഗവനം വകുപ്പുകളുടെ സഹായത്തോടെ കാട്ടിലെത്തി ഉദ്യോഗാര്ഥികളെ തെരഞ്ഞെടുത്താണ് റാങ്ക്പട്ടിക തയാറാക്കിയത്. മൂന്ന് ജില്ലകളില് ഇതിനുള്ള 10 റാങ്ക്പട്ടികകള്ക്ക് അംഗീകാരം നല്കിയതായി എം.കെ.സക്കീര് അറിയിച്ചു. രണ്ടുദിവസത്തിനകം വെബ്സൈറ്റില് ഇവ പ്രസിദ്ധീകരിക്കും.
ഏപ്രില് ആദ്യവാരം ഉദ്യോഗാര്ത്ഥികളെ വിളിച്ചു വരുത്തി നിയമനശിപാര്ശ നേരിട്ട് കൈമാറും. പോലീസിലെയും എക്സൈസിലെയും സ്ഥിരം നിയമനത്തിന് പ്രാക്തന ഗോത്രക്കാരെ വനപ്രദേശങ്ങളിലെത്തി നേരിട്ട് തിരഞ്ഞെടുക്കുന്നത് ആദ്യമായാണെന്ന് ചെയര്മാന് പറഞ്ഞു.
യോഗ്യതകളിലും കായികപരീക്ഷയിലും ഇളവുകള് നല്കിയാണ് തെരഞ്ഞെടുപ്പ് പ്രക്രിയ പൂര്ത്തിയാക്കിയത്. ഇതിന് സംസ്ഥാന സര്ക്കാര് പ്രത്യേക ഉത്തരവ് പുറത്തിറക്കിയിരുന്നു. ഈ റാങ്ക്പട്ടികയ്ക്ക് ഒരു വര്ഷത്തെ കാലാവധിയുണ്ട്. അതിനുള്ളില് ഇവര്ക്കായി റിപ്പോര്ട്ട് ചെയ്യുന്ന ഒഴിവുകളിലേക്കും ഇതില് നിന്ന് നിയമനം നടത്തും.
https://www.facebook.com/Malayalivartha
