ബഹിരാകാശ സാങ്കേതികവിദ്യ പറഞ്ഞു തരുമോയെന്നു ചോദിച്ച് നാസയുടെ വാതിലില്‍ മുട്ടുന്ന ഇന്ത്യക്കാരന്റെ കാര്‍ട്ടൂണ്‍ ഒരിക്കല്‍ പ്രത്യക്ഷപ്പെട്ടിരുന്നു. അത് വരച്ചവര്‍ക്കെല്ലാം നല്‍കുന്ന ശക്തമായ മറുപടിയാണ് ഇന്ത്യയുടെ സ്വന്തം പോളാര്‍ സാറ്റലൈറ്റ് ലോഞ്ച് വെഹിക്കിള്‍. പി എസ്സ് എല്‍ വി-യുടെ അടുത്ത വിക്ഷേപണ തീയതിയും കാത്ത് ലോക രാജ്യങ്ങള്‍ വരിനില്‍ക്കുകയാണ്, അവരുടെ ഉപഗ്രഹങ്ങള്‍ ലക്ഷ്യത്തിലെത്തിക്കാന്‍. പിഎസ്എല്‍വി–സി 43-ല്‍ കൊളംബിയന്‍ ഉപഗ്രഹമാണ് വിക്ഷേപിച്ചതെങ്കില്‍ അടുത്ത വിക്ഷേണത്തില്‍ ബ്രസീലിന്റെ ആമസോണിയ- 1 ഉപഗ്രഹവും ഉണ്ടാകും. ഇന്ത്യക്കിത് അഭിമാന നിമിഷം തന്നെയാണ്.

2020-ല്‍ ഐഎസ്ആര്‍ഒയുടെ വാണിജ്യ വിക്ഷേപണത്തില്‍ നിരവധി രാജ്യങ്ങളുടെ ഉപഗ്രഹങ്ങള്‍ ഉണ്ടാകുമെന്നാണ് അറിയുന്നത്. ബ്രസീലിന്റെ ഉപഗ്രഹം പിഎസ്എല്‍വി വിക്ഷേപിക്കുമെന്നത് സംബന്ധിച്ച് ബ്രസീലിയന്‍ സ്‌പേസ് ഏജന്‍സി സ്ഥിരീകരിച്ചിട്ടുണ്ട്. ഭൂനിരീക്ഷണത്തിനുള്ള ഉപഗ്രഹമാണ് ആമസോണിയ-1. സൗത്ത് അമേരിക്കന്‍ രാജ്യങ്ങളെല്ലാം കുറഞ്ഞ ചെലവില്‍ ഉപഗ്രഹങ്ങള്‍ വിക്ഷേപിക്കാന്‍ ഇന്ത്യയെയാണ് സമീപിക്കുന്നത്.

നാസ, സ്‌പെയ്‌സ് എക്‌സ്, ഇഎസ്എ തുടങ്ങി ബഹിരാകാശ ഏജന്‍സികളേക്കാള്‍ കുറഞ്ഞ നിരക്കും വിശ്വാസ്യതയുമാണ് ഐഎസ്ആര്‍ഒയെ മുന്നിലെത്തിച്ചത്. 2014-ലെ ചൊവ്വാ ദൗത്യം വിജയിച്ചതോടെ ഐഎസ്ആര്‍ഒയുടെ ഗ്രേഡ് കുത്തനെ ഉയര്‍ന്നു. ഇതോടെയാണ് വിദേശ രാജ്യങ്ങള്‍ ഇന്ത്യയെ സമീപിക്കാന്‍ തുടങ്ങിയത്. തങ്ങളുടെ സ്വപ്ന പദ്ധതികള്‍ക്ക് വേണ്ട ഉപഗ്രഹങ്ങള്‍ കൃത്യമായി ലക്ഷ്യത്തിലെക്കാന്‍ ഐഎസ്‌ഐര്‍ഒയ്ക്ക് സാധിക്കുമെന്ന വിശ്വാസം വിദേശരാജ്യങ്ങള്‍ക്കിടയില്‍ സ്ഥാപിക്കാന്‍ ഇന്ത്യക്ക് സാധിച്ചു.

ഐഎസ്ആര്‍ഒ ഓരോ തവണയും വന്‍ നേട്ടങ്ങളുമായി രാജ്യാന്തര മാധ്യമങ്ങളില്‍ ഇടംപിടിക്കുകയാണ്. ഇന്ത്യന്‍ ബഹിരാകാശ മേഖലയെ പുതിയ കുതിപ്പിന് സഹായിക്കുന്നതായിരിക്കും പിഎസ്എല്‍വി സി44-ന്റെ വിക്ഷേപണം. പിഎസ്എല്‍വി സി43-ല്‍ എട്ടു രാജ്യങ്ങളുടെ 30 വിദേശ ഉപഗ്രഹങ്ങളാണ് വിക്ഷേപിച്ചതെങ്കില്‍ അടുത്തതില്‍ ഇതിലും കൂടുമെന്നാണ് കരുതുന്നത്.

ബഹിരാകാശ മേഖലയില്‍ വന്‍ മുന്നേറ്റം കൈവരിച്ചിട്ടുള്ള അമേരിക്ക, ഉപഗ്രഹങ്ങള്‍ വിക്ഷേപിക്കാന്‍ പതിവായി ഇന്ത്യയുടെ സഹായം തേടുന്നു. കഴിഞ്ഞ കുറച്ചു വര്‍ഷങ്ങളായി ചെറിയ ഉപഗ്രഹങ്ങള്‍ വിക്ഷേപിക്കാന്‍ ചെലവു കുറഞ്ഞ ഐഎസ്ആര്‍ഒയുടെ വിക്ഷേപണത്തെയാണ് അമേരിക്കന്‍ കമ്പനികളെല്ലാം പരിഗണിക്കുന്നത്.

ഇതുവരെയുള്ള കണക്കുകള്‍ പ്രകാരം 28 രാജ്യങ്ങളില്‍ നിന്നുള്ള 269 ഉപഗ്രഹങ്ങളാണ് ഇന്ത്യ വിക്ഷേപിച്ചത്. ഇതില്‍ 166 ഉപഗ്രഹങ്ങളും അമേരിക്കയില്‍ നിന്നുള്ളതായിരുന്നു. നാസയ്ക്ക് പുറമേ സ്വകാര്യ വിക്ഷേപണ കേന്ദ്രം സ്‌പെയ്‌സ് എക്‌സ് വരെ ഉണ്ടായിട്ടും ചെലവ് ചുരുക്കുന്നതിന്റെ ഭാഗമായാണ് അമേരിക്കന്‍ കമ്പനികളും ഏജന്‍സികളും ഐഎസ്ആര്‍ഒയെ പിന്തുടരുന്നത്.

അതിവേഗം മുന്നേറിക്കൊണ്ടിരിക്കുകയാണ് ഇന്ത്യയുടെ സാങ്കേതിക മേഖല. ബഹിരാകാശ രംഗത്ത് കഴിഞ്ഞ കുറച്ചു വര്‍ഷങ്ങള്‍ക്കിടെ രാജ്യം കൈവരിച്ചത് വന്‍ നേട്ടങ്ങളാണ്. രാജ്യാന്തര ബഹിരാകാശ ഏജന്‍സികള്‍ക്കൊപ്പം ഇന്ത്യയുടെ ഐഎസ്ആര്‍ഒയും അതിവേഗം കുതിക്കുകയാണ്. ഒരു റോക്കറ്റില്‍ 104 ഉപഗ്രഹങ്ങള്‍ വിക്ഷേപിച്ചപ്പോള്‍ ഇന്ത്യ ഞെട്ടിച്ചുവെന്നാണ് അമേരിക്കന്‍ പത്രങ്ങള്‍ അന്ന് റിപ്പോര്‍ട്ട് ചെയ്തത്. അമേരിക്കയുടെ ദേശീയ രഹസ്യാന്വേഷണ വിഭാഗം നോമിനി ഡാന്‍ കോട്‌സാണ് അന്ന് ഇങ്ങനെ പ്രതികരിച്ചത്.

അതെ, ഇന്ത്യ ഈ രംഗത്ത് കൂടുതല്‍ അദ്ഭുതങ്ങള്‍ പുറത്തെടുക്കാന്‍ പോകുകയാണ് എന്നതിന്റെ വ്യക്തമായ സൂചനയാണ് ഈ റെക്കോര്‍ഡ് നേട്ടങ്ങള്‍. പിഎസ്എല്‍വി റോക്കറ്റിന് 104 ഉപഗ്രഹങ്ങളല്ല വേണമെങ്കില്‍ 400 ഉപഗ്രഹങ്ങള്‍ വരെ വഹിച്ച് ലക്ഷ്യത്തിലെത്തിക്കാന്‍ ശേഷിയുണ്ടെന്നാണ് മുന്‍ ഐഎസ്ആര്‍ഒ മേധാവി ജി. മാധവന്‍നായര്‍ ഒരിക്കല്‍ പറഞ്ഞത്.