സുശാന്തിന്റെയും മുന്‍മാനേജരുടെയും മരണങ്ങള്‍ക്ക് ബന്ധമുണ്ടോ എന്ന ദിശയിലേക്ക് അന്വേഷണം വ്യാപിപ്പിക്കാന്‍ സിബിഐ
റിയ ചക്രവര്‍ത്തി മോര്‍ച്ചറിയിലെത്തി നടന്‍ സുശാന്ത് സിങ്ങിന്റെ മൃതദേഹം കണ്ടപ്പോള്‍ ദുരൂഹമായി ഒന്നും സംഭവിച്ചിട്ടില്ലെന്നും മുംബൈ പൊലീസിന് ഇക്കാര്യത്തില്‍ വീഴ്ച പറ്റിയിട്ടില്ലെന്നും മഹാരാഷ്ട്ര മനുഷ്യാവകാശ കമ്മിഷന്‍. ചില ചാനലുകളിലെ വാര്‍ത്തയെ തുടര്‍ന്ന് കമ്മിഷന്‍ സ്വമേധയാ എടുത്ത കേസില്‍ അന്വേഷണം അവസാനിപ്പിച്ചതായും വ്യക്തമാക്കി.
അതേസമയം,സുശാന്തിന്റെ മരണവും സുശാന്തിന്റെ മുന്‍ മാനേജര്‍ ദിഷ സാലിയാന്റെയും മരണവും തമ്മില്‍ ബന്ധമുണ്ടോയെന്ന ദിശയിലേക്ക് അന്വേഷണം വ്യാപിപ്പിക്കാനുള്ള നീക്കത്തിലാണ് സിബിഐ. ജൂണ്‍ എട്ടിനു ദിഷയുടെ മരണശേഷം സുശാന്ത് അസ്വസ്ഥനായിരുന്നുവെന്ന് നടനൊപ്പം താമസിച്ചിരുന്ന സുഹൃത്ത് സിദ്ധാര്‍ഥ് പിഥാനി സിബിഐയോടു പറഞ്ഞിരുന്നു. ജൂണ്‍ 14-നാണ് സുശാന്തിന്റെ മരണം. ദിഷയുടെ പ്രതിശ്രുതവരന്‍ റോഹന് റായിയെ ചോദ്യംചെയ്യാനും സാധ്യതയുണ്ട്. റോഹന് സുരക്ഷ നല്‍കണമെന്ന് അഭ്യര്‍ഥിച്ച് ബിജെപി എംഎല്‍എ നിലേഷ് റാണെ കേന്ദ്ര ആഭ്യന്തരമന്ത്രി അമിത് ഷായ്ക്ക് കത്തെഴുതി.
അതിനിടെ റിയയെ ഏതാനും ചാനലുകള്‍ 'വേട്ടയാടുന്ന'തായി ആരോപിച്ച് അതിനെതിരെയുള്ള ഒപ്പുശേഖരണത്തില്‍ മുതിര്‍ന്ന സിനിമാ പ്രവര്‍ത്തകരും അണിചേര്‍ന്നു. ചലച്ചിത്രപ്രവര്‍ത്തകരായ മീര നായര്‍, അനുരാഗ് കശ്യപ്, സോനം കപൂര്‍, ഫ്രീദ പിന്റോ, സോയ അക്തര്‍, ഫര്‍ഹാന്‍ അക്തര്‍, ദിയ മിര്‍സ എന്നിവര്‍ ഒപ്പിട്ടവരില്‍ ഉള്‍പ്പെടും.
ഇതിനിടെ, റിയ ചക്രവര്‍ത്തിക്കൊപ്പം നടി സാറ അലി ഖാനും സുശാന്തിന്റെ ഫാം ഹൗസില്‍ എത്താറുണ്ടായിരുന്നെന്ന മാനേജരുടെ വെളിപ്പെടുത്തല്‍ പുറത്തുവന്നിട്ടുണ്ട്. കഴിഞ്ഞദിവസം ഇവിടെ നര്‍കോട്ടിക്‌സ് കണ്‍ട്രോള്‍ ബ്യൂറോ (എന്‍സിബി) റെയ്ഡ് നടത്തിയിരുന്നു.
https://www.facebook.com/Malayalivartha
