നടന് സുശാന്തിന്റെ 2018-ലേതെന്ന് കരുതുന്ന കുറിപ്പുകള് ദേശീയമാധ്യമം പുറത്തുവിട്ടു
അന്തരിച്ച നടന് സുശാന്തിന്റെ 2018-ലേതെന്ന് കരുതുന്ന കുറിപ്പുകള് ഒരു ദേശീയമാധ്യമം പുറത്തുവിട്ടു. സുശാന്തിന്റെ പാവന ഫാംഹൗസില്നിന്നു കണ്ടെടുത്ത കുറിപ്പുകളില് അദ്ദേഹം ചില വേദഗീതങ്ങള് ആലപിച്ചതായും പരാമര്ശിക്കുന്നു. പുകവലിക്കില്ല എന്നെഴുതി 'ടിക്' ഇട്ടതും കുറിപ്പില് കാണാം. അടുത്ത ദിവസം കേദാര്നാഥിന്റെ തിരക്കഥ വായിക്കേണ്ടതുണ്ടെന്നും പറയുന്നു.
കുറിപ്പുകളില് നടന് പുകവലി ഉപേക്ഷിക്കാന് ശ്രമിച്ചിരുന്നതായി മനസ്സിലാക്കാന് കഴിയും. കൃതിയോടൊപ്പം സമയം ചെലവഴിക്കേണ്ടതുണ്ടെന്നും സുശാന്ത് പറയുന്നുണ്ട്. റാബ്താ എന്ന സിനിമയില് സുശാന്തിന്റെ സഹതാരമാണ് കൃതി സനോന്. ഇരുവരും തമ്മില് ബന്ധമുള്ളതായി അഭ്യൂഹമുണ്ടായിരുന്നു. സഹോദരി പ്രിയങ്കയ്ക്കും ഭര്ത്താവ് മഹേഷിനുമൊപ്പം ടൂര് പോകേണ്ടതുണ്ടെന്നും സുശാന്ത് കുറിച്ചിട്ടുണ്ട്. ലഭ്യമായ കുറിപ്പില് കാമുകി റിയ ചക്രവര്ത്തിയെക്കുറിച്ച് പരാമര്ശമില്ല. 2019-ലാണ് സുശാന്ത് റിയയെ കണ്ടുമുട്ടിയത്.
പുലര്ച്ചെ രണ്ടരയ്ക്ക് ഉണര്ന്ന്, തണുത്ത വെള്ളത്തില് കുളിച്ച്, ചായ കുടിച്ച് ദിവസം തുടങ്ങിയതും കേദാര്നാഥ് സിനിമയുടെ തിരക്കഥ വായിക്കാന് ഒരുങ്ങുന്നതുമായ നിരവധി കാര്യങ്ങളാണു കുറിപ്പുകളില് സൂചിപ്പിച്ചിട്ടുള്ളത്. 'ശരിയായ ഉത്തരം ഇല്ല, മികച്ച ചോദ്യങ്ങള് മാത്രമേയുള്ളൂ', 'പ്രശ്നം എങ്ങനെ പരിഹരിക്കാം?', 'എന്തുകൊണ്ട് സന്തോഷം?' എന്നീ വാക്യങ്ങളും അനുഭവം, വിശകലനം, ആനന്ദം, ധൈര്യം, ബ്രില്യന്സ്, ദൈവികം എന്നീ വാക്കുകളും എഴുതിയ കുറിപ്പും കണ്ടെടുത്തു.
നിതി ആയോഗ് നയങ്ങള് + ഇന്സെയ്, നാസ + സുശാന്ത് 4 എജ്യു, രൂപകങ്ങള് തുടങ്ങിയവയെക്കുറിച്ച് പറയുന്നു. വരുണ് മാത്തൂറിനൊപ്പം 2018-ല് സുശാന്ത് സ്ഥാപിച്ച കമ്പനിയാണ് ഇന്സെയ് വെന്ച്വര് പ്രൈവറ്റ് ലിമിറ്റഡ്. മൂന്നാം കണ്ണ്, കൈലാസം, തപസ്യ, യോഗ തുടങ്ങിയവയും കുറിച്ചിട്ടുണ്ട്. ചില കുറിപ്പുകള് ഹിന്ദിയിലാണ്. പ്രശസ്ത കവി കബീര്, റൂമി എന്നിവരുടേതടക്കം വിവിധ ഉദ്ധരണികള് രേഖപ്പെടുത്തിയതുമുണ്ട്.
മുംബൈ ബാന്ദ്രയിലെ വസതിയില് ഇക്കഴിഞ്ഞ ജൂണ് 14-ന് സുശാന്തിനെ മരിച്ചനിലയില് കണ്ടെത്തിയ കേസ് സിബിഐ, ഇഡി, എന്സിബി തുടങ്ങിയവര് അന്വേഷിക്കുകയാണ്.
https://www.facebook.com/Malayalivartha