ഗര്‍ഭിണിയായതിന് പിന്നാലെ സെയ്ഫ് അലീഖാനും ഭാര്യ കരീനകപൂറും ബേബിമൂണിനായി ആസ്‌ത്രേലിയയിലേക്ക് പറക്കുന്നു. ഷൂട്ടിംഗിന്റെ തിരക്കുകള്‍ കഴിഞ്ഞ്, ഡിസംബറിന് മുമ്പായാണ് യാത്ര പ്ലാന്‍ ചെയ്തിരിക്കുന്നത്. ലൊക്കേഷനിലെത്തിയാല്‍ പെട്ടെന്ന് ജോലി തീര്‍ത്ത് പോകാന്‍ സെയ്ഫ് തിടുക്കം കാട്ടുകയാണ്. കയുന്ന സമയങ്ങളിലെല്ലാം കരീനയ്‌ക്കൊപ്പം ചെലവഴിക്കുകയാണ് ലക്ഷ്യം. സോനം കപൂറാണ് പുതിയ ചിത്രത്തിലെ നായിക. സോനം ഇടയ്ക്ക് സെയ്ഫിനെ കളിയാക്കും. ഇക്കാര്യങ്ങള്‍ കരീനയെ വിളിച്ച് പറയുകയും ചെയ്യും. ബോളിവുഡില്‍ അഭിനയവും കുടുംബജീവിതവും ഒരു പോലെ കൊണ്ടുപോകുന്ന ഏക നടിയാണ് കരീന. 

വിവാഹം കഴിഞ്ഞതോടെ പലരും പറഞ്ഞിരുന്നു കരീനയുടെ കരിയര്‍ തീര്‍ന്നെന്ന്. എന്നാല്‍ വിവാഹത്തിന് മുമ്പ് ചെയ്തതിനേക്കാള്‍ നല്ല കഥാപാത്രങ്ങള്‍ അതിന് ശേഷം ലഭിച്ചു. പുതിയ ചിത്രങ്ങളിലൊന്നും താരം കരാര്‍ ചെയ്തിട്ടില്ല. മുമ്പ് പറഞ്ഞ പല ചില പ്രോജക്ടുകള്‍ ചെയ്ത് തീര്‍ക്കുന്നതിന്റെ തെരക്കിലാണ്. ആദ്യ മൂന്ന് മാസം കൂടുതല്‍ ശ്രദ്ധിക്കേണ്ടതിനാല്‍ എട്ട് മണിക്കൂറിലധികം ജോലി ചെയ്യാന്‍ കഴിയുന്നില്ല. വീരാഡി വെഡിംഗ് എന്ന ചിത്രത്തിലാണ് അഭിയിക്കുന്നത്. വിവാഹത്തിന് മുമ്പ് സെയ്ഫ് പറഞ്ഞത് ഒരിക്കലും അഭിനയം ഉപേക്ഷിക്കരുതെന്നാണ്. അത് തനിക്ക് വലിയ പ്രചോദനമാണ് നല്‍കിയതെന്നും താരം പറഞ്ഞു.
താന്‍ ഓടിനടന്ന് അഭിനയിക്കുമ്പോള്‍ ഭാര്യയെ വീട്ടില്‍ ഇരുത്തുന്നത് വളരെ സെല്‍ഫിഷ് ആണെന്നാണ് സെയ്ഫ് വിശ്വസിക്കുന്നത്. ഓരോരുത്തര്‍ക്കും അവരുടേതായ കഴിവുകളുണ്ട്. അത് വിനിയോഗിക്കണം. നമ്മള്‍ പഴയകാലത്തിലല്ലല്ലോ ജീവിക്കുന്നത്. ഭാര്യയും ഭര്‍ത്താവും ജോലി ചെയ്താലേ ഇന്ന് ഒരു സാധാരണ കുടുംബത്തിന് പോലും കഴിയാനാകൂ. പണം മാത്രമല്ല കരീനയെ അഭിനയിക്കാന്‍ വിടുന്നതിന്റെ ലക്ഷ്യം. അവളുടെ കരിയര്‍, ലക്ഷ്യം, സന്തോഷം എല്ലാത്തിനും പ്രാധ്യാനം നല്‍കുന്നുണ്ട്. അതുകൊണ്ടാണ് ഇങ്ങിനെയൊരു തീരുമാനം എടുത്തത്.