സല്‍മാന്‍ ഖാന്റെ വീടിന് നേരെ വെടിവെപ്പ് നടത്തിയ പ്രതി കീഴടങ്ങാന്‍ അനുമതിതേടി കോടതിയില്‍
ബോളിവുഡ് നടന്‍ സല്‍മാന്‍ ഖാന്റെ ബാന്ദ്രയിലെ വീടായ ഗാലക്‌സി അപ്പാര്‍ട്ട്‌മെന്റിനുനേരേയുണ്ടായ വെടിവെപ്പുകേസില്‍ പ്രതിയായ അന്‍മോള്‍ ബിഷ്‌ണോയി കോടതിയില്‍ കീഴടങ്ങാന്‍ അനുമതിതേടി. 2024 ഏപ്രിലിലാണ് സല്‍മാന്‍ ഖാന്റെ വീടിനുനേരേ ബൈക്കിലെത്തിയ അക്രമികള്‍ വെടിയുതിര്‍ത്തത്. നിലവില്‍ മറ്റൊരു കേസുമായി ബന്ധപ്പെട്ട് ഡല്‍ഹിയിലെ തിഹാര്‍ ജയിലില്‍ കഴിയുന്ന ഇയാള്‍, വിചാരണയില്‍ നേരിട്ട് പങ്കെടുക്കണമെന്നും നീതിപൂര്‍വമായ വിചാരണ ഉറപ്പാക്കാന്‍ താന്‍ തയ്യാറാണെന്നും കാണിച്ചാണ് മുംബൈയിലെ പ്രത്യേക മക്കോക്ക കോടതിയെ സമീപിച്ചത്.
സംഭവത്തിനുശേഷം വിദേശത്തേക്കുകടന്ന ഇയാളെ 2025 നവംബറിലാണ് ഇന്ത്യയില്‍ തിരിച്ചെത്തിച്ചത്. തുടര്‍ന്ന് എന്‍.ഐ.എ. ഇയാളെ അറസ്റ്റുചെയ്തു. ജയിലിലായതിനാല്‍ തനിക്ക് മുംബൈ കോടതിയില്‍ നേരിട്ട് ഹാജരാകാന്‍ കഴിയില്ലെന്നും വീഡിയോ കോണ്‍ഫറന്‍സിങ് വഴിയോ അല്ലെങ്കില്‍ കോടതിയുടെ പ്രത്യേക ഉത്തരവുപ്രകാരമോ കീഴടങ്ങാന്‍ അവസരം നല്‍കണമെന്നുമാണ് ഇയാളുടെ ആവശ്യം.
ഈ കേസിലെ വിചാരണ ഇപ്പോള്‍ പുരോഗമിക്കുകയാണ്. ഇതിനകംതന്നെ പ്രോസിക്യൂഷന്‍ സാക്ഷികളില്‍ ചിലരുടെ മൊഴികള്‍ അന്‍മോളിന്റെ സാന്നിധ്യമില്ലാതെ കോടതി രേഖപ്പെടുത്തിയിട്ടുണ്ട്. പ്രതി കീഴടങ്ങുന്നതുവഴി കേസ് നടപടികള്‍ വേഗത്തിലാക്കാന്‍ സാധിക്കുമെന്നും നിയമപരമായ പ്രക്രിയകള്‍ സുഗമമായി മുന്നോട്ടുകൊണ്ടുപോകാന്‍ ഇത് സഹായിക്കുമെന്നുമാണ് അഭിഭാഷകര്‍ കോടതിയെ അറിയിച്ചത്. അപേക്ഷ പരിഗണിച്ച കോടതി വിഷയത്തില്‍ പ്രോസിക്യൂഷന്റെ മറുപടി സമര്‍പ്പിക്കാന്‍ ഉത്തരവിട്ടു.
https://www.facebook.com/Malayalivartha
