സിനിമയിലെ വനിതകളുടെ പ്രശ്‌നങ്ങള്‍ ഉള്‍പ്പെടെ ചര്‍ച്ച ചെയ്യാന്‍ കഴിഞ്ഞ ദിവസം കൊച്ചിയില്‍ ചേര്‍ന്ന ഫെഫ്ക ഡയറക്ടേഴ്‌സ് യൂണിയന്‍ യോഗത്തില്‍ പല വനിതാ സംവിധായകരും പങ്കെടുത്തില്ല. രോഷ്‌നി ദിനകറും രേവതി വര്‍മയും മാത്രമാണ് പങ്കെടുത്തത്. ശ്രീബാലാ കെ.മേനോനും അഞ്ജലി മേനോനും സൗമ്യാസദാനന്ദനും ഉള്‍പ്പെടെയുള്ള സംവിധായകരും അസോസിയേറ്റ് ഡയറക്ടര്‍മാരായ വനിതകളും യോഗത്തിനെത്തിയില്ല. ഇവര്‍ക്ക് ജോലിയുമായും അല്ലാതെയും ഇന്‍ഡസ്ട്രിയിലുള്ള പ്രശ്‌നങ്ങള്‍ മനസിലാക്കാനും അതേക്കുറിച്ച് തീരുമാനം എടുക്കാനുമാണ് നേതൃത്വം ഉദ്ദേശിച്ചിരുന്നത്. 

നടിമാര്‍ ഉള്‍പ്പെടെ പലരും പരാതികള്‍ സംഘടനാ മീറ്റിംഗുകളില്‍ പറയാതെ ഫെയിസ്ബുക്കിലൂടെയും ചാനലുകളിലൂടെയും മറ്റും ആരോപണങ്ങളും ആക്ഷേപങ്ങളും ഉന്നയിക്കുന്ന പശ്ചാത്തലത്തിലാണ് ഡയറക്ടേഴ്‌സ് യൂണിയന്‍ പ്രസിഡന്റ് രഞ്ജിപണിക്കരുടെ നേതൃത്വത്തില്‍ കൊച്ചി അബാദ് പ്ലാസയില്‍ മീറ്റിംഗ് കൂടിയത്. അഞ്ജലിമേനോനും സമ്യാ സദാനന്ദനും പുതിയ സിനിമകളുടെ തിരക്കിലാണ്. പൊതുസമൂഹത്തിന്റെ ഉള്‍പ്പെടെയുള്ള പ്രശ്‌നങ്ങളില്‍ സജീവമായി ഇടപെടുന്ന ശ്രീബാല കെ.മേനോന്‍ ഉള്‍പ്പെടെ പങ്കെടുക്കാത്തത് ശരിയായില്ലെന്ന് ചില സംവിധായകര്‍ ചൂണ്ടിക്കാട്ടി. 

മാധ്യമങ്ങള്‍ ഫെഫ്കയ്‌ക്കെതിരെ ഏകപക്ഷീയമായി വാര്‍ത്ത പ്രചരിപ്പിക്കുന്നതും യോഗത്തില്‍ ചര്‍ച്ചയായി. മാതൃഭൂമി പത്രമാണ് ഏറ്റവും കൂടുതല്‍ കടന്നാക്രമിക്കുന്നതെന്നും വിമര്‍ശനം ഉയര്‍ന്നു. നടിമാരോ സിനിമയിലെ മറ്റേത് മേഖലയിലുള്ള സ്ത്രീകളോ പീഡിപ്പിക്കപ്പെട്ട സംഭവത്തെ കുറിച്ച് ഒരു പ്രമുഖ സിനിമാ മാസിക പരമ്പര തയ്യാറാക്കുകയാണ്. അതിലേക്ക് ആവശ്യമുള്ള വിവരങ്ങള്‍ തരണമെന്ന് പറഞ്ഞ് മാസികയിലെ പ്രമുഖര്‍ പല സംവിധായകരെയും ഫോണില്‍ ബന്ധപ്പെട്ടു. ഇക്കാര്യങ്ങള്‍ അവരൊക്കെ യോഗത്തില്‍ ഉന്നയിച്ചു. 

സിനിമയില്‍ സ്ത്രീകളുടെ സാനിധ്യം കൂടിയതോടെ അസിസ്റ്റന്റ് ഡയറക്ടര്‍മാരായും അസോസിയേറ്റ് ഡയറക്ടര്‍മാരായും നിരവധി യുവതികള്‍ പ്രവര്‍ത്തിക്കുന്നുണ്ട്. ഇവര്‍ക്കും യുവാക്കളായ ചില സംവിധായകര്‍ക്കും സംഘടനാ പ്രവര്‍ത്തനങ്ങളോട് താല്‍പര്യമില്ല. എന്നാല്‍ എന്തെങ്കിലും വിഷയങ്ങളുണ്ടായാല്‍ ഇവരെല്ലാം ഫെഫ്കയെ സമീപിക്കും. അതാണ് കഴിഞ്ഞ കുറച്ച് വര്‍ഷങ്ങളായി നടക്കുന്നത്. പല യുവസംവിധായകരും സെറ്റുകളിലും ജോലിയിലും അച്ചടക്കം പാലിക്കാറില്ലെന്ന ആക്ഷേപം ശക്തമാണ്. ഇതൊക്കെ സംഘടന ചൂണ്ടിക്കാട്ടിയതാണ് നിസഹകരണത്തിന് കാരണം.