ഗ്ലാസ്​ഗോയിൽ ജൂലൈ 23 മുതൽ ആരംഭിക്കുന്ന കോമൺവെൽത്ത് ​ഗെയിംസ് ഉദ്ഘാടന ചടങ്ങിൽ ഒളിംപിക് മെഡൽ ജേതാക്കളായ ​ഭാരോദ്വഹന താരം മീരാഭായ് ചാനുവും ബോക്സിങ് താരം ലവ്‍ലിന ബോർ​ഗോഹെയ്നും ഇന്ത്യ പതാകയും ബാറ്റണുമേന്തും. ഇന്ത്യൻ ഒളിംപിക് അസോസിയേഷനാണ് രാജ്യത്തിന്റെ അഭിമാന വനിതാ താരങ്ങളായ ഇരുവരേയും ഈ ദൗത്യത്തിനായി നിയോ​ഗിച്ചത്.

ഈ മാസം 23നാണ് ഉദ്ഘാടന ചടങ്ങ്. 124 അം​​ഗങ്ങളുള്ള താരങ്ങളുടെ സംഘത്തെ ഇരുവരും മുന്നിൽ നിന്നു നയിക്കുന്നതാണ്. ജൂലൈ 23 മുതൽ ഓ​ഗസ്റ്റ് 2 വരെയാണ് കോമൺവെൽത്ത് ​ഗെയിംസ്. ഇത്തവണ വിപുലമായ ഉദ്ഘാടന പരിപാടികൾ ഇല്ല. ഓവോ ഹൈഡ്രോ സ്റ്റേഡിയത്തിലാണ് കോമൺവെൽത്ത് ​ഗെയിംസിന്റെ ഉദ്ഘാടന ചടങ്ങുകൾ.

ഇന്ത്യൻ കായിക രം​ഗത്തിനു ഇരു താരങ്ങളും നൽകിയ അവിസ്മരണീയ സംഭാവനകൾക്കുള്ള അം​ഗീകാരമാണ് ബഹുമതിയെന്നു ഐഒഎ അധ്യക്ഷ പിടി ഉഷ വ്യക്തമാക്കി.‌ ഉ​ദ്ഘാടന ചടങ്ങിലെ പതാക, ബാറ്റൺ ഏന്തുന്നവർ എന്നതിലുപരി ​ഗെയിംസിൽ ഇന്ത്യ ഏറ്റവും കൂടുതൽ മെഡൽ പ്രതീക്ഷകളോടെ നോക്കുന്ന താരങ്ങളാണ് രണ്ടുപേരും. 2021ലെ ടോക്യോ ഒളിംപിക്സിൽ വനിതകളുടെ 49 കിലോ വിഭാ​ഗത്തിൽ വെള്ളി നേടിയ താരമാണ് മീരഭായ്. 2022ലെ കോമൺവെൽത്ത് ​ഗെയിംസിൽ സ്വർണവും ലോക ചാംപ്യൻഷിപ്പുകളിൽ ഒന്നിലേറെ മെഡലുകളും താരം സ്വന്തമാക്കി.