ഫെഫ്കയെ സാമ്പത്തികമായി സഹായിക്കാന്‍ അമ്മയുടെ താരനിശ, പ്രാരംഭ കാര്യങ്ങള്‍ ചര്‍ച്ച ചെയ്തു
സിനിമയിലെ വിവാദങ്ങള്‍ക്കിടയില്‍ ഫെഫ്കയെ സഹായിക്കാന്‍ താരസംഘടനയായ അമ്മ രംഗത്ത്. ഫെഫ്കയെ സാമ്പത്തികമായി സഹായിക്കാന്‍ അവരുമായി ചേര്‍ന്ന് താരനിശ സംഘടിപ്പിക്കാന്‍ കഴിഞ്ഞ ദിവസം കൊച്ചിയില്‍ ചേര്‍ന്ന യോഗത്തില്‍ ധാരണയായി. നിര്‍മാതാക്കളുടെ സംഘടനയും ഇതുമായി സഹകരിക്കും. അഭിനയം ഒഴികെ സിനിമയുടെ എല്ലാ മേഖലയിലും ഉള്ളവര്‍ അംഗങ്ങളായ സംഘടനയാണ് ഫെഫ്ക. അങ്ങള്‍ക്ക് ഇന്‍ഷുറന്‍സ്, ചികില്‍സാ സഹായം, മറ്റ് അടിയന്തര സഹായം ഉള്‍പ്പെടെ നല്‍കുന്നുണ്ട്. പ്രായമായ അംഗങ്ങള്‍ക്ക് ക്ഷേമപെന്‍ഷനും ഏര്‍പ്പെടുത്തിയിട്ടുണ്ട്. ഇതിനെല്ലാമുള്ള തുക മെമ്പര്‍ഷിപ്പില്‍ നിന്ന് മാത്രം കണ്ടെത്താന്‍ പ്രയാസമാണ്. അംഗങ്ങള്‍ക്ക് ചെയ്ത് നല്‍കുന്ന സേവനങ്ങള്‍ക്ക് സര്‍വ്വീസ് ഫീസായി 10 ശതമാനം ഈടാക്കുന്നുണ്ട്. അത് അടുത്ത കാലത്ത് വിവാദമായിരുന്നു.
ഫെഫ്കയുമായി സഹകരിക്കാന്‍ തയ്യാറാണെന്ന് അമ്മ പ്രസിഡന്റ് മോഹന്‍ലാല്‍ യോഗത്തില്‍ അറിയിച്ചു. സംവിധായകരും താരങ്ങളുമാണല്ലോ സിനിമയിലെ പ്രധാനികള്‍. അതിനാല്‍ അവര്‍ക്കിടയിലുള്ള പ്രശ്‌നങ്ങളും യോഗം ചര്‍ച്ച ചെയ്തു. അമ്മയിലെ തിരൂമാനങ്ങള്‍ കൃത്യസമയത്ത് മാധ്യമങ്ങളെ അറിയിക്കാത്തതാണ് വിവാദങ്ങള്‍ക്ക് കാരണമെന്ന് ചില ഫെഫ്ക ഭാരവാഹികള്‍ ചൂണ്ടിക്കാട്ടി. മോഹന്‍ലാല്‍ നടത്തിയ വാര്‍ത്താസമ്മേളനം നല്ല ഇടപെടലായിരുന്നെന്നും അത് പോലെ വേണം പ്രശ്‌നങ്ങളെ നേരിടേണ്ടതെന്നും അഭിപ്രായം ഉയര്‍ന്നു. എന്നാല്‍ അഭിനേതാക്കളില്‍ പലരും വികാരപരമായി പെരുമാറുന്നവരാണെന്നും അതുകൊണ്ടാണ് പലപ്പോഴും കാര്യങ്ങള്‍ കൈവിട്ട് പോകുന്നതെന്നും ഫെഫ്കയിലും അമ്മയിലും അംഗങ്ങളായ ചിലര്‍ വിശദീകരിച്ചു.
രണ്ട് മാസത്തിനുള്ളില്‍ താരനിശ സംഘടിപ്പിക്കുന്നതിന്റെ പ്രരംഭ ചര്‍ച്ചകളാണ് ഇന്നലെ നടന്നത്. ബാക്കി കാര്യങ്ങള്‍ താമസിക്കാതെ തീരുമാനിക്കും. ഏത് ചാനലിനായിരിക്കണം പരിപാടിയുടെ അവകാശം നല്‍കേണ്ടത്. ഫെഫ്കയും അമ്മയും തമ്മിലുണ്ടാകേണ്ട കരാര്‍ എന്നീവ അടുത്ത യോഗത്തില്‍ തീരുമാനിക്കും. അതേസമയം ഫെഫ്കയ്ക്ക് ബദലായി പുതിയ സംഘടന വരുന്നത് സംബന്ധിച്ച് ചര്‍ച്ച ചെയ്യാനാണ് ഫെഫ്ക യോഗത്തിലേക്ക് അമ്മ പ്രസിഡന്റ് മോഹന്‍ലാലിനെ വിളിച്ചുവരുത്തിയത് എന്ന വാര്‍ത്ത അടിസ്ഥാനരഹിതമാണെന്ന് ഫെഫ്ക നേതൃത്വം അറിയിച്ചു.
https://www.facebook.com/Malayalivartha
