ദേവാസുരത്തിലെ \'അംഗോപാംഗം സ്വരമധുരം...\' എന്നുതുടങ്ങുന്ന ഗാനരംഗം ഷൂട്ട് ചെയ്തപ്പോഴാണ് മോഹന്‍ലാല്‍ എന്ന നടന്റെ ഉള്‍ക്കാഴ്ച ബോധ്യമായതെന്ന് സംവിധായകന്‍ ഐ.വി ശശി. ഒരു ഷോട്ടില്‍ പക്കമേളക്കാരുടെ കൂട്ടത്തിലിരിക്കുന്ന ഒരു സ്ത്രീയെ നോക്കി ലാല്‍ കണ്ണിറുക്കുന്നുണ്ട്. സത്യത്തില്‍ അത് സംവിധായകന്‍ പറഞ്ഞിട്ടൊന്നുമല്ല ചെയ്തത്. അത് താരത്തിന്റെ സംഭാവനയായിരുന്നു.
ഒരു കോംമ്പിനേഷന്‍ സീനായിട്ടാണ് അത് ആദ്യം ചിത്രീകരിച്ചത്. അതും ഒരു ലോംഗ് ഷോട്ടില്‍. ലാലില്‍നിന്ന് ഇങ്ങനെയൊരു പ്രകടനം വന്നപ്പോള്‍ സംവിധായകന്‍ അത് ക്ലോസപ്പിലെടുത്തു. ഒപ്പം ആ സ്ത്രീയുടെ റിയാക്ഷനും ക്ലോസപ്പില്‍ പകര്‍ത്തി. അത് പ്രേക്ഷകര്‍ ഏറെ ശ്രദ്ധിക്കുകയും ചെയ്തു. ആ രണ്ട് ക്ലോസപ്പ് ഷോട്ടുകളും വയ്ക്കാന്‍ നിര്‍ബന്ധിച്ചത് ലാലിന്റെ പ്രകടനമായിരുന്നു.
തന്നെ പോലീസ് ജീപ്പില്‍ കയറാന്‍ നിര്‍ബന്ധിക്കുന്ന എസ്.ഐയുടെ തോളില്‍ കൈവച്ചുകൊണ്ട് നീലകണ്ഠന്‍ പറയുകയാണ്, \'എന്റെ ഭീഷണീന്ന് പറഞ്ഞാ ചില ഊച്ചാളി രാഷ്ട്രീയക്കാരുടെ കൂട്ട് സ്ഥലം മാറ്റിക്കളയും എന്നൊന്നുമല്ല, കൊന്നുകളയും ഞാന്‍ മടിക്കില്ല...ട്ടോ.\'
സ്‌ക്രിപ്റ്റ് വായിച്ചപ്പോള്‍ ലാലൊരു ഇളകിയാട്ടം നടത്തേണ്ട സന്ദര്‍ഭമാണ് അതെന്ന് സംവിധായകന് തോന്നി. ഇക്കാര്യം ലാലിനോട് പറയുകയും ചെയ്തു. എന്നിട്ടാണ് ഷോട്ട് വച്ചത്. ആക്ഷനും പറഞ്ഞു. പക്ഷേ ലാലില്‍നിന്ന് ഉണ്ടായത് കുറേക്കൂടി പതിഞ്ഞ പ്രകടനമാണ്. അതുകൊണ്ട് ഒരിക്കല്‍കൂടി എടുക്കാമെന്ന് ലാലിനോട് പറഞ്ഞു. ശരിയെന്ന് ലാലും സമ്മതിച്ചു. രണ്ടാമത്തെ ടേക്കിലും ആദ്യത്തെ പ്രകടനമാണ് ആവര്‍ത്തിക്കപ്പെട്ടത്. പിന്നെയൊരു റീ ടേക്കിന് പോയില്ല. പക്ഷേ സ്‌ക്രീനില്‍ കണ്ടപ്പോള്‍ ശരിക്കും അമ്പരന്നുപോയി. ഇതിനെക്കാള്‍ മികച്ച ഒരു പ്രകടനം ആ സന്ദര്‍ഭത്തിന് വേറെയുണ്ടാകാനില്ലെന്നും സംവിധായകന് തോന്നി. അതാണ് മോഹന്‍ലാല്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha