കൊച്ചിയുടെ രാഷ്ട്രീയത്തില്‍ പയറ്റാന്‍ ഒരു സിനമാ താരം. കലാലയ രാഷ്ട്രീയത്തിന്റെ കരുത്തുമായി ഇത്തവണ കൊച്ചിയില്‍ മാറ്റുരക്കാന്‍ ശിവസേന തെരഞ്ഞെടുത്തത് പ്രശസ്ത സീരിയല്‍ സിനിമാ താരം സോണിയയെയാണ്. സിഎംഎസ് കോളേജില്‍ തൊണ്ണൂറുകളില്‍ പയറ്റിത്തെളിഞ്ഞ രാഷ്ട്രീയമാണ് മത്സരത്തിന് പിന്‍ബലം.
റോഡുകള്‍ നന്നാക്കാന്‍ ഇറങ്ങിപ്പുറപ്പെട്ട ജയസൂര്യയെ സമൂഹം പരിഹസിച്ചതു കണ്ടപ്പോഴാണ് പ്രവര്‍ത്തിക്കുന്നതിന് ഒരു സംഘടന വേണമെന്ന് സോണിയയ്ക്ക് തോന്നിയത്. ഇത് തന്നെ ശിവസേനയിലേക്ക് എത്തിക്കുകയായിരുന്നുവെന്ന് സോണിയ പറയുന്നു.
എറണാകുളം നോര്‍ത്ത് ഡിവിഷനിലെ ശിവസേനാ സ്ഥാനാര്‍ത്ഥിയാണ് സോണിയ ജോസ്. ക്യാമ്പസ് വിട്ടതോടെ രാഷ്ട്രീയ പ്രവര്‍ത്തനം അവസാനിപ്പിച്ച സോണിയയ്ക്ക് ഇത് രണ്ടാമൂഴമാണ്. നഗരത്തിലെ അടിസ്ഥാന സൗകര്യ വികസനം എന്ന മുദ്രാവാക്യമുയര്‍ത്തി ഇനി സ്ഥാനാര്‍ത്ഥി കൊച്ചിക്കാര്‍ക്കു മുന്നില്‍ പ്രത്യക്ഷപ്പെടും. കഴിഞ്ഞ പത്ത് വര്‍ഷത്തോളമായി ജീവ കാരുണ്യ പ്രവര്‍ത്തനങ്ങളിലും അന്നദാന പരിപാടികളിലും സജീവമായിരുന്ന സോണിയ അടുപ്പമുള്ള പ്രസ്താനം എന്ന നിലയിലാണ് ശിവസേനയില്‍ അംഗമായതെന്ന് പറയുന്നു.
ബിഷപ്പിനെ നേരിട്ടു പോയി കണ്ട് അനുഗ്രഹം വാങ്ങിയാണ് സോണിയ പ്രചാരണം ആരംഭിച്ചത്. അടിസ്ഥാന സൗകര്യം പോലുമില്ലാത്ത നഗരത്തിലെ മാര്‍ക്കറ്റ് ഉള്‍പ്പെട്ട പ്രദേശത്താണ് താന്‍ മത്സരിക്കുന്നതെന്ന ബോധം സോണിയയ്ക്ക് ഉണ്ട്. ഈ പ്രശ്‌നങ്ങളും തന്റെ പ്രചരണത്തില്‍ അവര്‍ ഉയര്‍ത്തിക്കാട്ടും.
കടല്‍ എന്ന ചിത്രത്തിലൂടെയാണ് സോണിയ സിനിമാ രംഗത്തെത്തിയത്. സുവര്‍ണ സിംഹാസനം , രുദ്രാക്ഷം, ജവാന്‍ ഓഫ് വെള്ളിമല, തുടങ്ങി 45 ഓളം ചിത്രങ്ങളിലും, നിരവധി സീരിയലുകളിലും സോണിയ വേഷമിട്ടിട്ടുണ്ട്

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha