ജനകീയ പ്രദര്‍ശനങ്ങളിലൂടെ ജനങ്ങളിലേക്ക് ഇറങ്ങിയ \'ഇളംവെയില്‍\' തീയേറ്ററുകളില്‍. ജനകീയ കൂട്ടായ്മയില്‍ കണ്ണൂര്‍ സ്വദേശി ഷിജു ബാലഗോപാലനാണ് ഇളംവെയില്‍ ഒരുക്കിയത്.
മണ്ണിനെ നശിപ്പിക്കുന്നവരാണ് ജീവജാലങ്ങളെ ഇല്ലാതാക്കുന്നതെന്ന് ചിത്രം വിളിച്ച് പറയുന്നു. 2015 ഐക്യരാഷ്ട്രസഭ അന്താരാഷ്ട്ര മണ്ണ് വര്‍ഷമായി പ്രഖ്യാപിച്ചിരിക്കുകയാണ്. ഇതിന്റെ പശ്ചാത്തലത്തില്‍ മണ്ണിന്റെ മഹത്വം വിളിച്ചറിയിക്കുകയാണ് ഷിജുവിന്റെ ചിത്രം. മണ്ണിനെയും കൃഷിയെയും ഒരുപാട് സ്‌നേഹിക്കുന്ന രാഹുല്‍ എന്ന ഏഴാം ക്ലാസുകാരനിലൂടെയാണ് ഒന്നരമണിക്കൂര്‍ ചിത്രം പുരോഗമിക്കുന്നത്. മണ്ണിന്റെ പ്രാധാന്യത്തെ കുറിച്ചുള്ള ബോധവത്കരണമാണ് ചിത്രത്തിലൂടെ ഷിജുവും സംഘവും ലക്ഷ്യമിടുന്നത്. മനുഷ്യര്‍ക്ക് മണ്ണ് എത്രമാത്രം പ്രധാനപ്പെട്ടതാണെന്ന് ഒരുകൂട്ടം കഥാപാത്രങ്ങളിലൂടെ വ്യക്തമാക്കി തരുന്നുണ്ട് ചിത്രം.
ജനകീയ കൂട്ടായ്മയിലൂടെ തയ്യാറാക്കിയ \'നന്മകള്‍ പൂക്കുന്ന നാട്ടില്‍\' എന്ന ചിത്രത്തിനു ശേഷം ഷിജു ബാലഗോപാലന്‍ സംവിധാനം ചെയ്യുന്ന ചിത്രമാണ് ഇളംവെയില്‍. ഷിജുവിന്റെ സ്വന്തം പ്രൊഡക്ഷന്‍ ഹൗസായ കണ്ണൂര്‍ ടാക്കീസാണ് ചിത്രം ഒരുക്കുന്നത്. സര്‍ഗം ചിറ്റാരിപ്പറമ്പ ഫിലിംസിന്റെ ബാനറില്‍ മുകുന്ദന്‍ കൂര്‍മയാണ് ചിത്രം നിര്‍മിച്ചിരിക്കുന്നത്. അഭിനേതാക്കളും അണിയറ പ്രവര്‍ത്തകരും അടക്കം മുഴുവന്‍ പേരും പുതുമുഖങ്ങളാണ് ചിത്രത്തില്‍ അണിനിരക്കുന്നത്. സ്വന്തം പ്രയത്‌നത്തിലൂടെ സിനിമയുടെ മുഴുവന്‍ വശങ്ങളും പഠിച്ച് സിനിമ എടുത്തയാളാണ് ഷിജു ബാലഗോപാലന്‍. ഡോക്ടര്‍ കുമാരന്‍ വയലേരിയാണ് ചിത്രത്തിന്റെ കഥയും തിരക്കഥയും സംഭാഷണവും ഒരുക്കിയിരിക്കുന്നത്. സുമിത്ത് രാഘവ്, ദീക്ഷിത്ത് ദിലീപ്, വി.കെ കുഞ്ഞികൃഷ്ണന്‍, ജയലക്ഷ്മി തുടങ്ങിയ പുതുമുഖങ്ങളാണ് ചിത്രത്തില്‍ അഭിനയിച്ചിരിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha