\'എന്ന് നിന്റെ മൊയ്തീന്‍\' എന്ന ചിത്രത്തിന്റെ വിജയത്തിനു പിന്നാലെയുണ്ടായ വിവാദങ്ങള്‍ വീണ്ടും വാര്‍ത്തകളില്‍. ഇന്നലെ സിദ്ദിഖാണ് കാഞ്ചനമാലക്കെതിരെ രംഗത്ത് എത്തിയതെങ്കില്‍ ഇന്ന് ചിത്രത്തിന്റെ സംവിധായകനാണ് രംഗത്ത് എത്തിയിരിക്കുന്നത്. അതും രൂക്ഷ വിമര്‍ശനവുമായിത്തന്നെ. അവര്‍ വാക്കിന് വിലയില്ലാത്തവര്‍ എന്നെയും ഈ സിനിമയെയും ഏറ്റവും ദ്രോഹിച്ചയാള്‍. ഒടുവില്‍ സിനിമയുടെ എല്ലാ ക്രെഡിറ്റും ഏറ്റെടുക്കാന്‍ അവര്‍ ഓടിനടക്കുന്നു. എന്നിട്ട് സിനിമക്കെതിരെ വിമര്‍ശനവും നടത്തുന്നു. വിമല്‍ പറയുന്നു. കാഞ്ചനമാലയോട് മോശമായി പെരുമാറുകയോ അവരുടെ പ്രണയജീവിതത്തെ വളച്ചൊടിക്കുകയോ ചെയ്തിട്ടില്ലെന്നാണ് ഒരു അഭിമുഖത്തില്‍ വിമല്‍ പറഞ്ഞത്.
മമ്മൂട്ടിയെ വയസനെന്നും മോഹന്‍ലാലിനെ പുളുന്താനെന്നും വിളിക്കുന്നത് പ്രായത്തിന്റെ പ്രശ്‌നങ്ങള്‍ കൊണ്ടാകുമെന്നും വിമല്‍ പറഞ്ഞു. ഷൂട്ടിംഗിനിടെ ഒരു ദിവസം കാഞ്ചനമാല വിളിച്ചു ആരാണ് തന്റെ അച്ഛന്റെ വേഷം ചെയ്യുന്നതെന്ന് ചോദിച്ചു. ശശികുമാര്‍ സാറാണ് ആ റോളിലെന്ന് പറഞ്ഞപ്പോള്‍, ആ കോന്തനാണോ എന്നായിരുന്നു കാഞ്ചനമാലയുടെ മറുപടി. ചേട്ടനായി സുധീഷ് ആണെന്ന് പറഞ്ഞപ്പോള്‍ ആ കുള്ളനാണോ എന്ന് ചോദിച്ചുവെന്നും വിമല്‍ പറഞ്ഞു.
അവരുടെ ജീവിതത്തിലെ നെഗറ്റീവായ എല്ലാ വശങ്ങളും നീക്കം ചെയ്ത ശേഷമാണ് തിരക്കഥ തയ്യാറാക്കിയത്. ആ ചിത്രത്തിലൂടെ കാഞ്ചനേട്ടത്തിക്ക് ലഭിച്ച വലിയ നന്മയെ എന്തിനാണ് അവര്‍ ഇപ്പോഴും തള്ളിപ്പറയുന്നത്. സിനിമ തുടങ്ങുന്നതിന് മുമ്പ് മൊയ്തീന്‍ സേവാമന്ദിറിന് വേണ്ടി അഞ്ച് ലക്ഷം രൂപ നല്‍കിയിരുന്നു. ഇതെല്ലാം ആരും അറിയാതെ ചെയ്യണമെന്ന നിര്‍ബന്ധത്താലാണ് ഇതുവരെ തുറന്നു പറയാതിരുന്നത്. കോടിക്കണക്കിന് രൂപയുടെ ആസ്തിയുള്ള കാഞ്ചനമാല സ്വന്തം കയ്യില്‍ നിന്ന് പണമെടുത്ത് സേവാ മന്ദിറിന് വേണ്ടി ഒന്നും ചെയ്തിട്ടില്ലെന്നും വിമല്‍ പറഞ്ഞു. ചിത്രം ചിത്രീകരണം തുടങ്ങുന്നതിന് മുമ്പ് തന്നെ മൂന്ന് ലക്ഷത്തിന്റെ ചെക്ക് കൈമാറിയിരുന്നു. അതൊന്നും അവര്‍ പുറത്തുപറയുന്നില്ല. എന്നിട്ട് കോടതിയില്‍ ചിത്രത്തിനെതിരെ പോവുകയാണ് ചെയ്തത്. ഇതുവരെ അവര്‍ ഈ സിനിമ കണ്ടിട്ടില്ല. എന്നിട്ടാണ് വിമര്‍ശിക്കുന്നത്.
കഴിഞ്ഞ ദിവസം നടന്‍ സിദ്ദിഖും കാഞ്ചനമാലയ്‌ക്കെതിരെ രൂക്ഷ വിമര്‍ശനം ഉയര്‍ത്തിയിരുന്നു. കാഞ്ചനമാല എങ്ങനെ അനശ്വര പ്രണയത്തിന്റെ വക്താവാകുമെന്നാണു സിദ്ദിഖ് ചോദിച്ചത്. വീണ്ടും വിവാഹം കഴിക്കാതിരുന്നത് \'മൊയ്തീന്റെ പെണ്ണ്\' എന്ന് എല്ലാവരും അംഗീകരിച്ചിരുന്നതിനാലാണെന്നും സിദ്ദിഖ് പറഞ്ഞു.
കാഞ്ചനമാലയുടേതിനെക്കാള്‍ എത്രയോ ത്യാഗപൂര്‍ണ്ണമായ ജീവിതമാണ് ഇവിടുത്തെ ലക്ഷോപലക്ഷം അമ്മമാരുടേത്. ഒരു പുരുഷനെ വിവാഹം കഴിച്ച് അയാളെ മാത്രം സ്‌നേഹിച്ച് അയാളുടെ മക്കളെ വളര്‍ത്തി തന്റേതായ എല്ലാ സുഖങ്ങളും ഒഴിവാക്കി അവര്‍ക്കുവേണ്ടി മാത്രം ജീവിക്കാന്‍ വിധിക്കപ്പെട്ടവരാണ് ആ അമ്മമാര്‍. അവരുടേതല്ലേ കാഞ്ചനമാലയുടേതിനെക്കാള്‍ ത്യാഗപൂര്‍ണ്ണമായ പ്രണയമെന്നും സിദ്ദിഖ് ചോദിച്ചിരുന്നു. വിമര്‍ശിക്കുന്നവരുടെ വിവരക്കേടിനു പുല്ലുവില മാത്രമെന്നാണ് ഇക്കാര്യത്തോട് കാഞ്ചനമാല പ്രതികരിച്ചത്.
എത്രയൊക്കെ വിമര്‍ശനങ്ങള്‍ ഉന്നയിച്ചാലും കാഞ്ചനമാല തനിക്കിപ്പോഴും അമ്മയെ പോലെയാണ്. പ്രായത്തിന്റെ പ്രശ്‌നങ്ങള്‍ കൊണ്ടാകാം അവരിങ്ങനെയൊക്കെ പറയുന്നത്. വിമല്‍ കൂട്ടിച്ചേര്‍ത്തു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha