സിനിമാ ഷൂട്ടിങ് നിര്‍ത്തിവയ്ക്കാന്‍ കേരള ഫിലിം പ്രൊഡ്യൂസേഴ്‌സ് അസോസിയേഷന്‍ തീരുമാനിച്ചെങ്കിലും അത് അവഗണിച്ച് ഒരു സിനിമയുടെ ഷൂട്ടിങ് ഇന്നലെ തുടങ്ങി.

സംവിധായകന്‍ രഞ്ജിത് നിര്‍മിക്കുന്ന ബിജു മേനോന്‍ സിനിമയുടെ ഷൂട്ടിങ്ങാണ് കോഴിക്കോട്ടു തുടങ്ങിയത്. അതേസമയം, വിലക്ക് അവഗണിച്ചു ചിത്രീകരിക്കുന്ന സിനിമകള്‍ റിലീസ് ചെയ്യാന്‍ ബുദ്ധിമുട്ടുമെന്നു നിര്‍മാതാക്കളുടെ സംഘടന മുന്നറിയിപ്പു നല്‍കി. ഇരുകൂട്ടരും ഒത്തുതീര്‍പ്പു ചര്‍ച്ചകള്‍ക്കു ശ്രമിക്കാത്ത സാഹചര്യത്തില്‍ സമരം നീണ്ടുപോകാനാണു സാധ്യത.

രാജീവ് രവിയുടെ പുതിയ സിനിമയുടെ ഷൂട്ടിങ് ഇന്നു കൊച്ചിയില്‍ തുടങ്ങാനിരിക്കുന്നു. ജയരാജിന്റെ സിനിമയുടെ ചിത്രീകരണം അഞ്ചിനു തിരുവനന്തപുരത്തു തുടങ്ങുമെന്ന് അറിയിച്ചിട്ടുണ്ട്. ആസിഫലി നായകനായ സിനിമയുടെ ഷൂട്ടിങ് ബെംഗളൂരുവിലും നടക്കുന്നുണ്ട്.

തൊഴിലാളികളുടെ പ്രതിഫലം വര്‍ധിപ്പിച്ചാല്‍ ഒരു സിനിമയ്ക്ക് ആറു ലക്ഷം രൂപയുടെ വര്‍ധനവേ ഉണ്ടാകൂ എന്ന ഫെഫ്കയുടെ വാദം ശരിയല്ലെന്നും അങ്ങനെയെങ്കില്‍ ഈ തുക ഫെഫ്ക ഓഫിസില്‍ കെട്ടിവയ്ക്കാന്‍ തങ്ങള്‍ തയാറാണെന്നും പ്രൊഡ്യൂസേഴ്‌സ് അസോസിയേഷന്‍ ജനറല്‍ സെക്രട്ടറി എം. രഞ്ജിത് അറിയിച്ചു.

പ്രതിഫലം മാത്രമല്ല പ്രശ്‌നം. ഈ മേഖലയില്‍ അച്ചടക്കം ഉണ്ടായിട്ടു ചിത്രീകരണം തുടങ്ങിയാല്‍ മതിയെന്നാണു നിര്‍മാതാക്കളുടെ തീരുമാനം.

ഹോട്ടല്‍ സ്വന്തമായുള്ള നിര്‍മാതാവിനു ഷൂട്ടിങ് സ്ഥലത്തേക്കുള്ള ഭക്ഷണം അവിടെ നിന്ന് എടുക്കാന്‍ യൂണിയന്‍കാര്‍ സമ്മതിക്കില്ല. ട്രാവല്‍ ഏജന്‍സി സ്വന്തമായുള്ള നിര്‍മാതാവിന് അവിടത്തെ വാഹനം ഉപയോഗിക്കാന്‍ അനുവാദമില്ല. ഈ അവസ്ഥ അംഗീകരിക്കാനാവില്ലെന്നും രഞ്ജിത് അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha