2025ലെ ദേശീയ കായിക പുരസ്കാരങ്ങള് പ്രഖ്യാപിച്ചു
2025ലെ ദേശീയ കായിക പുരസ്കാരങ്ങള് പ്രഖ്യാപിച്ച് കായിക മന്ത്രാലയം. മലയാളികളായ ട്രീസ ജോളിക്കും മുഹമ്മദ് അജ്മലിനുമടക്കം 17 പേര്ക്ക് അര്ജുന അവാര്ഡ്. എന്നാല്, രാജ്യത്തെ പരമോന്നത കായിക ബഹുമതിയായ മേജര് ധ്യാന്ചന്ദ് ഖേല് രത്ന പുരസ്കാരത്തിന് ഇത്തവണ ആരെയും തിരഞ്ഞെടുത്തില്ല.
മുന് സുപ്രീംകോടതി ജഡ്ജി ജസ്റ്റിസ് അരുണ് കുമാര് മിശ്ര അദ്ധ്യക്ഷനായ സമിതിയുടെ ശുപാര്ശയുടെ അടിസ്ഥാനത്തിലാണ് പുരസ്കാരങ്ങള് പ്രഖ്യാപിച്ചത്. അത്ലറ്റിക് പരിശീലകന് പര്വീര് സിംഗ്, ബോക്സിംഗ് പരിശീലകന് ഛോട്ടേ ലാല് യാദവ്, ഷൂട്ടിംഗ് പരിശീലകന് നേഹ നന്ദകുമാര് ചവാന് എന്നിവര്ക്ക് ദ്രോണാചാര്യ അവാര്ഡ് ലഭിക്കും. ലൈഫ്ടൈം വിഭാഗത്തില് ബോക്സിംഗ് പരിശീലകന് ധര്മ്മേന്ദ്ര സിംഗ് യാദവ്, ഗുസ്തി പരിശീലകന് വീരേന്ദ്ര കുമാര് എന്നിവരെയും തിരഞ്ഞെടുത്തു.
മുന് ഫുട്ബോള് താരം ഐ അരുമൈനായകത്തിന് ലൈഫ് ടൈം ഇനത്തില് അര്ജുന അവാര്ഡ് ലഭിക്കും. ഹൈ ജമ്പ് താരം തേജസ്വിന് ശങ്കര്, സ്പ്രിന്റര്മാരായ മുഹമ്മദ് അജ്മല് വി, പ്രിയങ്ക ഗോസ്വാമി, ബാഡ്മിന്റന് താരങ്ങളായ ട്രീസ ജോളി, ഗായത്രി ഗോപിചന്ദ്, ചെസ് താരങ്ങളായ വിദിത് ഗുജറാത്തി, ദിവ്യ ദേശ്മുഖ്, ഹോക്കി താരങ്ങളായ ലാല്റെംസിയാമി, രാജ്കുമാര് പാല്, ഷൂട്ടര് അഖില് ഷിയോറാന്, പാരാ ഷൂട്ടര് രുദ്രാന്ഷ് ഖണ്ഡേവാള്, പാരാ അത്ലറ്റ് ഏക്ത ഭ്യാന് എന്നിവരാണ് അര്ജുന പുരസ്കാരത്തിന് അര്ഹരായത്. റോവര് അരവിന്ദ് സിംഗ്, ബോക്സര് അരവിന്ദ് സിംഗ്, ബോക്സര് നരേന്ദ്ര, കബഡി താരങ്ങളായ സുര്ജീത്, പൂജ, ഡെഫ് ഷൂട്ടര് ധനുഷ് ശ്രീകാന്ത് എന്നിവരാണ് പട്ടികയിലെ മറ്റ് താരങ്ങള്.
1962ലെ ഏഷ്യന് ഗെയിംസില് സ്വര്ണം നേടിയ ഇന്ത്യന് ഫുട്ബോള് ടീമില് അംഗമായിരുന്നു ദ്രോണാചാര്യ അവാര്ഡ് നേടിയ അരുണാനായക്. കരിയറില് മൂന്ന് ഡ്യൂറന്റ് കപ്പ് കിരീടങ്ങളാണ് അദ്ദേഹം നേടിയിട്ടുള്ളത്. കഴിഞ്ഞ നാല് വര്ഷത്തെ മികച്ച പ്രകടനം, നേതൃത്വം, കായികമനോഭാവം, അച്ചടക്കം എന്നിവ പരിഗണിച്ചാണ് അര്ജുന പുരസ്കാരം നല്കുന്നത്.
2025ല് ഖേല് രത്ന പുരസ്കാരത്തിനായി ആരെയും തിരഞ്ഞെടുത്തിട്ടില്ല. 2024ല് നാല് താരങ്ങള്ക്കാണ് രാജ്യത്തെ പരമോന്നത കായിക ബഹുമതി ലഭിച്ചത്. ചെസ് ലോക ചാമ്പ്യന് ഡി ഗുകേഷ്, ഇന്ത്യന് പുരുഷ ടീം ക്യാപ്റ്റന് ഹര്മന് പ്രീത് സിംഗ്, പാരാ അത്ലറ്റ് പ്രവീണ് കുമാര്, ഒളിമ്പിക് മെഡല് ജേതാവ് മനു ഭാക്കര് എന്നിവരായിരുന്നു കഴിഞ്ഞ വര്ഷത്തെ ഖേല് രത്ന ജേതാക്കള്. 2024ല് ഡിസംബറില് ലോക ചെസ് ചാമ്പ്യനായതോടെയാണ് ഗുകേഷ് ഖേല് രത്നയ്ക്ക് അര്ഹനായത്. ഒരു ഒളിമ്പിക്സില് രണ്ട് മെഡല് നേടുന്ന സ്വാതന്ത്ര്യാനന്തര ഇന്ത്യയിലെ ആദ്യ താരമായി മനു ഭാക്കറും ചരിത്രം കുറിച്ചിരുന്നു.
https://www.facebook.com/Malayalivartha
