മണിച്ചിത്രത്താഴ് എന്ന ചിത്രത്തില്‍ നാഗവല്ലിക്ക് ശബ്ദം കൊടുത്തതുമായി ബന്ധപ്പെട്ട് ഫാസിലിന്റെ വെളിപ്പെടുത്തലിനോട് ഭാഗ്യലക്ഷ്മി പ്രതികരിച്ചു. നാഗവല്ലിക്ക് ശബ്ദം നല്‍കിയത് ഭാഗ്യലക്ഷ്മി അല്ല എന്നും ദുര്‍ഗ എന്ന ഡബിങ് ആര്‍ടിസ്റ്റാണെന്നും 23 വര്‍ഷങ്ങള്‍ക്കു ശേഷം ഒരു പ്രമുഖ വാരികയിലെ ഒര്‍മപ്പൂക്കള്‍ എന്ന പംക്തിയിലൂടെ സംവിധായകന്‍ ഫാസില്‍ വെളിപ്പെടുത്തിയിരുന്നു. എന്നാല്‍ സിനിമയില്‍ ക്രെഡിറ്റ് പോലും നല്‍കിയിട്ടില്ല എന്ന് നാഗവല്ലിക്ക് ശബ്ദം നല്‍കിയ ദുര്‍ഗ പ്രതികരിച്ചിരുന്നു.

തനിക്ക് ഈ ചിത്രത്തിന്റെ പേരില്‍ പുരസ്‌കാരങ്ങളോ പ്രത്യകിച്ച് കൂടുതല്‍ അവസരങ്ങളോ ഒന്നും ലഭിച്ചിട്ടില്ല. പിന്നെന്തിനാണ് ഈ വിവാദത്തെക്കുറിച്ച് ഓര്‍ത്ത് ഞാന്‍ വിഷമിക്കുന്നത്. ഈ സിനിമയ്ക്ക് വേണ്ടി യാതൊരു പുരസ്‌കാരവും വാങ്ങിയിട്ടില്ലാത്തതു കൊണ്ടു തന്നെ തനിക്ക് ഒരു കുറ്റബോധവുമില്ല. പക്ഷേ ആ സിനിമയില്‍ ശബ്ദം കൊടുത്ത എല്ലാവരുടേയും പേര് സിനിമയുടെ ടൈറ്റിലില്‍ നല്‍കിയിട്ടുണ്ട്. എന്തുകൊണ്ട് ദുര്‍ഗയുടെ പേര് നല്‍കിയില്ല. അത് അവരോട് കാണിച്ച അനീതിയല്ലേ? തനിക്കിതില്‍ അപമാനമോ കുറ്റബോധമോ സങ്കടമോ പ്രതിഷേധമോ ഒന്നുമില്ല. അത്തരം അവസ്ഥയൊക്കെ ഞാന്‍ എന്നേ അതിജീവിച്ചു കഴിഞ്ഞു എന്നായിരുന്നു ഇതിനെല്ലാം മറുപടിയായി ഭാഗ്യലക്ഷ്മി പറഞ്ഞത്.

ഇപ്പോള്‍ ഡബിങ്ങിന്റെ ചരിത്രവുമായി ബന്ധപ്പെട്ടുള്ള ഒരു ഡോക്യുമെന്ററി തയ്യാറാക്കുന്നതിന്റെ തിരക്കിലാണ് താനെന്നും അതിനായി വളരെ പരിശ്രമം വേണമെന്നതിനാല്‍ ഈ വിവാദങ്ങളെല്ലാം ഇപ്പോള്‍ എടുത്ത് തലയില്‍ വയ്ക്കാന്‍ ആഗ്രഹിക്കുന്നില്ലെന്നും അവര്‍ തുടര്‍ന്നു പറഞ്ഞു. ഡോക്യുമെന്ററിയുടെ ജോലി കഴിയുമ്പോള്‍ വിശദമായി പ്രതികരിക്കുമെന്ന് അവര്‍ വ്യക്തമാക്കി.

ഇത് വളരെ പഴയ ഒരു ചിത്രത്തെക്കുറിച്ചുള്ള വിവാദമാണ്. ഇപ്പോള്‍ അത് പൊക്കിക്കൊണ്ടു വരുന്നതില്‍ യാതൊരു അര്‍ഥവുമില്ല. ദുര്‍ഗയ്ക്ക് ക്രെഡിറ്റ് നല്‍കേണ്ടിയിരുന്നത് ഫാസില്‍ സാറാണ്. അദ്ദേഹം എന്തുകൊണ്ടത് നല്‍കിയില്ല എന്നെനിക്കറിയില്ല. അത് അദ്ദേഹത്തോട് ചോദിച്ചാലേ അറിയാന്‍ കഴിയൂ. ആരെങ്കിലും നാഗവല്ലിയുടെ ശബ്ദത്തിന്റെ ക്രെഡിറ്റ് കൊണ്ടുപൊക്കോട്ടെ. എനിക്ക് യാതൊരു വിഷമവുമില്ല. ഭാഗ്യലക്ഷ്മി ഒരു ഓണ്‍ലൈന്‍ പത്രത്തോടു പ്രതികരിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha