മലയാളത്തിന്റെ താരസുന്ദരന്‍ ദുല്‍ഖര്‍ സല്‍മാന്റെയും സകലകലാ വല്ലഭന്‍ എന്ന വിശേഷണമുള്ള വിനീത് ശ്രീനിവാസന്റെയും കോമ്പിനേഷനിലൊരു ചിത്രം ആഗ്രഹിക്കാത്ത മലയാളികള്‍ ആരും തന്നെയുണ്ടാവില്ല. അത്തരത്തിലൊരു സിനിമ പുറത്തിറങ്ങിയാല്‍ അത് മലയാളത്തിലെ എക്കാലത്തെയും സൂപ്പര്‍ഹിറ്റുകളില്‍
ഒന്നായിരിക്കുകയും ചെയ്യും.

എന്നാല്‍ ഈ ആഗ്രഹം എത്രയോ കാലം മുമ്പ് തന്നെ വിനീത് ശ്രീനിവാസന് തോന്നിയിരിക്കണം. അതുക്കൊണ്ടാവണം തന്റെ ആദ്യ ചിത്രമായ 'മലര്‍വാടി ആര്‍ട്‌സ് ക്ലബ്ബി'ന് മുന്‍പേ ദുല്‍ഖറിനെ വിനീത് സമീപിച്ചത്. പക്ഷേ അത് ദുല്‍ഖറിനെ അഭിനയിപ്പിക്കാന്‍ വേണ്ടി ആയിരുന്നില്ലെന്ന് മാത്രം.

അതിനെക്കുറിച്ച് വിനീത് മനസ്സ് തുറക്കുന്നതിങ്ങനെ..

'ഒരു മിഡില്‍ ഈസ്റ്റ് ട്രിപ്പിനിടെയാണ് ചാലുവുമായി (ദുല്‍ഖര്‍ സല്‍മാന്‍) കൂട്ടാവുന്നത്. ഇന്നും ഞങ്ങള്‍ അടുത്ത കൂട്ടുകാരാണ്. ഒന്നിച്ച് വര്‍ക് ചെയ്തിട്ടില്ലെന്നേയുള്ളൂ. ആദ്യം ഒരു കഥയുമായി പോവുന്നത് 'ചാലു'വിന്റെ അടുത്താണ്. അവന്‍ പ്രൊഡ്യൂസ് ചെയ്യാന്‍ വേണ്ടി. ചാലുവിന് അന്ന് ഫസ്റ്റ്ഹാഫ് ഇഷ്ടപ്പെട്ടു. സെക്കന്റ് ഹാഫ് കുറച്ചുകൂടി ബെറ്ററാവണം എന്ന് പറഞ്ഞു. ആ വിവരം ഞാന്‍ അച്ഛനോട് പറഞ്ഞു. അച്ഛന് ഫസ്റ്റ്ഹാഫും ഇഷ്ടപ്പെട്ടില്ല, സെക്കന്റ് ഹാഫും ഇഷ്ടപ്പെട്ടില്ല. അങ്ങനെ അത് പെട്ടിയിലായി. അത് കഴിഞ്ഞാണ് മലര്‍വാടി ചെയ്യുന്നത്.'

ഏതായാലും ഭാവിയില്‍ ഇവര്‍ രണ്ടു പേരും ഒരുമിച്ചുള്ള രസതന്ത്രം സ്‌ക്രീനില്‍ കാണാനാവുമെന്ന പ്രതീക്ഷയിലാണ് മലയാള സിനിമാ ലോകം.