പായലിന്റെ സിലിഗുരി യാത്രയെക്കുറിച്ച് തങ്ങള്ക്ക് അറിവുണ്ടായിരുന്നില്ല; ഭര്ത്താവുമായി വേര്പിരിഞ്ഞുകഴിഞ്ഞിരുന്ന പായല് കടുത്ത മാനസികസമ്മര്ദ്ദത്തിലായിരുന്നുവെന്ന് പിതാവിന്റെ മൊഴി; നടി പായല് ചക്രബര്ത്തിയെ ഹോട്ടല് മുറിയില് മരിച്ചനിലയില് കണ്ടെത്തിയ സംഭവത്തില് ദുരൂഹതയേറുന്നു
ബംഗാളി നടി പായല് ചക്രബര്ത്തിയെ സിലിഗുരിയിലെ ഹോട്ടല് മുറിയില് മരിച്ചനിലയില് കണ്ടെത്തിയ സംഭവത്തില് അടിമുടി ദുരൂഹത. സംഭവം ആത്മഹത്യയാണെന്നാണ് പോലീസിന്റെ പ്രാഥമിക നിഗമനമെങ്കിലും നടിയുടെ മാതാപിതാക്കള് നല്കിയ മൊഴികളാണ് ദുരൂഹത വര്ധിപ്പിക്കുന്നത്.
മരണവിവരമറിഞ്ഞ് സിലിഗുരിയിലെത്തിയ ബന്ധുക്കള് പായല് റാഞ്ചിയിലേക്ക് പോകുന്നതായാണ് തങ്ങളോട് പറഞ്ഞതെന്നാണ് പോലീസിനോടും മാധ്യമങ്ങളോടും വെളിപ്പെടുത്തിയത്. 'പായലിന്റെ സിലിഗുരി യാത്രയെക്കുറിച്ച് തങ്ങള്ക്ക് അറിവുണ്ടായിരുന്നില്ല. അവള് എന്തിനാണ് ഇവിടെ വന്നതെന്നും അറിയില്ല. റാഞ്ചിയിലേക്ക് പോവുകയാണെന്നാണ് തങ്ങളോട് പറഞ്ഞിരുന്നത്'- നടിയുടെ പിതാവ് പ്രഭീര്ഗുഹ പറഞ്ഞു.നടിയുടെ മരണവാര്ത്തയറിഞ്ഞ് പിതാവും ബന്ധുക്കളും വ്യാഴാഴ്ച ഉച്ചയോടെയാണ് സിലിഗുരിയിലെത്തിയത്.
ഭര്ത്താവുമായി വേര്പിരിഞ്ഞുകഴിഞ്ഞിരുന്ന പായല് ചക്രബര്ത്തി കടുത്ത മാനസികസമ്മര്ദ്ദത്തിലായിരുന്നെന്നും പിതാവ് പോലീസിന് മൊഴിനല്കിയിട്ടുണ്ട്. അതേസമയം, മൃതദേഹം പോസ്റ്റ്മോര്ട്ടത്തിനായി നോര്ത്ത് ബംഗാള് മെഡിക്കല് കോളേജിലേക്ക് മാറ്റിയതായും, സംഭവം ആത്മഹത്യയാണെന്നാണ് പ്രാഥമികനിഗമനമെന്നും സിലിഗുരി പോലീസ് കമ്മീഷണര് ഗൗരബ് ലാല് പറഞ്ഞു.
ബംഗാളി സിനിമ-സീരിയല് നടിയായ പായല് ചക്രബര്ത്തിയെ കഴിഞ്ഞദിവസം രാവിലെയാണ് ഹോട്ടല്മുറിയില് മരിച്ചനിലയില് കണ്ടെത്തിയത്. ചൊവ്വാഴ്ച വൈകീട്ട് ഹോട്ടലില് മുറിയെടുത്ത നടി, ബുധനാഴ്ച രാവിലെ ഗാങ്ടോങിലേക്ക് പോകുമെന്ന് പറഞ്ഞിരുന്നു. എന്നാല് രാവിലെ മുറിയില്നിന്ന് പ്രതികരണമൊന്നും ഇല്ലാതായതോടെ ഹോട്ടല് ജീവനക്കാര് പോലീസില് വിവരമറിയിച്ചു. തുടര്ന്ന് പോലീസെത്തി മുറി തുറന്ന് പരിശോധിച്ചപ്പോഴാണ് നടിയെ മരിച്ചനിലയില് കണ്ടെത്തിയത്.
https://www.facebook.com/Malayalivartha
