ഡബ്ല്യൂസിസിയുടെ ആരോപണങ്ങള്‍ക്കെതിരെ ആഞ്ഞടിച്ച്‌ താരസംഘടനയായ അമ്മ രംഗത്ത്. അമ്മക്ക് അഞ്ചരക്കോടി നല്‍കിയാളെ സംരക്ഷിക്കേണ്ട ചുമതല അമ്മയ്ക്കുണ്ടെന്ന മഹേഷിന്റെ പ്രതികരണം വ്യക്തിപരമാണ്. എല്ലാവരും ഉള്‍പ്പെട്ട സിനിമ ഏറ്റെടുത്ത് വിജയിപ്പിച്ച പങ്ക് മാത്രമാണ് ദിലീപിനുള്ളത്. മഹേഷ് സംഘടനയിലെ അംഗം മാത്രമാണ്. ഭാരവാഹിയല്ല. ആക്രമിക്കപ്പെട്ട പെണ്‍കുട്ടിയെ സംഘടനയില്‍ നിന്ന് രാജിവയ്പ്പിച്ചവര്‍ക്ക് എന്തോ അജണ്ടയുണ്ടെന്ന് സംശയിക്കുന്നു. മഞ്ജുവാര്യര്‍ അമ്മയുമായി നല്ല അടുപ്പത്തിലാണ്. ഡബ്ല്യൂസിസി ഉണ്ടാക്കിയതുതന്നെ മഞ്ജുവാര്യരെ മുന്‍നിര്‍ത്തിയാണ്. അവര്‍ എന്തുകൊണ്ട് അതില്‍ എത്തുന്നില്ല എന്നത് ആലോചിക്കണം.- സിദ്ദിവും കെ.പി.എ.സി ലളിതയും കൂട്ടിച്ചേര്‍ത്തു.

ഇത് കൂടാതെ ഡബ്ല്യുസിസിയുടെ ആരോപണങ്ങളെ തള്ളി നടന്‍ സിദ്ദിഖ്. ആരോപണങ്ങള്‍ ബാലിശമാണ്, നടനും എഎംഎംഎ ജോയിന്‍റ് സെക്രട്ടറി കൂടിയുമായ സിദ്ദിഖ് പറഞ്ഞു. കഴിഞ്ഞ പത്തിന് ദിലീപ് രാജി കത്ത് നല്‍കിയിരുന്നു. ‘മി ടൂ’ ക്യാമ്പെയിന്‍ നല്ലതാണ്, എന്നാല്‍ അതിനെ ദുരുപയോഗം ചെയ്യരുത്. ആരോപണങ്ങള്‍ ഉന്നയിക്കുമ്പോള്‍ പേരും വെളിപ്പെടുത്തണമെന്നും സിദ്ദിഖ് വ്യക്തമാക്കി.

ദിലീപിനെതിരെയാണ് ഇവര്‍ ആരോപണമുയര്‍ത്തുന്നത്, എന്നാല്‍ പ്രതി സുനില്‍ കുമാറിനെതിരെ ഒരക്ഷരം മിണ്ടുന്നില്ല. ദിലീപിനെ റേപ്പിസ്റ്റ് എന്ന് വിളിക്കരുത്. നടിമാര്‍ പറയുന്നതനുസരിച്ച് ദിലീപിന്‍റെ തൊഴില്‍ സാധ്യതകളെ തടയാന്‍ കഴിയില്ല. ആരുടെയും തൊഴില്‍ സാധ്യത തടയുന്ന സംഘടനയല്ല എഎംഎംഎ, സിദ്ദിഖ് പറഞ്ഞു. ഡബ്ല്യുസിസി അംഗങ്ങള്‍ മോഹന്‍ലാലിനെ അപമാനിക്കാന്‍ ശ്രമിച്ചു.

സംഘടനക്കുള്ളില്‍ നിന്ന് ഇങ്ങനെ ചെയ്യരുത്. പരസ്യമായ അധിക്ഷേപം സംഘടന വിരുദ്ധമാണ്, ഇത്തരക്കാര്‍ക്കെതിരെ നടപടിയെടുക്കും. രാജിവെച്ച് പോയവരെ തിരിച്ച് വിളിക്കില്ലെന്നും സിദ്ദിഖ് കൂട്ടിച്ചേര്‍ത്തു. ജനറല്‍ ബോഡി യോഗം അടിയന്തരമായി ചേരില്ല. അടുത്ത ജൂണില്‍ യോഗം ചേരും. ഡബ്ല്യുസിസിയുടെ ഗൂഡാലോചനയാണിത്. ആക്രമണത്തിനിരയായ പെണ്‍കുട്ടിയെ മുന്‍നിര്‍ത്തി ചിലര്‍ കളിക്കുന്നു. അമ്മയുടെ കെട്ടുറപ്പിനെ ഇത് ബാധിക്കുകയുമില്ല. സോഷ്യല്‍ മീഡിയകളിലെ തെറിവിളികള്‍ സ്വാഭാവികമാണെന്നും അത് ജനങ്ങളുടെ പ്രതികരണമാണെന്നു സിദ്ദിഖ് പറഞ്ഞു.