എന്റെ കയ്യില് വ്യക്തമായ തെളിവുകളുണ്ട്... എന്തിനെന്നെ പുറത്താക്കി എന്ന് എനിക്ക് വ്യക്തമായി അറിയാം; സിദ്ദിഖിന്റെ വാക്കുകളെ തള്ളി നടന് ഷമ്മി തിലകന്...
അമ്മ തനിക്ക് പ്രതിമാസം 5000 രൂപ വീതം നല്കുന്നുണ്ട്. എന്നാല് ഇത് എന്തിനെന്ന് അമ്മ വ്യക്തമാക്കണം. ഞാന് സിനിമയില് നിന്നും റിട്ടയര് ചെയ്യണമെന്നാണോ അമ്മ ഉദ്ദേശിക്കുന്നത്?. സിനിമ ഇല്ലാത്തതിനാലാകാം അസോസിയേഷന് റിട്ടയര്മെന്റ് സ്കീമായി ഈ തുക നല്കിയത്. കഴിഞ്ഞ എക്സിക്യൂട്ടീവ് കമ്മിറ്റി യോഗത്തില് അത് തിരിച്ചുനല്കുകയും എനിക്കതിന്റെ ആവശ്യമില്ലെന്ന് പറയുകയും ചെയ്തു. മുപ്പതുവര്ഷത്തോളമായി സിനിമയില് കലാകാരനായി തുടരുന്ന വ്യക്തിയാണ് ഞാന്. അമ്മയുടെ ഫൗണ്ടര് മെമ്ബറാണ്. അമ്മയ്ക്ക് അഞ്ച് കോടി നേടിക്കൊടുത്ത ട്വന്റി ട്വന്റി എന്ന ചിത്രത്തില് പ്രതിഫലം പോലും വാങ്ങാതെ അഭിനയിച്ചയാളാണ്. ഇത്ര വര്ഷങ്ങള്ക്കുശേഷം ഞാന് റിട്ടയര് ചെയ്യണമെന്ന രീതിയിലാണോ എനിക്ക് 5000 രൂപ നല്കിയത്? കൈനീട്ടമെന്നാണ് അതിന് നല്കിയിരിക്കുന്ന പേര്. വാസ്തവത്തില് അത് റിട്ടയര്മെന്റ് സ്കീമാണ്.-ഷമ്മി തിലകന് പറഞ്ഞു.
മലയാള സിനിമയില് അവസര നിഷേധമില്ലെന്ന സിദ്ദിഖിന്റെ വാക്കുകളെ തള്ളി നടന് ഷമ്മി തിലകന്. ഇതിന് തെളിവുണ്ട്, വിനയന്റെ സിനിമയില് അഭിനയിക്കരുതെന്ന് മുകേഷ് പറഞ്ഞെന്ന് അദ്ദേഹം പറയുന്നു. സിനിമയില് അവസരനിഷേധമോ ജോലിസാധ്യത ഇല്ലാതാക്കലോ ഇല്ലെന്നായിരുന്നു സിദ്ദിഖ് പറഞ്ഞത്. വിനയന്റെ ചിത്രത്തില് അഭിനയിക്കാനായി അഡ്വാന്സ് വാങ്ങിയിരുന്നു. അത് എന്നെ കൊണ്ട് നിര്ബന്ധിച്ച് തിരികെ കൊടുപ്പിച്ചു. മുകേഷായിരുന്നു ഇതില് ഇടപെട്ടത്.
കോടതിയിലും ഈ വിഷയം പറഞ്ഞിട്ടുണ്ട്. ഇത് മുകേഷ് നിഷേധിച്ചിട്ടുമില്ല, നിഷേധിക്കാന് കഴിയുകയുമില്ല. ഭയന്നതുകൊണ്ടാണ് അന്ന് വഴങ്ങിയത്. എന്റെ കയ്യില് വ്യക്തമായ തെളിവുകളുണ്ട്. എന്തിനെന്നെ പുറത്താക്കി എന്ന് എനിക്ക് വ്യക്തമായി അറിയാം. -ഷമ്മി തിലകന് പറഞ്ഞു. തിലകന്റെ മകനായതുകൊണ്ടാണ് എന്നോടും ഇത്തരം സമീപനം. അച്ഛനോട് ചെയ്ത തെറ്റ് കാരണം എന്നെ അഭിമുഖീകരിക്കാനുള്ള ബുദ്ധിമുട്ടും ഒരു കാരണമാകാം. മോഹന്ലാലിന്റെ പ്രസിഡന്റ് പദത്തില് വിശ്വാസമുണ്ട്. അച്ഛന്റെ വിഷയത്തില് കഴിഞ്ഞയാഴ്ചയും ലാലേട്ടനുമായി സംസാരിച്ചിരുന്നു. പരിഹരിക്കുമെന്ന് അദ്ദേഹം ഉറപ്പുനല്കിയിട്ടുണ്ട്. ഡബ്ല്യുസിസി പറഞ്ഞ കാര്യങ്ങളെക്കുറിച്ച് അറിയില്ല.
https://www.facebook.com/Malayalivartha