ജെ എന് യു വിഷയത്തില് പ്രതികരണവുമായി നടി സണ്ണി ലിയോണ്
ജെഎന്യുവിലെ അക്രമങ്ങളെ അപലപിച്ചു കൊണ്ട് പ്രതികരിച്ച് ബോളിവുഡ് താരം സണ്ണി ലിയോണ് രംഗത്ത്. രാജ്യത്ത് നടക്കുന്ന പ്രശ്നങ്ങളില് പരസ്പരം അക്രമിക്കാതെ തന്നെ പരിഹാരം കാണണമെന്ന് നടി പറഞ്ഞു. എല്ലാ പ്രശ്നത്തിനും അക്രമം കൂടാതെ തന്നെ ഉത്തരമുണ്ടെന്ന് താരം പറയുന്നു. താന് അക്രമത്തില് വിശ്വസിക്കുന്നില്ലെന്നും വാര്ത്താ എജന്സിയായ എഎന്ഐയോട് അവര് പ്രതികരിച്ചു. എല്ലാവരോടും അക്രമം അവസാനിപ്പിക്കണമെന്നും പരസ്പരം വേദനിപ്പിക്കാതെ പരിഹാരം കാണണമെന്നും അപേക്ഷിക്കുന്നു. കുട്ടികള് മാത്രമല്ല വേദനിക്കപ്പെട്ടത്. അവരുടെ കുടുംബങ്ങള് കൂടിയാണ്. ഈ ലോകം യുവജനങ്ങള്ക്ക് സുരക്ഷിതമായി തോന്നുന്നില്ല. സണ്ണി ലിയോണ് പറഞ്ഞു. മുഖംമൂടിധാരികളുടെ ആക്രമണത്തില് ജനുവരി അഞ്ചിന് വിദ്യാര്ഥികള്ക്കും അധ്യാപകര്ക്കും പരിക്കേറ്റിരുന്നു. സര്വകലാശാലയിലെ വിദ്യാര്ത്ഥികളുടെ ഹോസ്റ്റലുകളായ സബര്മതി, മഹി മാന്ദ്വി, പെരിയാര് തുടങ്ങിയവക്ക് നേരെയാണ് വൈകിട്ട് ഏഴ് മണിയോടെ ആക്രമണമുണ്ടായത്. സബര്മതി ഹോസ്റ്റല് അടിച്ച് തകര്ത്തു. നിര്ത്തിയിട്ട വാഹനങ്ങള് തകര്ക്കുകയും ഹോസ്റ്റലുകള്ക്ക് നേരെ കല്ലെറിയുകയുമുണ്ടായി. വടികളും ചുറ്റികയും മറ്റ് മാരകായുധങ്ങളുമായി അക്രമി സംഘം ഹോസ്റ്റലുകളിലേക്ക് അതിക്രമിച്ച് കയറി വന്ന് മര്ദിക്കുകയായിരുന്നുവെന്ന് വിദ്യാര്ത്ഥികള് പറയുന്നു. ജെഎന്യു സ്റ്റുഡന്റ്സ് യൂണിയന് പ്രസിഡന്റ് ഐഷി ഘോഷിന് ആക്രമണത്തില് തലയ്ക്ക് പരിക്കേറ്റിരുന്നു. കഴിഞ്ഞ ദിവസം നടി ദീപിക പദുകോണ് ജെഎന്യുവിലെത്തി വിദ്യാര്ഥികള്ക്ക് ഐക്യദാര്ഢ്യം പ്രഖ്യാപിച്ചിരുന്നു.
https://www.facebook.com/Malayalivartha