മാ ആനന്ദ് ഷീലയുടെ ജീവചരിത്രസിനിമയുമായി പ്രിയങ്ക ചോപ്ര
ആമസോണ് സ്റ്റുഡിയോ പുറത്തിറക്കുന്ന ജീവചരിത്രസിനിമയുമായി വീണ്ടും പ്രിയങ്ക ചോപ്ര വരുന്നു. വിവാദ ആത്മീയ ആചാര്യന് ഓഷോ രജനീഷിന്റെ കുപ്രസിദ്ധയായ പേഴ്സണല് സെക്രട്ടറി മാ ആനന്ദ് ഷീലയുടെ ഉദ്വേഗഭരിതമായ ജീവിതമാണ് പ്രമേയം. ഷീല എന്ന് പേരിട്ടിരിക്കുന്ന ചിത്രത്തിന്റെ നിര്മാതാവും പ്രിയങ്കയാണെന്ന് ഹോളിവുഡ് മാധ്യമങ്ങള് റിപ്പോര്ട്ട് ചെയ്തു.
അമേരിക്കയില് പഠനം പൂര്ത്തിയാക്കിയ ഗുജറാത്തി സ്വദേശിയായ ഷീല അംബലാല് പട്ടേല് ആണ് യുഎസില് ആശ്രമം തുടങ്ങാന് ഓഷോയെ പ്രേരിപ്പിച്ചത്. 64,000 ഏക്കറില് പരന്നുകിടന്ന ആശ്രമത്തിന്റെ അധിപയായ ഷീല, മാ ആനന്ദ് ഷീല എന്നറിയപ്പെട്ടു. ആശ്രമം പിന്നീട് കുറ്റകൃത്യങ്ങളുടെ കേന്ദ്രമായി മാറി. ആശ്രമ അന്തേവാസികളെക്കൊണ്ട് ഭക്ഷണത്തില് വിഷം കലര്ത്തി കൂട്ടക്കൊല ആസൂത്രണം ചെയ്തതിന് ഇവര് ശിക്ഷിക്കപ്പെട്ടു. ആദ്യ ഭര്ത്താവിനെ വിഷംകൊടുത്തുകൊന്ന കേസില് സ്വിറ്റ്സര്ലന്ഡില് അറസ്റ്റിലായി. രണ്ട് വര്ഷം മുമ്ബ് ഷീലയുടെ ജീവിതത്തെ കുറിച്ച് വൈല്ഡ് വൈല്ഡ് കണ്ട്രി എന്ന ഡോക്കുമെന്ററി പുറത്തിറങ്ങി.
ഇന്ത്യയുടെ ബോക്സിങ്താരം മേരികോമിന്റെ ജീവിതചിത്രത്തില് പ്രിയങ്കയുടെ പ്രകടനം ഏറെ ശ്രദ്ധിക്കപ്പെട്ടിരുന്നു. അമേരിക്കന് ടെലിവിഷന് സീരിയലുകളില് തിളങ്ങുന്ന താരത്തിന് ഷീല ഹോളിവുഡില് പുതിയ വാതായനങ്ങള് തുറന്നുകൊടുക്കുമെന്നാണ് പ്രതീക്ഷ. ഓസ്കര് ജേതാവായ വിഖ്യാത അമേരിക്കന് സംവിധായകന് ബാരി ലെവിസണ് ആണ് സിനിമ ഒരുക്കുന്നത്. റെയിന്മാനി(1988)ലൂടെ മികച്ച സംവിധായകനുള്ള ഓസ്കര് നേടിയ ബാരി ആണ് ഗുഡ്മോര്ണിങ് വിയറ്റ്നാം(1987) എന്ന ചിത്രം ഒരുക്കിയത്. ബാരിയുടെ കമ്പനിയും പ്രിയങ്ക ചോപ്രയുടെ പര്പ്പിള് പെബില് പിക്ചേഴ്സും ചേര്ന്നാണ് നിര്മാണം.
https://www.facebook.com/Malayalivartha
