സിനിമാ വികസന കോര്‍പറേഷനില്‍ മരുന്നിനു പോലും സിനിമക്കാരില്ല; ദിലീപ് ഉള്‍പ്പെടെയുള്ള സിനിമാക്കാര്‍ രാജിവച്ചതോടെ ചര്‍ച്ചയ്ക്കായി തിരുവഞ്ചൂര്‍; ഗണേഷിന്റെ സുഹൃത്തുക്കളെല്ലാം പടിയിറങ്ങുന്നു
ചലച്ചിത്ര വികസന കോര്‍പറേഷനില്‍ മരുന്നിനു പോലും സിനിമാക്കാരില്ല. അറിയപ്പെടുന്ന ഒട്ടുമിക്ക ചലച്ചിത്ര പ്രവര്‍ത്തകരും ചലച്ചിത്ര വികസന കോര്‍പറേഷന്റെ ഡയറക്ടര്‍ ബോര്‍ഡില്‍ നിന്നും രാജിവച്ചു. കോണ്‍ഗ്രസ് വക്താവ് രാജ്‌മോഹന്‍ ഉണ്ണിത്താനെ ചലച്ചിത്ര വികസന കോര്‍പറേഷന്റെ ചെയര്‍മാനായി നിയമിച്ചതില്‍ പ്രതിഷേധിച്ചാണ് സംഘടനയുടെ ഡയറക്ടര്‍ ബോര്‍ഡില്‍ നിന്ന് പ്രശസ്ത സിനിമാ പ്രവര്‍ത്തകരായ ദിലീപ്, സിദ്ദിക്ക്, ഷാജി കൈലാസ്, എസ്.കുമാര്‍, മണിയന്‍ പിള്ള രാജു എന്നിവര്‍ ഉള്‍പ്പെടെ ഏഴുപേര്‍ രാജിവച്ചത്.
ആകെ 19 പേരാണ് ഡയറക്ടര്‍ ബോര്‍ഡിലുള്ളത്. വൈസ് ചെയര്‍മാനും അമ്മയുടെ ജനറല്‍ സെക്രട്ടറിയുമായ ഇടവേള ബാബു, കാലടി ഓമന എന്നിവരും ഇന്നലെ രാജി വച്ചിരുന്നു.
എന്നാല്‍, ഉണ്ണിത്താനെ നിയമിക്കാനുള്ള തീരുമാനത്തില്‍ നിന്ന് സര്‍ക്കാര്‍ പിന്നോട്ടില്ല. ബുധനാഴ്ച രാജ്‌മോഹന്‍ ഉണ്ണിത്താന്‍ ചുമതലയേല്‍ക്കുമെന്നും സര്‍ക്കാര്‍ വ്യക്തമാക്കിയിട്ടുണ്ട്. അതേസമയം എല്ലാ സിനിമാ പ്രവര്‍ത്തകരും രാജിവച്ചതോടെ സിനിമയുടെ വികസനത്തിനായി പ്രവര്‍ത്തിക്കുന്ന കോര്‍പറേഷനില്‍ സിനിമാക്കാര്‍ ആരും ഇല്ലാതായി. ഇനി ഉണ്ണിത്താന്റെ നേതൃത്വത്തില്‍ രാഷ്ട്രീയക്കാര്‍ ഭരിക്കും.
ഇടവേള ബാബു, മണിയന്‍പിള്ള രാജു, കാലടി ഓമന എന്നവര്‍ നേരിട്ടെത്തിയും മറ്റുള്ളവര്‍ ഇമെയിലു വഴിയുമാണ് കോര്‍പ്പറേഷന്‍ എം.ഡി ദീപാ ഡി. നായര്‍ക്ക് രാജി കത്ത് നല്‍കിയത്.
സര്‍ക്കാരുമായി ഇനി സഹകരിക്കില്ല എന്ന് സിനിമാക്കാര്‍ വ്യക്തമാക്കി. സര്‍ക്കാരിന്റെ പരിപാടികള്‍ സിനിമ പ്രവര്‍ത്തകര്‍ ബഹിഷ്‌കരിക്കും. സര്‍ക്കാരിനു വേണ്ടി സൗജന്യമായി അഭിനയിച്ച പരസ്യങ്ങള്‍ പിന്‍വലിക്കണമെന്ന് സര്‍ക്കാരിനോട് ആവശ്യപ്പെടുമെന്നും രാജിക്കു ശേഷം ഇടവേള ബാബു പറഞ്ഞു.
അതേസമയം കെ.എസ്.എഫ്.ഡി.സിയുടെ വൈസ് ചെയര്‍മാനാകാന്‍ താനില്ലെന്ന് സലിംകുമാര്‍ പറഞ്ഞു. തനിക്ക് ഇത്തരം പാര്‍ലമെന്ററി വ്യാമോഹം ഒന്നും ഇല്ലെന്നും അദ്ദേഹം പറഞ്ഞു. ഇടവേള ബാബു രാജി വച്ച് ഒഴിവില്‍ സലികുമാറിനെ വൈസ് ചെയര്‍മാനാക്കാനായി സര്‍ക്കാര്‍ പരിഗണിച്ചുവരികെയാണ് തന്റെ നിലാപാട് അദ്ദേഹം വ്യക്തമാക്കിയത്.
അഭിനേതാക്കളുടെ സംഘടനയും ടെക്‌നീഷ്യന്‍മാരുടെ സംഘടനയും ഒറ്റക്കെട്ടായി നില്‍ക്കുന്നതോടെ സര്‍ക്കാരും പ്രതിസന്ധിയിലാണ്. ഗണേഷ്‌കുമാര്‍ സിനിമാ മന്ത്രിയായിരിക്കെ പ്രതിഷ്ഠിച്ച എല്ലാ വമ്പന്‍മാരും അങ്ങനെ പടിയിറങ്ങുകയാണ്. ഒടുങ്ങാത്ത പ്രതിഷേധത്തോടെ.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
